ᐃᖃᓗᐃᑦ, ᓄᓇᕗᑦ, ᔮᓐᓄᐊᓕ 28, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐱᓇᓱᐊᕈᑎᖏᑦ ᐃᑲᔫᑎᖃᕐᓂᕐᒧᑦ ᓂᕿᔅᓴᖃᑦᑎᐊᕈᑎᔅᓴᓂᑦ ᐊᒻᒪᓗ ᐊᓂᑦᑕᐃᓕᒋᐊᓕᓐᓄᑦ ᓄᕙᕐᔪᐊᓇᖅᑐᒧᑦ ᖃᓂᒪᓇᖅᑐᒧᑦ ᐊᑑᑎᕕᐅᔪᓄᑦ ᓄᓇᓕᓐᓄᑦ ᑲᔪᓯᒻᒪᑦ ᓄᑖᓂᑦ ᓂᕿᑖᕈᑎᔅᓴᓂᑦ ᐃᑲᔫᑎᖃᖅᑐᑎᒃ ᑭᒻᒥᕈᕐᒥᐅᓄᑦ. ᕿᑭᖅᑕᓂ ᓄᓇᓖᑦ ᐃᓄᐃᑦ ᐃᓚᒌᑦ ᑭᒻᒥᕈᕐᒥ ᓂᕿᑖᕈᑎᔅᓴᓂᒍᓐᓇᓯᒻᒥᒻᒪᑕ $250ᓂᑦ ᐊᑐᓂᑦ.

“ᓂᕿᔅᓴᖃᑦᑎᐊᕈᑎᔅᓴᑦ ᓯᕗᓪᓕᐅᔾᔭᐅᒻᒪᑕ ᓄᕙᕐᔪᐊᓇᖅᑐᖅᑕᖃᕐᓂᖓᓂ ᓄᓇᕐᔪᐊᓕᒫᒥ” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ, “ᑖᒃᑯᐊ ᐃᑲᔫᑏᑦ ᐃᑲᔫᑎᖃᖁᓇᖅᑯᑦ ᐱᓇᓱᐊᕈᑕᐅᔪᓄᑦ ᓱᒃᑲᐃᓪᓕᐅᒥᓯᒪᖁᓪᓗᒍ ᓯᐊᒻᒪᐸᓪᓕᐊᓂᖓ ᖃᓂᒪᓇᖅᑑᑉ.”

“ᖁᔭᓕᕗᖓ ᕿᓚᒥᕕᔾᔪᐊᕌᓗᒃ ᖃᓄᖅᑑᕆᐊᕈᑎᖃᕐᖓᑕ ᑎᒥᖁᑎᕗᑦ ᐊᒻᒪᓗ ᐅᑭᐅᖅᑕᖅᑐᒥ ᑯᐊᐸᒃᑯᑦ,” ᐅᖃᖅᑐᖅ ᕿᑭᖅᑕᓂᒃᑯᓐᓂ ᑲᑎᒪᔨᓂᑦ ᑲᑎᒪᔨᐅᖃᑕᖅ ᑭᒻᒥᕈᕐᒥ ᑖᒥ ᐋᑲᕙᒃ. “ᓂᕿᔅᓴᖃᑦᑎᐊᓂᕐᒧᑦ ᐃᑲᔫᑏᑦ ᐃᑲᔫᑕᐅᑦᑎᐊᕐᖓᑦ ᓄᓇᓖᑦ ᖃᓄᐃᖁᓇᒋᑦ ᐊᑦᑕᓇᖅᑐᒦᖁᓇᒋᓪᓗ.”

ᕿᑭᖅᑕᓂᒃᑯᑦ ᐸᔪᑦᑎᕆᓂᐊᖅᑕᑦ ᓂᕿᑖᕈᑎᔅᓴᓂᑦ ᑭᒻᒥᕈᕐᒥ ᑲᑐᔾᔨᖃᑎᖃᕐᓗᑎᒃ ᐅᑭᐅᖅᑕᖅᑐᒥ ᑯᐊᐸᒃᑯᓐᓂᑦ. ᑮᓇᐅᔭᑦ ᕿᑭᖅᑕᓂᒃᑯᑦ ᓄᕙᕐᔪᐊᓇᖅᑐᖅᑕᖃᕐᓂᖓᓂ ᐃᑲᔫᑎᖏᑦ ᐅᑯᓇᙶᕐᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᖃᖅᑳᕐᓯᒪᔪᓄᑦ ᓄᓇᓕᐅᔪᕗᑦ ᐃᑲᔫᑎᓂᑦ ᑮᓇᐅᔭᓂᑦ.

ᐃᒫᒃ ᐋᖅᑭᓯᒪᓂᐊᖅᑐᑦ:

• ᐱᒋᐊᖅᑕᐅᑎᒋᓗᑎᒃ, ᕿᑭᖅᑕᓂᒃᑯᑦ ᐊᒻᒪᓗ ᐅᑭᐅᖅᑕᖅᑐᒥ ᑯᐊᐸᒃᑯᑦ ᐸᔪᑦᑎᕆᓂᐊᕐᖓᑕ ᓂᕿᑖᕈᑎᔅᓴᓂᑦ ᐊᒥᓲᓂᓕᓐᓂᑦ $250.
• ᐸᔪᑦᑎᕆᓂᖅ ᓂᕿᑖᕈᑎᔅᓴᓂᑦ ᑲᒪᒋᔭᐅᓂᐊᖅᑐᖅ ᑲᓲᑎᖃᑎᖃᖅᑕᐃᓕᓗᑎᒃ ᐊᑐᓂᑦ ᐃᓄᓐᓂᑦ ᐃᓪᓗᒥᐅᖃᑎᒌᓄᑦ ᑭᒻᒥᕈᕐᒥ.  
• ᑐᖏᓕᐊᓂ ᓂᐅᕕᐅᑎᔅᓴᐃᑦ ᐊᒥᓲᓂᓕᑦ $250ᓂᑦ ᑐᓂᐅᖅᑲᖅᑕᐅᓛᖅᑐᑦ ᑕᒫᓂ ᖃᓂᒋᔭᖓᓂᓘᓐᓃᑦ ᕖᕝᕗᐊᓕ 14 2022.

ᐃᓄᐃᑦ ᐃᓪᓗᒥᐅᖃᑎᒌᒐᓴᐃᑦ ᐊᑕᐅᑦᑎᒥ ᐅᖄᓚᖃᑦᑕᖁᔭᐅᒐᓗᐊᑦ ᕿᑭᖅᑕᓂᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖓᓐᓄᑦ ᑐᑭᓯᒋᐊᒃᑲᓐᓂᖃᑦᑕᕐᓗᑎᒃ ᐃᑲᔫᑎᔅᓴᑲᓐᓃᑦ ᒥᔅᓵᓄᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ, ᑎᑎᕋᕈᓐᓇᖅᑐᓯ ᖃᕋᓴᐅᔭᒃᑯᑦ ᐃᕐᖐᓐᓈᕈᑎᒃᑯᑦ: COVID-19@qia.ca ᐅᖄᓚᓗᓯᓗᓐᓃᑦ ᐅᕗᖓ: 1-867-975-8383.

ᐊᑏ ᖃᐅᔨᒋᐊᖃᑦᑕᕆᔅᓯ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓄᑦ ᐅᕗᖓ qia.ca ᑐᑭᓯᑦᑎᐊᕐᓂᐊᕋᔅᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:
ᐅᐃᓪ Hᐊᑉᑭᓐᔅ,

ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742