ᐃᖃᓗᐃᑦ, ᓄᓇᕗᑦ, ᔮᓐᓄᐊᓕ 12, 2022 – ᐅᖓᕙᕆᐊᖅᑕᐅᓯᒪᔪᒥ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ (NIRB) ᐱᓕᕆᐊᖃᓚᐅᖅᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᑐᓂᓯᕗᑦ ᑎᑎᕋᕐᓯᒪᔪᓂᑦ ᓇᓗᓇᐃᔭᐃᓯᒪᔪᓂᑦ ᕿᑭᖅᑕᓂᒃᑯᑦ ᑲᑎᒪᔨᖏᑕ ᖃᓄᐃᓕᖓᔾᔪᑎᖃᕐᒪᖔᑕ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ ᓄᓘᔮᓐᓂ ᐱᓕᕆᐊᖓᓐᓂ ᑐᖏᓕᐊᓂ ᐱᓕᕆᐊᔅᓴᓂᑦ ᑐᔅᓯᕋᐅᑕᐅᓯᒪᔪᓄᑦ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ.

ᕿᑭᖅᑕᓂᒃᑯᑦ ᑲᑎᒪᔨᖏᑦ ᑲᑎᒪᑎᓪᓗᒋᑦ ᒫᑦᓯ 2021ᒥ, ᑲᑎᒪᔩᑦ ᓈᒻᒪᓴᖅᑐᐃᓐᓇᐅᓪᓗᑎᒃ ᓂᕈᐊᓚᐅᕐᓯᒪᔪᑦ ᐃᑲᔪᕐᓰᔾᔮᖏᓐᓂᕋᖅᑐᑎᒃ ᒫᓐᓇ ᑐᔅᓯᕋᐅᑕᐅᓯᒪᔪᓂᑦ ᐱᓕᕆᐊᖑᔪᒧᑦ.

“ᒫᓐᓇ ᑐᔅᓯᕋᐅᑦ ᐊᑑᑎᖃᑦᑎᐊᓂᖅᑐᓂᑦ ᐱᑕᖃᙱᒻᒪᑕ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ. “ᕿᑭᖅᑕᓂᒃᑯᑦ ᓱᓕ ᐊᖏᕐᓯᒪᔪᑦ ᐃᑲᔪᕐᓱᐃᓪᓗᑎᓪᓗ ᓄᓇᒥᐅᑕᕐᓂᑦ ᐱᕙᓪᓕᐊᔪᓕᕆᓂᕐᒥᒃ ᑕᒫᓂ ᐃᓄᐃᑦ ᐃᓚᒋᔭᐅᓪᓚᑦᑖᖏᓐᓇᑐᐊᖅᑲᑕ ᐱᕙᓪᓕᐊᑎᑦᑎᓂᕐᒥᒃ ᐱᓕᕆᐊᔅᓴᓂᑦ ᑐᔅᓯᕋᐅᑎᓂᑦ ᐊᒻᒪᓗ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᑦ.”

ᐃᓚᖏᑦ ᐱᔾᔪᑕᐅᓯᒪᔪᓂᑦ ᑲᑎᒪᔨᓄᑦ ᑕᐃᒫᒃ ᓂᕈᐊᕈᑕᐅᓯᒪᔪᑦ ᐃᑲᔪᕐᓰᔾᔮᖏᓐᓂᕐᒧᑦ ᐅᑯᐊ:

• ᐊᕙᑎᓕᕆᓂᕐᒥ ᐊᑑᑎᓂᖃᓪᓚᕆᓐᓂᐊᖅᑐᑦ ᐊᒻᒪᓗ ᓇᓗᓇᕐᓂᖏᑦ ᐱᔾᔪᑎᒋᓪᓗᒋᑦ ᐊᑑᑎᓂᖃᕋᔭᖅᑑᔮᖅᑐᑦ ᓂᕆᐅᒋᔭᐅᔪᑦ
• ᐃᓄᐃᑦ ᖃᐅᔨᓇᓱᒻᒪᑦ ᐊᑐᖅᑕᐅᓪᓚᑦᑖᕐᓯᒪᔪᓂᑦ ᑐᔅᓯᕋᐅᑕᐅᓯᒪᔪᓂᑦ ᐊᓯᔾᔨᐸᓪᓕᐊᔪᑦ ᒪᓕᑦᑐᒋᑦ ᐊᐅᓚᑦᑎᓂᕐᒧᑦ ᐋᖅᑭᓯᒪᓂᐅᔪᓂᑦ ᓯᕗᕐᖓᒍᑦ ᐱᓕᕆᐊᖅ ᐊᖏᓪᓕᒋᐊᖅᑕᐅᓚᐅᙱᓐᓂᖓᓂ.
• ᐊᒥᒐᕐᓯᓗᐊᖅᑐᑦ ᐃᓚᓕᐅᔾᔭᐅᓯᒪᒐᑎᒃ ᐃᓄᐃᑦ ᖃᐅᔨᒪᔭᑐᖃᖏᑦ
• ᐃᑲᔪᖅᓯᖅᑕᐅᓯᒪᙱᓗᐊᖅᑐᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᑐᖏᓕᐊᓂ ᐱᓕᕆᐊᔅᓴᑦ ᑐᔅᓯᕋᐅᑕᐅᓯᒪᔪᑦ

ᓇᓗᓇᐃᖅᑕᐅᓯᒪᓪᓗᑎᒃ ᐃᓄᓐᓄᑦ ᑲᑐᔾᔨᖃᑎᒌᖑᓪᓗᑎᒃ, ᕿᑭᖅᑕᓂᒃᑯᑦ ᑲᒪᒋᔭᔅᓴᕆᒻᒪᒍ ᓇᓗᓇᐃᕐᓯᔭᕆᐊᖃᕐᓂᖅ ᓇᓕᐊᓐᓄᑐᐃᓐᓇᖅ ᓄᓇᒥᒃ ᐊᑐᕈᒪᔪᓄᑦ ᑐᔅᓯᕋᐅᑎᓄᑦ ᐃᓄᐃᑦ ᓄᓇᖁᑎᖏᓐᓅᖓᔪᓄᑦ ᕿᑭᖅᑕᓂ ᓄᓇᑦᑎᓐᓂ. ᑖᒃᑯᐊ ᑐᓂᔭᑦ ᑕᓪᓕᒪᓂᑦ ᐊᕐᕌᒍᓂᑦ ᑲᒪᒋᔭᐅᓯᒪᔪᓂᑦ ᑕᕝᕗᖓ ᑎᑭᐅᑎᔪᑦ ᐊᕙᑎᓕᕆᔨᒃᑯᑦ ᕿᒥᕐᕈᑎᓪᓗᒋᑦ.

ᑐᑭᓯᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᑖᓐᓇ:
ᐅᐃᓪ Hᐊᑉᑭᓐᔅ, ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413 or
1.800.667.2742