ᐅᓪᓗᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᑎᓕᐅᖅᑐᑦ ᑎᑎᖃᒥᒃ ᑐᑭᓯᖃᑎᒌᒍᑎᒥᖕᓂᒃ ᓄᓇᕗᑦ ᐅᑭᐅᖅᑕᖅᑐᒧᑦ ᓯᓚᖅᑐᖅᓴᕐᕕᒃ ᐅᑯᐊᓗ ᐋᕿᒃᓱᐃᓂᐊᖅᑐᑦ ᐃᑲᔫᑎᓂᐊᖅᑐᓂᒃ ᐱᔭᕆᐅᖅᓴᑎᑦᑎᓗᑎᒃ ᐊᒻᒪᓗ ᖃᐅᔨᓴᕐᓗᑎᒃ, ᑕᒫᓃᓕᖅᑎᑦᑎᓗᑎᒃ ᓄᑖᑦ ᐱᓕᕆᔾᔪᑕᐅᓕᖅᑐᑦ ᐃᓕᓐᓂᐊᕈᑎᑦ ᑐᕌᖅᑐᖅ ᐃᓄᖕᓄᑦ ᖁᑎᒃᑐᕐᒥᐅᓄᑦ. ᐅᓇ ᑐᑭᖃᖅᑐᖅ ᐃᓕᓐᓂᐊᒐᒃᓴᒃᑲᓐᓃᑦ, ᐊᖏᕐᕋᒥ ᖃᓐᓂᓐᓂᖅᓴᐃᑦ, ᐃᓄᖕᓄᑦ.
ᐅᓇ ᐃᖏᕐᕋᔾᔪᑖ ᑕᒪᑐᒧᖓ ᐃᖏᕐᕋᓯᑎᑕᐅᓯᒪᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᓄᐃᑦ ᖃᐅᔨᓴᖅᓯᓂᕐᒧᑦ ᐊᒻᒪᓗ ᐱᔭᕆᐅᖅᓴᕕᖓ ᒥᑦᑎᒪᑕᓕᖕᒥ, ᒪᑐᐃᕈᒫᖅᑐᖅ 2026. ᐅᓇ ᓯᕗᓪᓕᖅᐹᖅ ᑕᒪᐃᑦᑐᓄᑦ ᐃᒡᓗ ᖁᑎᒃᑐᕐᒥᐅᓂ ᐱᔨᑦᑎᕋᕐᓂᐊᖅᑐᖅ ᐃᓂᖃᕐᓗᑎᒃ ᐱᕕᖃᕐᑎᑦᑎᕙᓪᓕᐊᓗᓂ, ᐃᓕᓐᓂᐊᕈᑎᑦ ᐊᒻᒪᓗ ᐱᔭᕆᐅᖅᓴᐅᑎᑦ ᐊᑐᖅᑕᐅᔪᓐᓇᕐᓂᖅᓴᐅᓕᕐᓗᑎᒃ ᑕᒪᐃᓐᓂ ᐃᓄᐃᑦ ᓄᓇᖓᓂ. ᐅᓇ ᐃᒡᓗ ᓴᖕᖏᓂᖅᑖᖅᑎᑦᑎᓂᐊᖅᑐᖅ ᐃᓄᖕᓂᒃ ᐃᓕᑉᐸᓪᓕᐊᔪᓄᑦ ᓄᑖᓂᒃ ᓴᓇᕐᕈᑎᒃᓴᓄᑦ, ᐃᓚᐅᑎᒃ ᐱᒻᒪᕆᐅᔪᓂᒃ ᖃᐅᔨᓴᖅᑐᓂ, ᐊᒻᒪᓗ ᐃᓕᓐᓂᐊᖅᑎᑕᐅᓗᑎᒃ ᐊᒻᒪᓗ ᐱᔭᕆᐅᖅᓴᑎᑕᐅᓗᑎᒃ ᐃᖅᑲᓇᐃᔮᑦᑎᐊᕙᖕᓂᒃ ᐊᓯᖑᖅᐸᓪᓕᐊᖏᓐᓇᖅᑎᓪᓗᒍ ᒪᑭᒪᔾᔪᑎᒃᓴᕗᑦ.
ᐃᑲᔪᖅᑎᒋᓪᓗᒋᑦ ᓄᓇᕗᑦ ᐅᑭᐅᖅᑕᖅᑐᒧᑦ ᓯᓚᖅᑐᖅᓴᕐᕕᒃ, ᐅᓇ ᑐᑭᓯᖃᑎᒌᒍᑎᓄᑦ ᑎᑎᖃᖓ ᐋᕿᒃᑕᐅᔪᖅ ᐱᓕᕆᓂᐊᖅᑕᖏᓐᓄᑦ ᓄᑖᓄᑦ ᐊᒻᒪᓗ ᓄᑖᑦ ᐱᓕᕆᔾᔪᑕᐅᓕᖅᑐᓄᑦ ᐃᓕᓐᓂᐊᕈᑎᑦ ᑐᓂᔭᐅᓂᐊᖅᑐᑦ ᖃᐅᔨᓴᕐᕕᒃ ᐊᒻᒪᓗ ᐱᔭᕆᐅᖅᓴᕕᖕᒧᑦ. ᐅᓇ ᓄᑖᖅ ᐃᒡᓗ ᐱᔭᕆᐅᖅᓴᑎᑦᑎᓂᐊᖅᑐᖅ ᐱᒻᒪᕆᐅᔪᒥ ᓄᓇᒥ ᓲᕐᓗ ᓱᕈᖅᑕᐅᑦᑕᐃᓕᑎᑦᑎᓂᕐᒧᑦ ᒪᑭᒪᔾᔪᑎᒃᓴᑦ, ᐃᓄᐃᑦ ᑐᑯᒧᐊᒃᑎᑦᑎᓂᖏᑦ, ᐅᕋᒃᓯᐅᖅᑐᑦ, ᐃᓄᐃᑦ ᖃᐅᔨᒪᔭᑐᖃᖏᑦ, ᐊᒻᒪᓗ ᖃᐅᔨᓴᕐᓂᖅ ᐊᒻᒪᓗ ᓄᑖᑦ ᐱᓕᕆᔾᔪᑕᐅᓕᖅᑐᑎᒍᑦ.
ᓯᕗᓂᒃᓴᑦᑎᓐᓂ, ᑕᑯᔭᐅᔪᒪᔪᑦ ᐅᓇ ᐃᒡᓗ ᑐᓂᓯᓯᒪᔪᖅ ᐃᓕᓐᓂᐊᕐᕕᒃᔪᐊᖅᑎᑐᑦ – ᐳᖅᑐᓕᓃᑦ ᐃᓕᓐᓂᐊᕈᑎᑦ ᐊᒻᒪᓗ ᐱᔭᕆᐅᖅᓴᐅᑎᑦ ᓲᕐᓗ ᐃᓅᓕᒪᐅᑎᑦ, ᐊᐅᓚᐅᑎᓕᕆᓂᖅ, ᐊᒻᒪᓗ ᐱᔭᕐᓂᓐᖏᑦᑐᓕᕆᓂᖅ ᖃᕆᓴᐅᔭᕐᑎᒍᑦ – ᐊᑐᖅᑕᐅᒋᐊᖃᒻᒪᕆᒃᑐᑦ ᓄᓇᒥ ᑕᐃᑲᓂ ᐃᓄᖕᓂᒃ ᐃᖅᑲᓇᐃᔭᖅᑎᖃᕐᓂᖅᓴᐅᓗᓂ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᖃᐃᖁᔨᕗᑦ ᐃᓕᓐᓂᐊᕐᕕᒃᔪᐊᓂ, ᑎᒥᐅᔪᓂᒃ ᐊᒻᒪᓗ ᐊᐅᓚᑦᓯᔨᓂᑦ ᐱᓕᕆᖃᑕᐅᔪᓐᓇᖅᑐᓂᒃ ᐅᕙᑦᑎᓐᓂ ᑐᓂᓯᓂᐊᖅᑐᓂᒃ ᐳᖅᑐᓂᖅᓴᒥᒃ ᐃᓕᓐᓂᐊᕈᑎᓂᒃ. ᓴᓇᖃᑎᒌᑦᑎᐊᕐᓂᖅᓴᐅᒍᑦᑕ ᑲᑐᔾᔨᓗᑕ, ᐱᕕᖃᕐᑎᑦᑎᓂᖅᓴᐅᓂᐊᖅᑐᒍᑦ ᓴᕿᑦᑎᓗᑕ ᐃᓄᖕᓂᑦ-ᐊᐅᓚᑕᐅᔪᖅ ᖃᐅᔨᓴᕐᓂᖅ, ᐱᔭᕆᐅᖅᓴᑎᑦᑎᓂᖅ, ᐊᒻᒪᓗ ᐃᓕᓐᓂᐊᖅᑎᑦᑎᓂᖅ.
ᐅᓇ ᑎᑎᕋᖅᓯᒪᔪᖅ ᑐᑭᓯᖃᑎᒌᒍᑎᒥᖕᓂᒃ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒃ ᐱᒋᐊᕐᓂᑐᐃᓐᓇᖅ. ᑲᑐᔾᔨᓗᑕ, ᐋᕿᒃᓱᐃᓂᐊᖅᑐᒍᑦ ᓴᖕᖏᔪᒥᒃ ᓯᕗᓂᒃᓴᖓ ᑕᐃᑲᓂ ᐃᓄᐃᑦ ᐊᐅᓚᑦᑎᓗᑎᒃ ᐃᓕᓐᓂᐊᖅᑐᓕᕆᓂᕐᒥᒃ ᐊᒻᒪᓗ ᒪᑭᒪᓇᓱᐊᕈᑎᑦ ᐱᕈᖅᐸᓪᓕᐊᑎᓪᓗᒋᑦ.
ᐅᓇ $34 ᒥᓕᐊᓐ ᖃᐅᔨᓴᕐᕕᒃ ᐊᒻᒪᓗ ᐱᔭᕆᐅᖅᓴᕕᒃ ᐃᒡᓗ ᑮᓇᐅᔭᒃᓴᖃᖅᑎᑕᐅᔪᖅ ᓄᓘᔮᖕᓂ ᐅᔭᕋᖕᓂᐊᕐᕕᖕᒥᑦ, ᑲᓇᑕᐅᑉ ᐅᑭᐅᖅᑕᖅᑐᐊᓂ ᒪᑭᒪᓇᓱᐊᕈᑎᓂᒃ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑖ, ᐸᕙᓐᓛᓐᑦ ᓴᕕᕋᔭᒃᓴᓂᒃ ᐅᔭᕋᒃᓯᐅᕐᕕᒃ ᑯᐊᐳᕆᓴᓐ, ᓄᓇᖅᑲᖅᑳᖅᓯᒪᔪᑦ ᐱᔨᑦᑎᕋᖅᑎᖏᑦ ᑲᓇᑕ, ᓄᓇᒥᐅᑕᓕᕆᔨᒃᑯᑦ ᑲᓇᑕ, ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓ.
ᐅᑯᐊ ᖃᑭᔾᔪᑕᐅᓇᓱᐊᖅᑐᑦ ᐱᓯᒪᓂᐊᖅᑐᑦ ᐊᖏᖅᑕᐅᓯᒪᔪᓂᒃ ᐃᓄᖕᓄᑦ ᐃᑲᔫᑎᒃᓴᑦ ᐊᒻᒪᓗ ᐱᕕᖃᕐᑎᑦᑎᔪᑦ ᐊᔪᖏᑦᑎᐊᕐᓂᐊᕐᒪᑕ ᓄᓇᒥᖕᓂ.
ᑐᓴᕋᓱᖃᑦᑕᕐᓂᐊᖅᐳᓯ ᖃᓄᐃᓕᖓᓕᕐᒪᖔᑕ ᐅᓇ ᖁᕕᐊᓇᖅᑐᖅ ᓴᕿᑎᑕᐅᕙᓪᓕᐊᓂᖓ!
