ᐃᖃᓗᐃᑦ, ᓄᓇᕗᑦ, ᐄᐳᓗ 4, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐱᓇᓱᐊᕈᑎᖏᑦ ᐃᑲᔪᖅᑐᑎᒃ ᓂᕿᔅᓴᖃᑦᑎᐊᖁᔨᓪᓗᑎᒃ ᐊᒻᒪᓗ ᐃᑲᔪᕈᒪᓪᓗᑎᒃ ᐊᓂᑦᑕᐃᓕᑲᐃᓐᓇᕆᐊᖃᖅᑎᓪᓗᒋᑦ ᓄᓇᓖᑦ ᐊᑑᑎᕕᐅᑎᓪᓗᒋᑦ ᓄᕙᕐᔪᐊᓇᖅᑐᒧᑦ ᑲᔪᓯᕗᑦ ᓂᕿᑖᕈᑎᔅᓴᖃᖅᑎᑎᓪᓗᑎᒃ ᐊᐅᓱᐃᑦᑐᕐᒥᐅᓄᑦ.

ᕿᑭᖅᑕᓂᒃᑯᑦ, ᑲᑐᔾᔨᖃᑎᖃᖅᑐᑎᒃ ᐅᑭᐅᖅᑕᖅᑐᒥ ᐃᓚᒌᔅᓴᒃᑯᑦ ᑯᐊᐸᒃᑯᖏᓐᓂ, ᓂᕿᑖᕈᑎᔅᓴᓂᑦ ᐸᔪᑦᑎᕆᓂᐊᖅᑐᑦ $250ᓂᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐃᓚᒌᓄᑦ ᐊᐅᓱᐃᑦᑐᕐᒥᐅᓄᑦ ᐱᒋᐊᕐᓗᑎᒃ ᐄᐳᓗ 4ᒥ, 2022.

ᑐᖏᓕᐊᓂ ᓂᐅᕕᐅᑎᔅᓴᐃᑦ $250 ᐸᔪᑦᑎᕆᒍᑕᐅᓛᖅᑐᑦ ᐱᒋᐊᕐᓗᑎᒃ ᑕᒫᓂ ᖃᓂᒋᔭᖓᓂᓘᓐᓃᑦ ᐄᐳᓗ 18, 2022.

“ᓄᓇᕗᑦ ᒐᕙᒪᒃᑯᖏᑦ ᒪᑐᐃᕐᓯᕙᓪᓕᐊᓕᕋᓗᐊᖅᑎᓪᓗᒋᑦ ᑭᓪᓕᓕᐅᕈᑕᐅᓯᒪᔪᓂᑦ ᓄᓇᕗᒥ, ᕿᑭᖅᑕᓂᒃᑯᑦ ᓱᓕ ᐃᑲᔪᖃᑦᑕᓂᐊᕐᖓᑕ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ. ᐊᐅᓱᐃᑦᑐᕐᒥᐅᑉ ᑭᖑᓪᓕᕐᐹᖑᓪᓗᑎᒃ ᕿᑭᖅᑕᓂ ᓄᓇᓕᓐᓂᑦ ᐊᑑᑎᕕᐅᒻᒪᑕ ᓄᕙᕐᔪᐊᓇᖅᑐᒧᑦ ᐊᒻᒪᓗ ᐱᒃᑯᒋᓪᓗᑎᒍ ᓄᓇᖅᑲᑎᖏᓐᓂᒃ ᐊᑦᑕᓇᖅᑐᒦᑦᑕᐃᓕᑎᑦᑎᒻᒪᑕ ᒫᓐᓇ ᓄᓇᕐᔪᐊᓕᒫᒥ ᖃᓂᒪᓇᖅᑐᖅᑕᖃᕐᓂᖓᓂ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ.

“ ᐊᑦᑕᓇᙱᑦᑐᒦᒋᐊᖃᕐᓂᖏᑦ ᓄᓇᓕᓐᓂᑦ ᒥᑭᑦᑑᑕᐅᓂᕐᓴᓂᑦ ᐊᒻᒪᓗ ᐊᓯᔾᔨᐸᓪᓕᐊᖏᓐᓇᖅᑐᓂᓪᓗ ᓄᓇᓕᖁᑎᕗᑦ ᐃᓱᒫᓘᑎᒋᓗᐊᕋᑦᑎᒍ ᖃᓄᑐᐃᓐᓇᖅ ᓯᐊᒻᒪᕐᕕᐅᓂᖅᑲᑕ. ᐊᐅᓱᐃᑦᑐᕐᒥᐅᑦ ᓱᓕ ᒪᓕᖃᑦᑕᓂᐊᖅᑐᑦ ᐊᑐᖁᔨᔾᔪᑕᐅᓯᒪᔪᓂᑦ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒧᑦ ᓯᐊᒻᒪᐸᓪᓕᐊᖁᓇᒍ ᓄᕙᕐᔪᐊᓇᖅᑐᖅ”. ᐅᖃᖅᑐᖅ ᕿᑭᖅᑕᓂᒃᑯᓐᓄᑦ ᑲᑎᒪᔨᐅᖃᑕᖅ ᐊᐅᓱᐃᑦᑐᕐᒥᐅᓂᑦ, ᓚᐃᓴ ᓂᖏᐅᖅ.

ᐃᓄᐃᑦ ᐊᒥᓲᓪᓗᑎᒃ ᐃᓪᓗᒥᐅᖃᑎᒌᑦᑐᒡᒍᑏᑦ ᑕᕝᕙᓂᔅᓴᐃᓐᓇᖅ ᐅᖄᓚᖃᑦᑕᖁᔭᐅᕗᑦ ᕿᑭᖅᑕᓂᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖓᓐᓄᑦ ᑐᑭᓯᒋᐊᒃᑲᓐᓂᖃᑦᑕᕐᓗᑎᒃ ᖃᓄᒃᑲᓐᓂᖅ ᐃᑲᔪᖅᑕᐅᔪᓐᓇᕐᒪᖔᑕ.

ᑮᓇᐅᔭᑦ ᕿᑭᖅᑕᓂᒃᑯᓐᓂ ᓄᕙᕐᔪᐊᓇᖅᑐᒧᑦ ᐃᑲᔫᑏᑦ ᐅᑯᓇᙶᕐᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᖃᖅᑳᕐᓯᒪᔪᓄᑦ ᐃᑲᔫᑎᓂᑦ ᑮᓇᐅᔭᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐊᕋᓐ ᕙᓚᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᔅᓴᓂᑦ ᑐᓴᐅᒪᖃᑦᑕᐅᑎᒍᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐊᑭᖃᙱᑐᒃᑯᓘᓐᓃᑦ ᐅᖓᓯᑦᑐᒥᑦ 1.800.667.2742
kflaherty@qia.ca