ᑲᑐᔾᔨᖃᑎᒌᒃᑯᑦ ᐱᖃᑕᐅᔪᔪᑦ 27ᒋᓕᖅᑕᖓᓐᓂ ᐊᕐᕌᒍᑕᒫᑦ ᓄᓇᕗᒥ ᐃᖅᑲᓇᐃᔭᕐᕖᑦ ᑕᑯᔅᓴᐅᑎᑕᐅᓂᖏᓐᓂᒃ ᓯᑎᐱᕆ 18ᒥ-20ᒧᑦ, 2018, ᐅᑭᐅᖅᑕᖅᑐᒥ ᐱᙳᐊᕐᕕᐊᓗᒻᒥ ᐃᖃᓗᓐᓂ, ᓄᓇᕗᒥ. ᑕᕝᕙᓂ ᑕᑯᔅᓴᐅᑎᑦᑎᓂᕐᒥ ᐅᑭᐅᖅᑕᖅᑐᒥ ᑲᓇᑕᒥ ᐊᖏᓂᕐᐹᖑᓪᓗᓂ ᐊᕐᕌᒍᑕᒫᑦ ᐃᖅᑲᓇᐃᔭᕐᕕᒡᒍᑎᓂᑦ ᐱᓕᕆᖃᑎᒌᑎᑦᑎᓂᕐᒧᑦ, ᑲᑎᖃᑎᒌᑎᑦᑎᓲᖑᒻᒪᑕ, ᑲᑎᑎᑦᑎᕙᑦᑐᑎᒃ ᐃᓘᓐᓇᖏᓐᓂᒃ ᒐᕙᒪᒃᑯᓃᙶᕐᓯᒪᔪᓂᑦ, ᐃᓄᐃᑦ ᑎᒥᖁᑎᖏᓐᓂᒃ, ᓄᓇᕗᒥ ᖃᓪᓗᓈᑦ ᓄᓇᖓᓐᓂᓪᓗ ᐃᖅᑲᓇᐃᔭᕐᕕᓐᓂᑦ, ᑮᓇᐅᔭᓂᑦ ᐱᕈᕐᓴᐃᔨᓂᑦ, ᓇᒻᒥᓂᖃᖅᑎᓂᓪᓗ.

ᑲᑎᒪᓃᑦ ᐱᔾᔪᑎᖃᓗᐊᖃᑦᑕᓚᐅᖅᑐᑦ ᑲᑎᒪᒍᑎᖃᖅᑐᑎᒃ ᒪᑯᓂᖓ ᓲᕐᓗ ᑮᓇᐅᔭᓕᐅᕋᓱᐊᕈᑎᔅᓴᓄᑦ ᐃᑲᔫᑏᑦ ᐱᓇᓱᐊᕋᔅᓴᐃᓪᓗ, ᓄᑖᖑᓂᕐᓴᓂᑦ, ᐆᒻᒪᖅᑯᓯᕆᓂᕐᒥᒃ, ᐃᖃᓗᓕᕆᓂᕐᒥᒃ, ᐊᒻᒪᓗ ᑲᑐᔾᔨᖃᑎᒌᑦᑐᓄᑦ ᑕᒪᒃᑮᓐᓂᒃ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ.

ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ ᐅᓂᒃᑳᓚᐅᖅᑐᖅ ᑲᑐᔾᔨᖃᑎᒌᕝᕕᓄᑦ ᖃᓄᐃᓕᐅᖃᑦᑕᕐᒪᖔᑕ ᓯᕗᒧᐊᑦᑎᑦᑎᕙᓪᓕᐊᓪᓗᑎᒃ ᐃᓄᓐᓂᑦ ᐃᖅᑲᓇᐃᔭᕐᐸᑦᑐᓂᑦ ᓄᓇᕗᒥ. ᐅᓂᒃᑳᖃᓚᐅᖅᑐᖅ ᐱᔾᔪᑎᖃᓗᐊᖅᑐᓂ ᑲᑐᔾᔨᖃᑎᒌᒃᑯᑦ ᐱᓕᕆᐊᖅᑖᖅᑲᐅᖓᑕ ᒥᔅᓵᓄᑦ ᐃᓄᐃᑦ ᐅᐊᑦᑎᔩᑦ−ᐆᑦᑐᕋᐅᑕᐅᓪᓗᓂ ᐱᓕᕆᐊᑉ ᒥᔅᓵᓄᑦ ᐃᒃᐱᐊᕐᔪᒻᒥ, ᐊᑎᓕᐅᕐᓯᕕᒋᕙᓪᓕᐊᖏᓐᓇᑕᑦᑎᓂᓪᓗ ᑐᑦᑕᕐᕕᒻᒥᒃ, ᑖᓐᓇ ᐱᓇᓱᐊᕈᑎᕗᑦ ᑲᓲᑎᖃᑦᑕᓂᐊᕐᖓᑕ ᕿᑭᖅᑕᓂ ᓄᓇᓖᑦ ᐃᓄᐃᑦ ᐃᖅᑲᓇᐃᔮᓄᑦ, ᐃᖅᑲᓇᐃᔮᕇᓐᓇᕈᓐᓇᖅᑕᖏᓐᓄᑦ ᐊᒻᒪᓗ ᐃᓕᓐᓂᐊᕋᔅᓴᓄᑦ, ᕿᑭᖅᑕᓂ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᑎᑦᑎᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᖅ (ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ), ᐊᒻᒪᓗ ᒥᑦᑎᒪᑕᓕᒻᒥ ᖃᐅᔨᓴᖃᑦᑕᓂᕐᒧᑦ ᐱᓕᕆᐊᕐᒥ.

ᐅᓂᒃᑳᕆᓚᐅᖅᑕᖏᑦ ᑐᓴᕐᓂᕆᔭᐅᑦᑎᐊᓚᐅᖅᑐᑦ ᐊᒥᓱᓄᑦ ᑲᑐᔾᔨᖃᑎᒌᓄᑦ, ᐃᖅᑲᓇᐃᔭᕐᕕᐅᔪᓄᑦ ᑭᒃᑯᑐᐃᓐᓇᓄᓪᓗ ᑲᑐᔾᔨᖃᑎᒌᒃᑯᑦ ᐅᐸᑦᑕᐅᖃᑦᑕᓕᓚᐅᖅᑐᑦ ᑐᑭᓯᑦᑎᐊᕈᒪᔪᓄᑦ ᐃᖅᑲᓇᐃᔮᕆᕙᑦᑕᑦᑕ ᒥᔅᓵᓄᑦ ᐱᓇᓱᐊᕋᔅᓴᐃᓪᓗ ᒥᔅᓵᓄᑦ ᑲᓲᑎᓂᐊᕐᖓᑕ ᐱᓕᕆᐊᕆᕙᑦᑕᑎᓐᓄᑦ.

ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᑐᓴᐅᒪᑎᑦᑎᒋᐊᔪᒻᒥᔪᑦ ᐃᓄᓕᒫᓂᑦ ᑲᑐᔾᔨᖃᑎᒌᒃᑯᑦ ᓵᖓᓂ ᐱᓕᕆᐊᕆᕙᑦᑕᑦᑕ ᒥᔅᓵᓄᑦ ᐊᒻᒪᓗ ᓄᑖᑦ ᐱᓇᓱᐊᒐᐅᔪᑦ ᒥᔅᓵᓄᑦ.

ᐊᓕᐊᓇᐃᒍᓱᐃᓐᓇᓲᖑᒐᑦᑕ ᓄᓇᕗᒥ ᐃᖅᑲᓇᐃᔭᕐᕖᑦ ᑕᑯᔅᓴᐅᑎᑕᐅᓂᖏᓐᓂ ᐊᒻᒪᓗ ᖁᔭᓕᓪᓗᑕ ᐱᖃᑕᐅᒍᓐᓇᓚᐅᕋᑦᑕ 2018ᒥ. ᓂᕆᐅᓕᕆᕗᒍᓪᓕ ᐊᕐᕌᒎᓛᖅᑐᖅ ᑕᑯᔅᓴᐅᑎᑦᑎᓂᐅᓛᖅᑐᒥᑦ.