ᑐᑭᓯᓂᕐᓗᑦᑕᐅᓯᒪᓗᐊᕐᓂᖓᓄᑦ ᖃᓄᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᐃᑲᔪᕐᓯᒪᒻᒪᖔᑕ ᑲᖏᖅᑐᒑᐱᒻᒥᐅᑦ ᐊᑭᓴᖅᑐᕐᓂᕆᓚᐅᖅᑕᖏᓐᓂᒃ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᒪᓯᒪᔪᓄᑦ. ᓇᐃᓈᕐᓗᒍ, ᑲᑐᔾᔨᖃᑎᒌᒃᑯᑦ ᐃᑲᔫᑎᖃᔪᔪᑦ ᐅᖓᑖᓃᑦᑐᓂᑦ $100,000 ᑮᓇᐅᔭᓂᑦ ᐃᑲᔫᑎᖃᖅᑐᑎᒃ ᑲᖏᖅᑐᒑᐱᒻᒥᐅᑦ ᒪᓕᒐᖅᑎᒍᑦ ᐊᑭᓴᖅᑐᓂᐊᖅᑎᓪᓗᒋᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᒪᓯᒪᔪᓄᑦ. ᑕᒪᓐᓇ ᐃᓚᒋᔭᐅᓪᓗᓂ, ᐊᐅᓚᑦᑎᕕᑦᑎᒍᑦ, ᐱᔭᕆᐊᑐᔪᑎᒍᑦ ᐊᒻᒪᓗ ᒪᓕᒐᖅᑎᒍᑦ ᐃᑲᔫᑎᒋᓯᒪᔭᖏᓐᓄᑦ ᐃᓄᐃᑦ ᑲᑐᔾᔨᖃᑎᒌᖏᑕ Hᐊᒪᓚᒃᑯᓐᓄᑦ ᑕᒪᑐᒧᖓ ᒪᓕᒐᖅᑎᒍᑦ ᐊᑭᓴᖅᑐᕈᑕᐅᓚᐅᖅᑐᒧᑦ.

ᐃᑉᐸᔅᓴᖅ, ᐃᖅᑲᖅᑐᐃᕕᔾᔪᐊᖅ ᑲᓇᑕᒥ ᑐᑭᑖᕈᑎᒋᓚᐅᖅᑕᖓ ᓇᓗᓇᐃᕈᑕᐅᓚᐅᕐᖓᑦ ᐱᔪᓐᓇᐅᑎᖓᓐᓂᒃ ᐃᓄᐃᑦ ᑐᑭᓯᒋᐊᕐᕕᐅᑦᑎᐊᖃᑦᑕᕆᐊᖃᕐᓂᖏᓐᓂᒃ.

ᑲᖏᖅᑐᒑᐱᒻᒥᐅᑦ Hᐊᒪᓚᒃᑯᖏᑦ ᐊᒻᒪᓗ ᐊᖑᓇᓱᑦᑐᓕᕆᔨᒃᑯᖏᑦ ᓯᕗᓕᕐᓯᓯᒪᓪᓗᑎᒃ ᑕᑯᔅᓴᐅᓚᐅᕐᖓᑕ ᓵᓚᔅᓴᕐᓂᖏᓐᓂᒃ ᐊᑭᓴᖅᑐᕈᑎᒋᓚᐅᖅᑕᖓᓐᓂᒃ ᔫᓂ 2014ᒥ ᑐᑭᑖᕈᑎᖃᓚᐅᕐᓯᒪᑎᓪᓗᒋᑦ ᑲᓇᑕᒥ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ, ᐃᖅᑲᕐᓂᐊᕐᓗᑎᒃ ᖃᐅᔨᓴᕈᓐᓇᕐᓂᕋᐃᓚᐅᕐᓯᒪᒻᒪᑕ ᓴᓇᕕᓕᕆᔨᓂᑦ ᐅᕐᓱᐊᓗᔅᓴᓂᑦ ᒑᓯᔅᓴᓂᓪᓗ.

ᔪᓚᐃ 26ᒥ ᐊᑐᖅᑕᐅᔭᕆᐅᓚᐅᖅᑐᖅ ᑐᑭᑖᕈᑎᒋᓚᐅᖅᑕᖓ ᐃᖅᑲᖅᑐᐃᕕᔾᔪᐊᑉ ᑲᓇᑕᒥ ᐊᑐᕈᓐᓃᑎᑦᑎᓚᐅᕐᖓᑦ 2015ᒥ ᑐᑭᑖᕈᑎᒋᓚᐅᕐᓯᒪᔭᖓᓐᓂᒃ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᑕ ᐊᔪᐃᓐᓇᕆᐊᒃᑲᓐᓂᕈᑕᐅᕙᑦᑐᓄᑦ ᓈᓚᒍᒪᓚᐅᕐᓯᒪᙱᒻᒪᑕ ᑲᖏᖅᑐᒑᐱᒻᒥᐅᑦ Hᐊᒪᓚᒃᑯᖏᑕ ᐊᖑᓇᓱᑦᑐᓕᕆᔨᒃᑯᖏᑕᓗ ᐱᓇᓱᐊᕈᑎᖓᓐᓂᒃ ᐊᑭᓴᖅᑐᓂᕐᒧᑦ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ ᑐᑭᑖᕈᑎᒥᓂᖓᓐᓂᒃ. ᐊᑐᕈᓐᓃᑎᑦᑎᓪᓗᒋᑦ 2015ᒥ ᑐᑭᑖᕈᑕᐅᓚᐅᕐᓯᒪᔪᒥᒃ, ᑲᓇᑕᒥ ᖁᕝᕙᓯᓐᓂᕐᐹᖅ ᐃᖅᑲᖅᑐᐃᕕᒃ ᑐᑭᓯᓇᕐᓯᑎᑦᑎᓚᐅᖅᑐᖅ ᒪᓕᒐᖅᑎᒍᑦ ᐊᑐᖅᑕᐅᒐᔪᑦᑐᒥᒃ ᐊᑐᖅᑕᐅᖃᑦᑕᕆᐊᓕᓐᓂᓪᓗ ᑐᑭᓯᒋᐊᕐᕕᖃᖃᑦᑕᕆᐊᖃᕐᓂᕐᒥᒃ ᓄᓇᖃᖅᑐᑐᖃᐅᔪᓂᑦ ᓄᓇᓕᓐᓂᑦ.

2012ᒥ ᐱᒋᐊᖅᑐᒍ, ᑲᑐᔾᔨᖃᑎᒌᒃᑯᑦ ᐃᑲᔫᑎᖃᓚᐅᕐᓯᒪᔪᑦ $119,674ᓂᑦ ᑮᓇᐅᔭᓂᑦ ᑐᓂᓯᓪᓗᑎᒃ ᑲᖏᖅᑐᒑᐱᒻᒥᐅᑦ Hᐊᒪᓚᒃᑯᖏᓐᓄᑦ ᐊᖑᓇᓱᑦᑐᓕᕆᔨᒃᑯᖏᓐᓄᓪᓗ ᒪᓕᒐᖅᑎᒍᑦ ᐊᑭᓴᖅᑐᓂᐊᖅᑎᓪᓗᒋᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᒪᓯᒪᔪᓄᑦ.

ᑕᕝᕙ ᐊᕕᑦᑐᕐᓯᒪᓪᓗᒋᑦ ᐊᑭᓖᒍᑕᐅᓯᒪᔪᑦ:

• $40,000 ᐃᖅᑲᖅᑐᐃᕕᒻᒧᑦ ᐊᑭᓕᐅᑎᒋᒋᐊᓖᑦ
• $57,509 ᐃᓕᓐᓂᐊᓂᕐᒧᑦ ᑐᑭᓯᒋᐊᕐᕕᖃᕐᓂᒧᓪᓗ ᓄᓇᓕᓐᓂᑦ ᓄᐊᑦᑎᓪᓗᑎᒃ ᑐᑭᓯᐅᒪᔾᔪᑎᔅᓴᓂᑦ ᒪᓕᒐᓕᕆᔾᔪᑕᐅᔪᖅ ᐱᔾᔪᑎᒋᓪᓗᒍ
• $12,165 ᐃᖏᕐᕋᔾᔪᑎᓄᑦ ᑲᑎᒪᔭᖅᑐᓂᐊᖅᑐᑦ Hᐊᒪᓚᒃᑯᓃᙶᕐᓯᒪᔪᑦ ᐊᖑᓇᓱᑦᑐᓕᕆᔨᒃᑯᓃᙶᕐᓯᒪᔪᓪᓗ ᐃᖅᑲᖅᑐᐃᕕᒻᒧᑦ ᓈᓚᒋᐊᖅᑐᕈᓐᓇᓂᐊᕐᖓᑕ

ᐊᒥᓲᓂᖏᑦ ᐃᓚᓕᐅᔾᔨᓯᒪᙱᑦᑐᑦ ᐊᑭᖏᓐᓂᒃ ᐊᑭᓕᕐᓱᐃᔾᔪᑕᐅᓯᒪᔪᓂᑦ ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑕ ᐃᖅᑲᓇᐃᔭᐅᑎᒋᓚᐅᖅᑕᖏᑦ ᑕᒪᑐᒧᖓ ᑐᕌᖓᔪᒥᒃ. ᐃᓚᓕᐅᔾᔨᓯᒪᙱᒻᒥᔪᑦ ᐊᑭᖏᓐᓂᒃ ᐊᑭᓕᕐᓱᐃᔾᔪᑕᐅᓯᒪᔪᓂᑦ ᐊᖏᔪᖅᑳᑉ ᐃᖅᑲᓇᐃᔮᕆᓚᐅᖅᑕᖏᓐᓄᑦ ᑕᒪᓐᓇ ᒪᓕᒐᓕᕆᔾᔪᑕᐅᔪᖅ ᐱᔾᔪᑎᒋᓪᓗᒍ.

ᐊᒻᒪᓗᑦᑕᐅᖅ, ᑮᓇᐅᔭᐃᑦ ᐊᑭᓕᐅᑎᒥᓃᑦ ᑲᑐᔾᔨᖃᑎᒌᒃᑯᓐᓂ ᒪᓕᒐᓕᕆᔾᔪᑕᐅᔪᒧᑦ, ᐃᓄᐃᑦ ᑲᑐᔾᔨᖃᑎᒌᖏᑦ ᐊᐅᓚᑦᑎᕕᑦᑎᒍᑦ ᒪᓕᒐᓕᕆᕕᑦᑎᒍᑦ ᐃᑲᔪᕐᓰᓚᐅᕐᓂᖏᓐᓂᒃ ᑲᖏᖅᑐᒑᐱᒻᒥᐅᓂᑦ ᑕᒪᑐᒥᖓ ᐊᑭᓴᖅᑐᕈᑎᖃᖅᑎᓪᓗᒋᑦ.

ᑕᐃᒫᒃ ᓇᓗᓇᐃᕐᓯᓚᐅᕐᖓᑕ ᐃᖅᑲᖅᑐᐃᕕᔾᔪᐊᕐᒥ ᑲᓇᑕᒥ ᑎᑎᖅᑲᑎᒍᑦ ᑐᑭᑖᕈᑎᖓᓂ, ᑲᑐᔾᔨᖃᑎᒌᒃᑯᑦ ᑲᑐᔾᔨᖃᑎᖃᖅᑐᑎᒃ ᐊᓯᖏᓐᓂᒃ ᐃᓄᓐᓄᑦ ᑲᑐᔾᔨᖃᑎᒌᖑᔪᓂᑦ ᓲᕐᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦ (ᑐᙵᕕᒃᑯᑦ), ᑐᓂᓯᓚᐅᕐᓯᒪᔪᑦ ᐊᒥᓱᓂᑦ ᑎᑎᖅᑲᓂᑦ ᐅᖃᐅᓯᔅᓴᖏᓐᓂᒃ ᐃᖅᑲᖅᑐᐃᕕᒻᒧᑦ ᐅᖃᐅᓯᖃᖅᑐᑎᒃ ᑐᑭᓯᒋᐊᕐᕕᐅᑦᑎᐊᖃᑦᑕᕆᐊᖃᕐᓂᖏᓐᓂᒃ ᐊᑑᑎᖃᑦᑎᐊᖅᑐᒥᒃ ᐃᓄᐃᑦ.

“ᐊᕙᑎᓕᕆᓂᕐᒥᒃ ᖃᐅᔨᓴᕐᓂᖃᖅᑎᓪᓗᒋᑦ, ᑲᖏᖅᑐᒑᐱᒻᒥᐅᑦ ᐊᒻᒪᓗ ᐃᓄᓐᓄᑦ ᑲᑐᔾᔨᖃᑎᒌᒡᒍᑏᑦ ᑎᑎᕋᖃᑦᑕᔪᔪᑦ ᐅᖃᐅᓯᔅᓴᖏᓐᓂᒃ ᐆᒻᒪᖅᑯᓯᕆᓂᕐᒧᑦ ᑲᑎᒪᔨᓄᑦ, ᓇᓗᓇᐃᕐᓯᕙᑦᑐᑎᒃ ᑐᑭᓯᒋᐊᕐᕕᖃᑦᑎᐊᕐᓯᒪᙱᓗᐊᕐᓂᖏᓐᓂᒃ ᐊᒻᒪᓗ ᐃᓱᒫᓘᑎᖃᕐᓂᕋᖅᑐᑎᒃ ᖃᐅᔨᓴᕐᓂᐅᒍᒪᔫᑉ ᒥᔅᓵᓄᑦ,” ᑕᐃᒫᒃ ᓇᓗᓇᐃᕐᓯᒪᔪᖅ ᑎᑎᖅᑲᑎᒍᑦ ᑐᑭᑖᕈᑎᒋᓚᐅᖅᑕᖓᓐᓂ.

ᐃᓄᓐᓄᑦ ᑲᑐᔾᔨᖃᑎᒌᓕᒫᑦ ᐃᖅᑲᓇᐃᔮᔅᓴᖃᖅᑐᐃᓐᓇᐅᓚᐅᕐᖓᑕ ᐊᑭᓴᖅᑐᓂᕐᒥᒃ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᒪᓯᒪᔪᓄᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ.

ᑲᖏᖅᑐᒑᐱᒻᒥᐅᑦ Hᐊᒪᓚᒃᑯᖏᑦ ᐊᖑᓇᓱᑦᑐᓕᕆᔨᒃᑯᖏᓪᓗ ᓯᕗᓕᕐᓯᓚᐅᕐᖓᑕ ᓵᙵᑦᑎᓪᓗᑎᒃ ᒪᓕᒐᖅᑎᒍᑦ ᐊᑭᓴᖅᑐᕈᑎᖓᓂᒃ, ᓄᓇᕗᑦ ᑐᙵᕕᒃᑯᑦ ᓇᓗᓇᐃᖅᑕᐅᓯᒪᓪᓗᑎᒃ ᐃᓄᓐᓄᑦ ᑲᑐᔾᔨᖃᑎᒌᖑᓪᓗᑎᒃ ᑖᒃᑯᐊᖑᓚᐅᕐᖓᑕ ᐃᑲᔪᕐᓰᓚᐅᖅᑐᑦ ᒪᓕᒐᖅᑎᒍᑦ ᑲᒪᒋᔭᐅᓂᖓᓂᒃ ᐃᓕᓴᕆᔭᐅᓯᒪᓪᓗᑎᒃ ᐃᑲᔪᖅᑎᐅᓚᐅᖅᑐᑦ. ᑕᐃᒫᓪᓗ, ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔮᖃᓪᓗᐊᑕᓚᐅᖅᑐᓪᓕ ᑲᔪᓯᑎᑦᑎᓂᕐᒥᒃ ᐃᖅᑲᓇᐃᔭᖃᑎᖃᖃᑦᑕᕐᓂᖏᓐᓂᒃ ᓄᓇᓕᓐᓂᑦ ᓇᓗᓇᐃᖅᑐᐃᓂᕐᒥᒃ ᐊᒻᒪᓗ ᓄᐊᑦᑎᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᑐᑭᓯᒍᑕᐅᓯᒪᔪᑦ ᐃᓚᓕᐅᔾᔭᐅᓂᐊᕐᖓᑕ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥᒃ ᖃᐅᔨᓴᕐᓂᕐᒥ, ᐃᓚᒋᔭᐅᓗᓂ ᓇᓗᓇᐃᖅᑐᐃᓂᕐᒥᒃ ᑕᒪᒃᑯᓂᖓ ᐊᕙᑎᑦᑎᓃᑦᑐᓂᑦ ᐃᓄᓐᓄᑦ ᐊᓐᓂᕆᔭᐅᓗᐊᖅᑐᓂᑦ.

ᒫᓐᓇ, ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖃᑎᓖᑦ ᓄᓇᖃᖅᑳᕐᓯᒪᔪᓕᕆᔨᓂᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᓕᕆᔨᓂᑦ (ᐃᓄᓕᕆᔨᑐᖃᒃᑯᓐᓂ) ᑲᓇᑕᒥ, ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐊᒻᒪᓗ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᓂᑦ ᓯᕗᓕᕐᓯᓪᓗᑎᒃ ᑲᒪᒋᔭᖃᕐᓂᐊᓂᕐᒧᑦ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕐᓂᕐᒥ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ.

ᖃᐅᔨᒪᔪᖃᙱᒻᒪᑦ ᖃᓄᑎᒋ ᓱᕐᕋᐃᑎᒋᒐᔭᕐᒪᖔᖅ ᐃᖅᑲᕐᓂᐊᕐᓂᖅ ᖃᐅᔨᓴᕐᓗᑎᒃ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ ᐊᒻᒪᓗ ᑲᑐᔾᔨᖃᑎᒌᒃᑯᑦ ᐅᑉᐱᕈᓱᑦᑐᑎᒃ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕐᓂᖅ ᐃᑲᔫᑎᖃᕐᓂᐊᕆᐊᔅᓴᖓᓂᒃ ᖃᐅᔨᓴᖅᑐᓕᕆᔨᑎᒍᑦ ᖃᐅᔨᒪᔭᐅᙱᑦᑐᓂᑦ ᖃᐅᔨᒪᔭᖏᓐᓂᒃ ᑖᒃᑯᐊ ᐊᐱᖅᑯᑕᐅᓯᒪᔪᑦ ᐱᔾᔪᑎᒋᓪᓗᒋᑦ. ᑕᒪᓐᓇ ᐃᖅᑲᓇᐃᔮᖑᓂᐊᖅᑐᖅ ᐃᓚᒋᔭᐅᒻᒪᑦ ᐋᖅᑭᓱᖅᑕᐅᔭᕆᐊᓕᓐᓄᑦ ᓄᐊᑦᑎᑎᓪᓗᒋᑦ ᑐᑭᓯᐅᒪᔾᔪᑎᔅᓴᓂᑦ ᐊᑦᑐᐃᕙᑦᑐᓂᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓲᕐᓗ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᓐᓄᑦ.

ᑕᒪᓐᓇᓕ ᒪᓕᒐᓕᕆᔾᔪᑕᓚᐅᖅᑐᖅ ᐊᓂᒍᕋᓗᐊᖅᑎᓪᓗᒍ, ᐱᕙᓪᓕᐊᓂᐊᕐᖓᑕ ᓱᓕ ᐅᑭᐅᖅᑕᖅᑐᒥ. ᓄᐊᑦᑎᓗᑎᒃ ᑕᒪᒃᑮᓐᓂᒃ ᖃᐅᔨᓴᖅᑐᓕᕆᔨᓂᑦ ᐊᒻᒪᓗ ᖃᐅᔨᒪᔭᑐᖃᕆᔭᐅᔪᓂᑦ, ᑲᑐᔾᔨᖃᑎᒌᒃᑯᑦ ᓴᐴᓗᑕᕆᓂᐊᖅᑕᖏᓐᓂᒃ ᐃᓄᐃᑦ ᐋᖅᑭᔅᓱᐃᕗᑦ ᐅᐸᓗᖓᐃᕐᓯᒪᑦᑎᐊᓂᕐᓴᐅᖁᓪᓗᒋᑦ ᑕᐃᒫᒃ ᐊᔾᔨᐸᓗᖏᓐᓂᒃ ᑲᒪᒋᔭᖃᖃᑦᑕᓂᐊᖅᑎᓪᓗᒋᑦ ᓯᕗᓂᔅᓴᑎᓐᓂ.