ᐃᖃᓗᐃᑦ, ᓄᓇᕗᑦ – ᕕᑉᕗᐊᓕ 28, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᖁᕕᐊᓱᑦᑐᑦ ᑐᓴᖅᑎᑦᓯᒋᐊᑦᓴᖅ ᓵᓚᒃᓴᖅᑐᓂᒃ 2019 ᐃᓄᒃᑎᑐᑦ ᐃᓐᖏᐅᓯᕐᓄᑦ/ᐅᖃᓗᕋᐅᔭᐅᑎᓄᑦ ᓵᓚᒃᓴᕋᓱᐊᖅᑎᑦᓯᒍᑎᒋᓚᐅᖅᑕᒥᓂᒃ. ᓵᓚᒃᓴᕋᓱᐊᕐᓂᖅ, ᐃᓄᒃᑎᑐᑦ ᐅᖃᐅᓯᖅ ᑕᖅᑭᖓᓂ ᐊᐅᓚᓂᐅᔪᓄᑦ ᐃᓚᒋᔭᐅᓚᐅᖅᑐᖅ, ᓵᓚᒃᓴᕋᓱᐊᖅᑐᓂᒃ ᕿᑭᖅᑕᓂ ᓄᓇᖓᓂ.

“ᑕᐸᐃᕐᓇᖅᑐᖅ ᑕᑯᔭᕆᐊᑦᓴᖅ ᓴᓇᑐᔪᒥᒃ ᐊᔪᓐᖏᑐᕐᔪᐊᓂᓪᓗ ᐃᓄᓐᓂᒃ ᕿᑭᖅᑕᓂ ᓄᓇᖓᑕ ᓄᓇᓕᖁᑎᖏᓐᓂ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ ᐲᔭᐃ ᐊᕿᐊᕈᖅ, “ᑖᒃᑯᐊ ᐃᓐᖏᐅᓰᑦ ᐊᒻᒪᓗ ᐅᖃᓗᕋᐅᔭᐅᑏᑦ ᓇᓗᓇᐃᕈᑕᐅᔪᑦ ᑲᓲᒪᓂᖏᓐᓂᒃ ᒪᒃᑯᑦᑐᖁᑎᕗᑦ ᐃᓄᐃᑦ ᐅᖃᐅᓯᑦᑎᓐᓄᑦ, ᐃᓕᖅᑯᓯᑦᑎᓐᓄᑦ ᐊᒻᒪᓗ ᐊᑐᕐᓯᒪᔭᑦᑎᓐᓄᑦ.”

ᐅᑯᐊ ᓵᓚᒃᓴᑎᑦᓯᒍᑕᐅᓇᓱᐊᖅᑐᒧᑦ ᓵᓚᒃᓴᖅᑐᑦ:

• ᓯᕗᓪᓕᕐᐹᖅ ᓵᓚᒃᓴᖅᑐᖅ, $400 ᓵᓚᓕᒃ – ᒥᐊᓕ ᑰᓕ−ᓴᓪᓗᕕᓂᖅ ᐃᖃᓗᒻᒥᐅᖅ
  • ᒥᐊᓕ ᐃᓕᓴᐃᔨ ᔫᒥ ᐃᓕᓐᓂᐊᕕᒻᒥ
  • ᐅᖃᐅᓗᕋᐅᔭᐅᑎᒥᓂᒃ ᓈᓚᑦᑕᐅᒍᓐᓇᖅᑐᒧᑦ ᖃᕆᓴᐅᔭᒨᕆᓯᒪᔪᖅ ᓴᖅᑭᕐᓯᒪᔭᒥᓂᒃ ᐱᒋᐊᒃᑲᓐᓂᕈᑎᒃᓴᖓᓂᒃ ᐃᓄᒃᑎᑐᑦ ᐃᓕᓯᒪᓪᓗᒍ ᑮᓇᕐᓯᐅᕆᕕᒻᒧᑦ (facebook)
  • ᐅᖃᓗᕋᐅᔭᐅᑎᖓ “ᐅᕝᕙ ᐊᐃᔭᐃᔮᓕᐅᖅᑐᖅ” (ᐊᐃᔭᐃᔮᒥᒃ ᐋᖅᑭᑦᓱᐃᔪᖅ) ᓇᓗᓇᐃᔭᐃᔪᖅ ᕿᒧᓯᒃᑯᑦ ᐃᖏᕐᕋᓗᓂ ᐊᒻᒪᓗ ᑲᔾᔮᖅᑐᖅ ᑕᑯᓐᓇᖅᑕᒥᒍᑦ ᐊᒻᒪᓗ ᓂᐱᖓᓂᒃ ᓄᓇᐅᑉ − ᐊᑐᖅᑕᒥᒍᑦ ᑲᓲᒪᒍᑎ ᐅᖃᓗᕋᐅᔭᐅᑎ ᓯᕗᓕᕆᓚᐅᖅᑕᒥᓄᑦ

• ᑐᒡᓕᐊ ᓵᓚᒃᓴᖅᑐᖅ, $300 ᓵᓚᓕᒃ – ᔨᐊᓯ ᑐᓗᕌᕐᔪᒃ ᐃᒡᓗᓕᒻᒥᐅᑕᖅ
  • ᐃᓕᓐᓂᐊᕌᓂᓚᐅᖅᑐᖅ ᐊᑕᒍᑦᑖᓗᒃ ᐃᓕᓐᓂᐊᕐᕕᐊᓗᐊᓂᒃ ᐊᒻᒪᓗ ᓄᓇᕗᑦ ᓯᕗᓂᒃᓴᕗᒻᒥ ᐋᑐᕚᒥ
  • ᑕᐅᖅᓯᐅᑎᓯᒪᔪᖅ ᐃᓕᓴᐃᔨᐅᓪᓗᓂ ᐊᑕᒍᑦᑖᓗᒃ ᐃᓕᓐᓂᐊᕐᕕᐊᓗᐊᓂ
  • ᔨᐊᓯ ᑐᓂᓚᐅᖅᑕᖓ ᐃᓐᖏᐅᓯᖅ ᐃᕐᖐᓐᓈᕈᑎᒃᑯᑦ ᑕᐃᒎᓯᓕᒃ “ᒪᔪᕋᐃᓐᓇᕆᑦ” (ᐊᑏ ᒪᔪᕋᑐᐃᓐᓇᕆᑦ) ᑲᔪᓯᑎᑦᓯᕙᓪᓕᐊᓂᕐᒥᒃ ᓯᓐᓇᑦᑐᐊᕆᔭᓐᓂᒃ, ᒪᑭᒪᓂᖅ ᖁᕕᐊᓱᓪᓗᓂ ᐊᒻᒪᓗ ᑲᔪᓯᑎᑦᓯᓂᖅ ᑐᕌᒐᕆᔭᕐᓂᒃ

• ᐱᖓᔪᐊᑦ ᓵᓚᒃᓴᖅᑐᖅ, $200 ᓵᓚᓕᒃ – ᐱᐊᑭ ᕼᐊᓐ, ᐃᑉᐱᐊᔪᒻᒥᐅᑦᓴᔭ
  • ᓂᔾᔭᐅᓯᔭᖅᑎ ᓴᖅᑮᖃᑦᑕᕐᓯᒪᔪᖅ ᖃᕆᓴᐅᔭᒃᑯᑦ ᐊᖏᔪᒻᒪᕆᒻᒥᒃ ᐊᐅᓚᔫᓕᐅᒐᕐᒥᓂᒃ ᐊᒻᒪᓗ ᓴᖅᑮᖃᑦᑕᖅᑐᖅ ᐃᓄᑦᑎᑑᖅᑐᓂᒃ ᐃᓐᖏᐅᓯᕐᓂᒃ
  • ᐱᐊᓂ ᓵᓚᒃᓴᕐᓯᒪᒻᒥᔪᖅ 2018 ᕿᑭᖅᑕᓂᒃᑯᑦ ᐃᓐᖏᐅᓯᕐᓂᒃ ᐅᖃᓗᕋᐅᔭᐅᑎᓂᓪᓗ ᓵᓚᒃᓴᑎᑦᓯᒐᓱᐊᕈᑎᖓᓂᒃ ᐊᒻᒪᓗ 2016-ᒥ ᓵᓚᒃᓴᓚᐅᕐᒥᔪᖅ ᓄᓇᕗᑦ ᒐᕙᒪᖓᑕ ᕿᓚᐅᑦ ᓄᑕᖅᑲᓄᑦ ᐃᓐᖏᐅᓯᕐᓂᒃ ᓵᓚᒃᓴᕋᓱᐊᖅᑎᑦᓯᑎᓪᓗᒋᑦ
  • ᐱᐊᒃ ᑐᓂᓚᐅᖅᑕᖓ ᐊᐅᓚᔫᓕᐅᒐᖅ ᐅᖓᓕᖃᑦᑕᐅᑎᓂᕐᒧᑦ ᐃᓐᖏᐅᓯᕐᒥᒃ ᑕᐃᒎᓯᓕᒃ “ᑭᓕᒐᒫᒃᓯᒪᔪᖅ” (ᑮᑕᕈᓗᒃ ᑭᓕᖅᓯᒪᔪᖅ) ᑮᓇᕐᓯᐅᕆᕕᒃᑯᑦ ᓴᖅᑭᑦᑐᓂᐅᒃ

ᓇᓕᖅᑲᖏᑦ ᓵᓚᒃᓴᓚᐅᖅᑐᑦ ᐊᑐᐃᓐᓇᐅᑎᑕᑦ ᕿᑭᖅᑕᓂᒃᑯᑦ ᐃᑭᐊᖅᑭᕕᖓᒍᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᑐᓴᒐᑦᓴᒃᑯᕕᖓᓂ.

ᑐᑭᓯᒋᐊᒃᑲᓂᕐᕕᒃᓴᖅ, ᐅᖄᓚᕕᒋᓗᒍ

ᓴᐃᒪ ᓴᐊᕼᐊ ᔨᕆᕼᐃ, ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

867.975.8413

1.800.667.2742