ᐃᖃᓗᐃᑦ, ᓄᓇᕗᑦ − ᔮᓐᓄᐊᓕ 4, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᑲᒪᒋᔭᖃᕐᖓᑕ ᐃᓚᒋᔭᐅᑎᑦᑎᓪᓗᑎᒃ ᑕᓪᓕᒪᓂᑦ ᕿᑭᖅᑕᓂ ᓄᓇᓕᓐᓂᑦ ᐱᔾᔪᑎᒋᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ (ᐊᖏᕈᑏᑦ) ᑖᒃᑯᐊ ᐋᖅᑭᔅᓱᐃᒍᑕᐅᓛᖅᑐᑦ ᑕᓪᓗᕈᑎᐅᑉ ᐃᒪᖓᓂ ᓴᐳᔾᔨᕕᐅᓂᐊᖅᑐᒥᒃ.

ᔮᓐᓄᐊᓕ 9ᒥ  ᔮᓐᓄᐊᓕ 18ᒧᑦ, ᓵᓐᑐᕋ ᐃᓅᑎᖅ, ᑲᑐᔾᔨᖃᑎᒌᒃᑯᑦ ᐋᔩᖃᑎᒌᑦᑎᓪᓗᐊᑕᖓᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᐱᔾᔪᑎᒋᓪᓗᒋᑦ, ᑲᑎᒪᑎᑦᑎᖃᑦᑕᓂᐊᕐᖓᑦ ᓄᓇᓕᓐᓂᑦ ᐃᓚᒋᔭᐅᑎᑦᑎᓗᑎᒃ ᐅᑯᓇᓂ ᓄᓇᓕᓐᓂᑦ ᐃᒃᐱᐊᕐᔪᒃ, ᖃᐅᓱᐃᑦᑐᖅ, ᐊᐅᓱᐃᑦᑐᖅ, ᑲᖏᖅᑐᒑᐱᒃ ᐊᒻᒪᓗ ᒥᑦᑎᒪᑕᓕᒃ.

ᑐᙵᓱᑦᑎᑦᑎᓗᑎᒃ ᒪᑐᐃᖓᑎᑦᑎᖃᑦᑕᓂᐊᖅᑐᑦ ᑕᐃᒫᒃ ᑲᑐᔾᔨᖃᑎᒌᒃᑯᑦ ᐃᓱᒪᒋᔭᐅᔪᓂᑦ ᑭᐅᔭᐅᖃᑦᑕᓂᐊᕐᖓᑕ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᒥᔅᓵᓄᑦ ᐊᒻᒪᓗ ᓄᐊᑦᑎᕙᓪᓕᐊᓂᐊᕐᖓᑕ ᐃᓱᒪᒋᔭᐅᓯᒪᔪᓂᑦ ᓄᓇᓕᓐᓂᑦ ᑭᓱᑦ ᐃᓚᓕᐅᔾᔭᐅᓯᒪᔭᕆᐊᖃᕐᓂᐊᕐᒪᖔᑕ ᑖᒃᑯᓇᓂ ᐊᖏᖃᑎᒌᒍᑎᓂᑦ.

ᑕᓪᓗᕈᑎᐅᑉ ᐃᒪᖓᓄᑦ ᐊᖏᕈᑎᓂᑦ ᐋᔩᖃᑎᒌᒍᑎᖃᕋᓱᓛᖅᑐᑦ ᒥᕐᖑᐃᓯᕐᕕᓕᕆᔨᒃᑯᓐᓂ ᑲᓇᑕᒥ ᖃᓂᒋᔮᓂ ᒫᑦᓯ 2019.

ᐃᓄᓕᒫᓂᑦ ᓄᓇᓕᓐᓂᑦ ᐃᓚᒋᔭᐅᑎᑦᑎᖃᑦᑕᕐᓂᖅ ᒪᑯᓂᖓ ᐃᓚᖃᖃᑦᑕᓂᐊᕐᒥᔪᑦ ᐊᑯᓂᐅᙱᑦᑐᖅ ᐅᓂᒃᑳᖃᓚᐅᕐᓗᑎᒃ ᑭᖑᓂᐊᒍᑦ ᓄᓇᓕᓐᓂᑦ ᖁᕕᐊᓱᖃᑎᖃᖃᑦᑕᓂᐊᖅᑐᑦ ᑕᑯᕋᓈᑎᑦᑎᖃᑦᑕᕐᓗᑎᓪᓗ ᑕᑯᕋᓐᓈᑎᑦᑎᑎᓪᓗᒋᑦ ᖃᒡᒋᐊᕗᒃᑯᓐᓃᙶᕐᓯᒪᔫᒃ ᓇᑖᓴ ᐊᓚᒃᑲᕆᐊᓪᓚᒃ ᐊᒻᒪᓗ ᔨᐅᕆ ᓚᐃᓴ.

ᓂᐅᖅᑲᕋᔅᓴᖅᑕᖃᖃᑦᑕᓂᐊᖅᑐᖅ ᐊᒧᓯᖃᑦᑕᕐᓗᑎᓪᓗ ᓇᓚᐅᑦᑖᕈᑎᓄᑦ ᐃᓯᕈᑎᒥᓂᕐᓂᑦ ᐊᒧᔭᐅᔾᔪᓯᐊᓂᑦ ᐊᒧᔭᑦ ᓵᓚᔅᓴᖃᑦᑕᕐᓗᑎᒃ ᒑᓯᑖᕈᑎᓂᑦ ᓂᕿᑖᕈᑎᓂᓪᓗ ᐊᐅᑦᑕᔫᓂᑦ, ᕿᓯᓐᓂᒃ, ᐅᖃᓕᒫᒐᕐᓂᑦ, ᓂᔾᔭᐅᑎᓂᑦ ᐊᓯᕈᓘᔭᖏᓐᓂᓪᓗ.

ᐅᓐᓄᓴᒃᑯᑦ ᐃᓄᓕᒫᓂᑦ ᑕᑯᕋᓐᓈᑎᑦᑎᒍᒫᕐᓂᐊᖅᑎᓪᓗᒋᑦ ᖃᒡᒋᐊᕗᒃᑯᓂᙶᕐᓯᒪᔪᑦ ᓂᔭᐅᓯᔭᖅᑏᒃ ᓱᕈᓯᕐᓂᑦ ᐃᓕᓐᓂᐊᑎᑦᑎᖃᑦᑕᓛᕐᒥᔫᒃ ᐊᑐᓂᑦ ᓄᓇᓕᓐᓂᑦ.

ᓇᒥ/ᖃᖓᒃᑯᓪᓗ ᑐᑭᓯᒋᐊᕐᕕᖃᖃᑦᑕᓂᐊᕐᒪᖔᑕ:

ᖃᐅᓱᐃᑦᑐᖅ − ᐱᖓᑦᑎᖅ, ᔮᓐᓄᐊᓕ 10

ᐊᐅᓱᐃᑦᑐᖅ − ᑎᓴᒻᒥᖅ, ᔮᓐᓄᐊᓕ 11

ᐃᒃᐱᐊᕐᔪᒃ − ᓯᕙᑖᕐᕕᒃ, ᔮᓐᓄᐊᓕ 12

ᑲᖏᖅᑐᒑᐱᒃ − ᐱᖓᑦᑎᖅ, ᔮᓐᓄᐊᓕ 17

ᒥᑦᑎᒪᑕᓕᒃ − ᑕᓪᓕᒻᒥᖅ, ᔮᓐᓄᐊᓕ 19

ᐅᓪᓗᓕᒫᖅ ᐊᑐᖅᑕᐅᖃᑦᑕᓂᐊᖅᑐᓂᑦ ᐋᖅᑭᔅᓱᐃᓯᒪᔪᒍᑦ ᐊᑐᓂᑦ Hᐊᒪᓚᐅᔪᓂᑦ:

9:30ᒥ ᐅᓪᓛᒃᑯᑦ ᖁᓛᓅᕋᓱᓐᓂᖓᓂ −ᑲᑎᒪᖃᑎᖃᖃᑦᑕᕐᓗᑕ Hᐊᒪᓚᒃᑯᑦ ᑲᑎᒪᔨᖏᓐᓂᒃ ᐊᒻᒪᓗ ᐊᖑᓇᓱᑦᑐᓕᕆᔨᒃᑯᑦ ᑲᑎᒪᔨᖏᓐᓂᒃ

3:30ᒥ 5ᒧᑦ ᐅᓐᓄᓴᒃᑯᑦ − ᓱᕈᓯᕐᓂᑦ ᑎᑎᖅᑐᒐᖅᑎᑦᑎᖃᑦᑕᕐᓗᑎᒃ ᖃᒡᒋᐊᕗᒃᑯᑦ ᑲᒪᓗᑎᒃ

7ᒥ ᐅᓐᓄᒃᑯᑦ − ᐃᓄᓕᒫᖅᑎᑎᓪᓗᑎᒃ ᓄᓇᓕᓐᓂᑦ ᑲᑎᒪᖃᑎᖃᕐᓗᑎᒃ

8:30ᒥ ᐅᓐᓄᒃᑯᑦ 9ᒧᑦ ᐅᓐᓄᒃᑯᑦ −ᓄᓇᓕᓐᓂᑦ ᖁᕕᐊᓱᖃᑎᖃᕐᓗᑎᒃ ᑕᑯᕋᓐᓈᑎᑦᑎᓗᑎᒃ ᖃᒡᒋᐊᕗᒃᑯᓃᙶᕐᓯᒪᔫᒃ ᓂᔾᔭᐅᓯᔭᖅᑏᒃ

ᐅᓪᓗᖏᑦ/ᓯᕿᙳᔭᒃᑯᓪᓗ ᐋᖅᑭᓯᒪᓂᖏᑦ ᐊᓯᔾᔨᖃᑦᑕᓂᐊᖅᑐᑦ ᓯᓚ/ᖃᖓᑕᓲᕐᓗ ᐊᑲᐅᓈᕐᓯᒪᙱᒐᐃᑉᐸᑦ.

ᐃᓅᓯᖏᑕ ᒥᔅᓵᓄᑦ ᑐᑭᓯᐅᒪᔾᔪᑎᔅᓴᑦ:

ᓵᓐᑐᕋ ᐃᓅᑎᐅᑉ ᐃᓅᓯᖓᑕ ᒥᔅᓵᓄᑦ

ᓵᓐᑐᕋ ᐃᓅᑎᖅ ᐊᔩᖃᑎᒌᑦᑎᓪᓗᐊᑕᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᐱᔾᔪᑎᒋᓪᓗᒋᑦ. ᐃᓅᑎᖅ ᒪᓕᒐᓕᕆᓂᕐᒧᑦ ᐱᔭᕇᕈᑎᖓᓂᒃ ᓇᓗᓇᐃᒃᑯᑕᖅᑖᓚᐅᕐᓯᒪᔪᖅ ᐊᑭᑦᓯᕋᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᕕᒻᒥ 2005ᖑᑎᓪᓗᒍ, 2006ᖑᑎᓪᓗᒍ, ᑖᓐᓇ ᓯᕗᓪᓕᕐᐹᖑᓪᓗᓂ ᐃᓅᓪᓗᓂ ᐊᕐᓇᐅᓪᓗᓂ ᓄᓇᕗᒥ ᐱᔭᕇᕐᓯᓚᐅᕐᓯᒪᔪᖅ ᖃᐅᔨᓴᖅᑕᐅᔾᔪᑎᒥᓂᒃ. ᐅᐊᑦᑎᐊᕈ, ᐃᖅᑲᓇᐃᔭᓚᐅᕐᓯᒪᔪᖅ ᒪᓕᒐᓕᕆᔨᐅᓪᓗᓂ ᓄᓇᕗᑦ ᒐᕙᒪᒃᑯᖏᓐᓂ, ᑐᑭᒧᐊᑦᑎᑦᑎᔨᐅᓪᓗᓂ ᐊᑐᐊᒐᓕᕆᓂᕐᒧᑦ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑉ ᐊᓪᓚᕝᕕᐊᓂ ᐊᒻᒪᓗ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᑲᒥᓯᓇᐅᔪᒻᒥᔪᖅ ᓄᓇᕗᒥ. ᒫᓐᓇᕋᑖᖑᓯᒪᔪᖅ, ᐃᖅᑲᓇᐃᔭᔪᔪᖅ ᑕᐃᔅ ᑲᓇᑕ ᑐᙵᕕᐊᓄᑦ ᐊᐅᓚᑦᑎᔨᐅᖃᑕᐅᓪᓗᓂ ᐃᓄᐃᑦ ᓄᓇᖓᓐᓄᑦ.

ᐃᓅᑎᖅ ᓇᒥᑐᐃᓐᓇᖅ ᓄᓇᓕᓐᓂᑦ ᓄᓇᖃᖃᑦᑕᕐᓯᒪᔪᖅ ᓄᓇᕗᒥ. ᓱᕈᓯᐅᓪᓗᓂ ᑲᖏᖅᑐᐊᓗᒃ ᓄᓇᓕᕋᓛᕐᓂᑦ ᐱᕈᕐᓴᓂᑯ ᑲᖏᖅᑐᒑᐱᒻᒥᓗ, ᐃᓅᓱᑦᑑᓕᖅᑐᓂ ᐃᖃᓗᓐᓄᑦ ᐊᐅᓪᓛᕐᓂᑯ, ᑕᒫᓂ ᓄᓇᖃᓕᖅᑐᖅ. ᐱᔭᕇᕋᒥ ᐃᓕᓐᓂᐊᕐᕕᐊᓗᒻᒥ, ᐃᓕᓐᓂᐊᓚᐅᕐᓯᒪᔪᖅ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕐᕕᒻᒥ, ᐋᑐᕚᒥ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑕᐅᓲᖅ ᑖᒃᑯᐊ ᐃᓕᓐᓂᐊᑎᑦᑎᓲᑦ ᐃᓄᐃᑦ ᐅᐊᑦᑎᐊᕈ ᐊᑐᖃᑦᑕᕐᓯᒪᔭᖏᑕ ᒥᔅᓵᓄᑦ. ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᓂᕐᒥ ᐃᓕᓐᓂᐊᓚᐅᖅᑐᓂ ᐅᑎᓚᐅᕐᓯᒪᔪᖅ ᐃᖃᓗᓐᓄᑦ ᐊᒻᒪᓗ ᐃᓕᓐᓂᐊᓯᓚᐅᕐᓯᒪᔪᖅ ᒪᓕᒐᓕᕆᔾᔪᑎᓂᑦ ᒪᓕᒐᓕᕆᔨᒃᑯᓐᓂ ᑲᓇᑕᒥ. ᐃᖅᑲᓇᐃᔭᓯᓚᐅᕐᓯᒪᒻᒥᔪᖅ ᐃᑲᔪᖅᑕᐅᕕᓕᕆᔨᒃᑯᓐᓄᑦ ᓄᓇᕗᑦ ᒐᕙᒪᒃᑯᖏᓐᓂ, ᐃᑲᔪᖃᑦᑕᖅᑐᓂ ᐃᓅᓱᑦᑐᓂᑦ, ᐅᑎᕈᒫᕐᓂᐊᑎᓪᓗᒋᑦ ᐃᓕᓴᕕᖏᓐᓄᑦ ᓯᓚᑦᑐᓴᕐᕕᒻᒥ ᒪᓕᒐᓕᕆᔨᐅᓂᕐᒧᑦ ᐃᓕᓐᓂᐊᕐᕕᖓᓐᓄᑦ ᑳᕈᓪᑕᓐ ᓯᓚᑦᑐᓴᕐᕕᔾᔪᐊᕐᒧᑦ.

ᖃᒡᒋᐊᕗᒃᑯᓐᓂᑦ ᓂᔾᔭᐅᓯᔭᖅᑏᒃ:

ᓇᑖᓴ ᐊᓚᒃᑲᕆᐊᓪᓚᒃ

ᓇᑖᓴ ᐊᓚᒃᑲᕆᐊᓪᓚᒃ ᐃᓅᓪᓗᓂ ᐃᙱᖅᑎ/ᐃᙱᐅᓯᐅᖅᑎ ᐊᒻᒪᓗ ᑕᕐᕆᔮᔅᓴᓕᐅᕆᔨᓄᑦ ᑕᕐᕆᔮᔅᓴᓕᐅᒐᖅ ᐃᖃᓗᓐᓂ, ᐱᕈᕐᓴᓂᑰᓪᓗᓂ ᖃᐅᓱᐃᑦᑐᕐᒥ, ᐃᒡᓗᓕᒻᒥ ᓄᓇᕕᒻᒥᓗ. ᓇᑖᓴ ᐃᓚᒋᔭᐅᓪᓚᕆᑦᑐᖅ ᑭᕕᐅᖅ ᐅᑎᕐᓂᖓ ᑕᑯᕋᓐᓈᖅᑕᐅᕙᑦᑐᓂᑦ.

ᔨᐅᕆ ᓚᐃᓴ

ᐃᓅᓯᒪᔪᖅ ᐃᓚᖃᖅᑐᓂ ᑭᖑᓪᓕᕐᐹᖑᓯᒪᔪᓄᑦ ᓅᓚᐅᕐᓯᒪᔪᓄᑦ ᐸᓐᓂᖅᑑᕐᒧᑦ ᓄᓇᒋᕙᑦᑕᖓᓐᓂ, ᔨᐅᕆ ᐃᓅᓱᑦᑑᓪᓗᓂ ᐃᓅᓪᓗᓂ ᐱᙳᐊᖅᑎ. ᐊᐅᔭᖅ 2017ᖑᑎᓪᓗᒍ, ᔨᐅᕆ ᐊᐃᑉᐸᖃᖅᑐᓂ ᒪᕐᕈᐃᓐᓇᐅᓪᓗᑎᒃ ᓄᓇᕗᒻᒦᙶᕐᓯᒪᓪᓗᑎᒃ ᐱᙳᐊᕆᐊᖅᑐᕐᓯᒪᖃᑎᖃᔪᔪᖅ, ᐃᙱᕆᐊᖅᑐᕐᓯᒪᓪᓗᓂᓗ ᒧᒥᕆᐊᖅᑐᕐᓯᒪᓪᓗᓂᓗ ᑲᑐᔾᔨᖃᑎᒌᑦ ᑐᙵᕕᐊᓂ ᐋᖅᑭᔅᓱᐃᑎᓪᓗᒋᑦ ᓯᓐᓇᑦᑐᐊᓂᑦ ᓄᐊᑦᑎᕕᐅᕙᑦᑐᓄᑦ, ᔨᐅᕆ ᒫᓐᓇ ᐃᖅᑲᓇᐃᔭᖅᑐᖅ ᖃᒡᒋᐊᕗᒃᑯᓐᓂ ᐃᓅᓱᑦᑐᓄᑦ ᑕᑯᕋᓐᓈᖅᑕᐅᕙᑦᑐᓄᑦ ᑲᒪᔨᐅᓪᓗᓂ, ᐱᙳᐊᖅᑎᐅᓪᓗᓂ ᑭᕕᐅᖅ ᐅᑎᕐᓂᖓᓂ ᑕᑯᕋᓐᓈᖅᑕᐅᕙᑦᑐᓂᑦ ᐊᒻᒪᓗ ᐃᓕᓐᓂᐊᖅᑐᓂ ᑕᑯᓐᓇᕋᔅᓴᓕᕆᒍᑕᐅᕙᑦᑐᓂᑦ ᐃᓱᕐᕆᐅᑕᐅᕙᑦᑐᓂᑦ ᑲᒪᔨᐅᓂᕐᒥᒃ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᓯᐅᕋHᐃ, ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca, (867) 975.8413, 1.800.667.2742