ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᙵᓱᑦᑎᑦᑎᕗᑦ ᑲᑎᒪᔨᑖᖅᑲᐅᓂᒃ
ᔮᓐᓄᐊᓕ 30, 2025 – ᐃᖃᓗᐃᑦ, ᓄᓇᕗᑦ – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᑐᙵᓱᑦᑎᑦᑎᕗᑦ ᑲᑎᒪᔨᓂᑦ ᐃᖃᓗᓐᓄᑦ ᑕᒫᓂ ᐱᓇᓱᐊᕈᓯᕐᒥ ᓯᕗᓪᓕᕐᐹᒥ ᑲᑎᒪᓂᖓᓐᓄᑦ ᐊᕐᕌᒍᒥ ᑕᒫᓂ.
ᑖᓐᓇ ᓯᕗᓪᓕᕐᐹᒥ ᑲᑎᒪᔭᖅᑐᕐᕕᐅᒻᒪᑦ ᓂᕈᐊᖅᑕᐅᕋᑖᕐᓯᒪᔪᓄᑦ ᑲᑎᒪᔨᐅᓂᕐᒧᑦ ᕿᑭᖅᑕᓂᒃᑯᑦ ᑲᑎᒪᔨᖏᓐᓄᑦ: ᑲᑕᐃᓯ ᐊᑕᒍᑦᓯᐊᖅ ᐃᒃᐱᐊᕐᔪᒻᒥᑦ, ᓛᕆ ᐊᐅᓪᓚᓗᒃ ᐊᐅᓱᐃᑦᑐᕐᒥᑦ, ᕕᓕ ᐃᑦᑐᐊᖓᑦ ᐸᓐᓂᖅᑑᕐᒥᑦ, ᕉᔅᒥᐊᓕ ᒥᑦᑐᖅ ᕿᑭᖅᑕᕐᔪᐊᕐᒥᑦ, ᓯᐅᕋ ᓴᓪᓗᕕᓂᖅ ᖃᐅᓱᐃᑦᑐᕐᒥᑦ ᐊᒻᒪᓗ ᐋᑕᒥ ᐃᑦᑐᐊᑦᓯᐊᖅ ᐃᖃᓗᓐᓂᑦ, ᑖᓐᓇ ᓂᕈᐊᖅᑕᐅᕋᑖᔪᔪᖅ ᑎᑎᕋᖅᑎ ᑮᓇᐅᔭᓕᕆᔨᐅᓂᕐᒧᑦ.
ᒪᕐᕉᒃ ᓯᕗᓕᖅᑎᓄᑦ ᑲᑎᒪᔨᐅᖃᑕᐅᓂᐊᖅᑑᒃ ᓂᕈᐊᖅᑕᐅᓚᐅᖅᑑᒃ ᑕᒫᓂ ᐱᓇᓱᐊᕈᓯᕐᒥ, ᓵᓚᒪᓐ ᐊᓗᕈᑦ ᓴᓂᕋᔭᒻᒥᐅᑕᖅ ᐊᒻᒪᓗ ᐲᑕ ᐃᕙᓗ ᐃᒡᓗᓕᒻᒥᐅᑕᖅ. ᑭᒡᒐᖅᑐᐃᕕᒋᓂᐊᖅᑕᖏᑦ ᑐᓂᐅᖅᑲᖅᑕᐅᑲᓐᓂᓚᐅᖅᑐᑦ ᐊᒻᒪᓗ ᐃᓕᓐᓂᐊᖅᑎᑕᐅᓚᐅᖅᑐᑦ ᑎᒥᐅᑉ ᒥᔅᓵᓄᑦ ᐊᒻᒪᓗ ᒫᓐᓇ ᕿᑭᖅᑕᓂᒃᑯᑦ ᑲᒪᒋᕙᑦᑕᖏᑕ ᒥᔅᓵᓄᑦ.
ᓄᑖᕈᖅᑎᑕᐅᒋᐊᕐᓯᒪᔪᓂᑦ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ (CLARC) ᐊᑐᐊᕐᓯᔾᔪᑎᖏᓐᓂᒃ ᐅᓂᒃᑳᕐᕕᐅᓚᐅᖅᑐᑦ ᐋᖅᑭᒋᐊᕐᓂᐊᕐᖓᑕ, ᐱᓗᐊᖅᑐᒥᑦ ᐃᓚᓕᐅᑎᓯᒪᓂᐊᕐᖓᑕ ᓄᓇᓕᓐᓂᑦ ᐊᑐᖅᑕᐅᖃᑦᑕᕈᓐᓇᖅᑐᑦ ᐱᓇᓱᐊᕋᔅᓴᐃᓪᓗ ᑕᕝᕗᖓ ᐃᓚᓕᐅᔾᔭᐅᓯᒪᔪᑦ ᓇᓗᓇᐃᖅᑕᐅᒋᐊᓚᐅᖅᑐᑦ ᐊᑐᖅᑐᒋᑦ ᑮᓇᐅᔭᓄᑦ ᐃᓯᕐᐸᑦᑐᓄᑦ ᓴᓂᕐᕙᐃᖃᑦᑕᓂᕐᒧᑦ ᐊᑐᐊᒐᑦ ᑕᐃᒫᒃ ᖃᐅᔨᒪᓇᑦᑎᐊᓂᐊᕐᖓᑦ ᑖᒃᑯᐊ ᒥᔅᓵᓅᖓᔪᑦ ᕿᑭᖅᑕᓂᒃᑯᓐᓄᑦ ᑮᓇᐅᔭᐃᑦ ᐃᓯᕐᐸᑦᑐᑦ ᑐᕌᖅᑎᑕᐅᖃᑦᑕᕋᓗᐊᕐᒪᖔᑕ ᐱᕚᓪᓕᕈᑎᔅᓴᐅᓂᐊᕐᓗᑎᒃ ᐊᑐᓂᑦ ᕿᑭᖅᑕᓂ ᓄᓇᓕᓐᓄᑦ. ᐱᔾᔪᑎᖃᖅᑐᑎᒃ ᑖᒃᑯᐊ ᐱᓇᓱᐊᕈᑕᐅᒻᒪᑕ ᐱᔪᓐᓇᕐᓯᒋᐊᒃᑲᓐᓂᖁᓪᓗᒋᑦ ᕿᑭᖅᑕᓂ ᓄᓇᓖᑦ ᐱᕕᖃᖅᑎᓪᓗᒋᑦ ᑐᑭᑖᕈᑎᖃᖃᑦᑕᓂᕐᒥᒃ ᖃᓄᖅ ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᖃᑦᑕᓂᐊᕐᒪᖔᑕ ᑲᒪᒋᔭᖃᕐᓗᑎᒃ ᓄᓇᖏᓐᓂ ᓇᓗᓇᐃᖅᑕᐅᓯᒪᔪᓂᑦ ᑭᙴᒪᒋᕙᑦᑕᖏᓐᓂᒃ ᐊᒻᒪᓗ ᐱᓇᓱᐊᕋᔅᓴᐅᕙᑦᑐᓂᑦ.
ᐊᑐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᑲᒪᒋᔭᔅᓴᖃᖃᑦᑕᓂᐊᕐᖓᑕ ᑐᑭᑖᕈᑎᖃᖃᑦᑕᓂᕐᒥᒃ ᖃᓄᖅ ᑖᒃᑯᐊ ᑮᓇᐅᔭᐃᑦ ᐊᑭᓕᕐᓱᐃᔾᔪᑕᐅᖃᑦᑕᓂᐊᕐᒪᖔᑕ ᓄᓇᓕᖏᓐᓂ. ᐊᒥᓱᓂᑦ ᓇᓖᕌᕋᔅᓴᖃᖃᑦᑕᓂᐊᖅᑐᑦ ᐊᑐᕈᓐᓇᖅᑕᖏᓐᓂᒃ, ᐃᓚᒋᔭᐅᓪᓗᑎᒃ ᐅᑯᐊ, ᑭᓯᐊᓂ ᑖᒃᑯᓄᖓᐃᓐᓇᑲᓪᓚᒃ ᑭᓪᓕᖃᙱᑦᑐᑦ:
- ᐊᖏᓪᓕᕙᓪᓕᐊᔪᑦ ᕿᑭᖅᑕᓂᒃᑯᑦ ᐱᓕᕆᐊᕆᕙᑦᑕᖏᑦ, ᓲᕐᓗ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ;
- ᓄᑖᓂᑦ ᐱᓕᕆᐊᖑᒍᒪᔪᓂᑦ ᐋᖅᑭᓱᖅᑕᐅᓯᒪᔪᓂᑦ ᓄᓇᖅᑲᑎᖏᑕ ᑭᙴᒪᒋᓯᒪᔭᖏᑦ ᒪᓕᑦᑐᒋᑦ;
- ᐋᖅᑭᔅᓱᐃᖃᑦᑕᕐᓂᖅ ᐊᒻᒪᓗ ᐱᔨᑦᑎᕋᐅᑎᖃᖃᑦᑕᕐᓂᖅ ᓇᒻᒥᓂᖅ ᓄᓇᖏᓐᓂ−ᑐᑭᒧᐊᑦᑎᑕᐅᓂᐊᖅᑐᓂᑦ ᐱᓇᓱᐊᕈᑎᒋᓂᐊᖅᑕᖏᓐᓂᒃ, ᐅᕝᕙᓘᓐᓃᑦ,
- ᑐᖅᑯᕐᓯᒪᖃᑦᑕᕐᓗᒋᑦ ᑮᓇᐅᔭᐃᑦ ᐱᖓᓱᓄᑦ ᐊᕐᕌᒍᓄᑦ ᓯᕗᓂᔅᓴᑎᓐᓂ ᐱᓕᕆᐊᔅᓴᐅᓛᖅᑐᓄᑦ ᐊᑐᖅᑕᐅᒍᒫᕐᓂᐊᕐᓗᑎᒃ.
ᕿᑭᖅᑕᓂᒃᑯᑦ ᖁᕕᐊᓱᑦᑐᑦ ᑕᒫᓂ ᐱᓇᓱᐊᕈᓯᕐᒥ ᑲᑎᒪᒍᑎᖃᕈᓐᓇᓚᐅᕐᖓᑕ ᐊᒻᒪᓗ ᓂᕆᐅᑦᑐᑎᒃ ᐃᖅᑲᓇᐃᔮᖑᖃᑦᑕᓂᐊᖅᑐᓂᒃ ᑕᒫᓂ ᐊᕐᕌᒍᒥ.
ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᒍᔅᓯ, ᐊᑏ ᐅᖃᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(P) 867.975.8398 ᐅᕝᕙᓘᓐᓃᑦ ᐊᑭᖃᙱᑐᒃᑯᑦ 1.800.667.2742
