ᕿᑭᖅᑕᓂᒃᑯᑦ ᐱᒋᐊᖅᑎᑦᑎᔪᑦ ᐱᓕᕆᐊᖑᐃᓐᓇᕐᓂᐊᓕᖅᑐᓂ ᐃᑲᔫᑕᐅᓂᐊᖅᑐᒥᒃ ᐃᓄᓐᓄᑦ ᕿᒧᔅᓯᖃᖅᑎᓄᑦ

ᐃᖃᓗᐃᑦ, ᓄᓇᕗᑦ –ᓄᕙᐃᕙ 1, 2023– ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᐱᒋᐊᖅᑎᑦᑎᓂᖏᓐᓂᒃ ᕿᑭᖅᑕᓂ ᕿᒧᒃᓯᖅᑎᓄᑦ ᐃᑲᔫᑎᓂᑦ (QQP) ᑖᓐᓇ ᐱᓕᕆᐊᖑᐃᓐᓇᕐᓂᐊᓕᖅᑐᖅ. ᑖᒃᑯᐊ ᐃᑲᔫᑏᑦ ᐋᖅᑭᓱᖅᑕᐅᓯᒪᔪᑦ ᐃᑲᔪᖅᑕᐅᖃᑦᑕᓂᐊᕐᖓᑕ ᕿᑭᖅᑕᓂ ᓄᓇᓖᑦ ᐃᓄᐃᑦ ᐋᖅᑭᐅᒪᑎᑦᑎᓂᕐᒧᑦ ᕿᒧᔅᓯᖏᓐᓂᒃ ᐊᒻᒪᓗ ᐊᑐᐃᓐᓇᐅᖃᑦᑕᓂᐊᖅᑐᑎᒃ ᑐᔅᓯᕋᐅᓯᐅᖃᑦᑕᕈᓐᓇᓂᐊᖅᑐᓄᑦ ᐊᕐᕌᒍᑕᒫᑦ.

ᑖᒃᑯᐊ ᐃᑲᔫᑏᑦ ᑮᓇᐅᔭᖃᖅᑎᑦᑎᒍᑕᐅᖃᑦᑕᓂᐊᖅᑐᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᕿᒧᔅᓯᖁᑎᓕᓐᓄᑦ ᐊᒻᒪᓗ ᐃᓚᒋᔭᐅᓪᓗᓂ ᑖᓐᓇ ᕿᑭᖅᑕᓂᒃᑯᑦ ᐃᖅᑲᓇᐃᔮᕆᕙᑦᑕᖏᓐᓄᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓃᙶᕐᓯᒪᔪᓂᑦ.

“ᑲᑎᒪᔨᓕᒫᑦ ᑲᑎᒪᑎᓪᓗᒋᑦ ᑕᖅᑭᐅᓚᐅᖅᑐᒥ, ᑲᑎᒪᔩᑦ ᐱᖁᔨᕗᖔᕈᒻᒥᑦ ᑲᑎᔪᓯᑎᑦᑎᔪᒻᒪᑕ ᑖᓐᓇ ᐱᖓᓱᓄᑦ (3) ᐊᕐᕌᒍᓄᑦ ᐆᑦᑐᕋᐅᑕᐅᓗᓂ ᐱᓕᕆᐊᖑᓚᐅᕐᓯᒪᔪᖅ ᐋᖅᑭᓯᒪᐃᓐᓇᖁᓕᖅᑐᒍ ᕿᑭᖅᑕᓂᒃᑯᓐᓂᑦ. ᐊᑑᑎᖃᑦᑎᐊᕐᓯᒪᓂᖓ ᐱᓕᕆᐊᑉ ᐆᑦᑐᕋᐅᑕᐅᑎᓪᓗᒍ ᖃᐅᔨᒪᓇᕐᓯᔪᒻᒪᑦ ᐅᖃᐅᓯᐅᖃᑦᑕᕐᓯᒪᔪᓂᑦ ᐊᒻᒪᓗ ᑐᔅᓯᕋᕐᓯᒪᔪᓂᑦ ᐃᑲᔫᓯᐊᕐᓯᒪᔪᓂᑦ, ᐊᒻᒪᓗ ᐱᒃᑯᒍᓱᑦᑐᑕ ᑲᔪᓯᑎᑦᑎᔭᕆᐊᔅᓴᖅ ᐃᖅᑲᓇᐃᔮᑦᑎᓐᓂᒃ ᓴᐃᒪᖃᑎᒌᓐᓂᕐᒧᑦ ᐱᕙᓪᓕᐊᒍᑎᑦᑎᓐᓂᒃ”, ᐅᖃᖅᑐᖅ ᓚᐃᓴ ᓂᖏᐅᖅ, ᑕᒪᑐᒪ ᒥᔅᓵᓄᑦ ᓯᕗᓕᕐᓯᔪᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ.

ᕿᑭᖅᑕᓂ ᓄᓇᓖᑦ ᐃᓄᐃᑦ ᑕᓪᓕᒪᓂᑦ ᕿᒻᒥᓖᑦ ᐊᒥᓲᓂᕐᓴᓂᓪᓘᓐᓃᑦ ᑐᔅᓯᕋᖃᑦᑕᕈᓐᓇᕐᖓᑕ ᐊᑕᐅᓯᐊᕐᓗᑎᒃ ᐊᑭᓕᖅᑕᐅᔾᔪᑎᒋᖃᑦᑕᓂᐊᖅᑕᖏᓐᓂᒃ $3500ᓂᑦ ᐊᕐᕌᒍᒥ 2023-2024 ᑮᓇᐅᔭᖅᑑᑎᔅᓴᓄᑦ ᐊᐅᓚᕕᑦᑎᓐᓂ, ᐃᓚᒋᔭᐅᓪᓗᑎᒃ ᑕᐃᒃᑯᐊ ᑐᔅᓯᕋᖃᑦᑕᕐᓯᒪᔪᑦ ᐊᕐᕌᒍᓂᑦ ᓯᕗᓪᓕᕐᓂᑦ. ᑐᔅᓯᕋᐅᓯᐅᕈᑦ ᐱᔭᔅᓴᖅ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂ ᐅᕝᕙᓘᓐᓃᑦ ᑎᑎᕋᕐᕕᓴᐅᓪᓗᑎᒃ ᐃᑲᔪᖅᑎᖃᕐᓗᓯ ᓄᓇᔅᓯᓐᓂ ᑐᓴᐅᒪᑎᑦᑎᔨᒥᒃ ᐅᕝᕙᓘᓐᓃᑦ, ᐅᖄᓚᓗᓯ 867-975-8400ᒧᑦ.

ᒪᑐᕕᔅᓴᖓ ᑐᔅᓯᕋᐅᑎᓄᑦ ᑎᓯᐱᕆ 31, 2023. ᐊᖏᖅᑕᐅᔪᑦ ᑐᔅᓯᕋᕐᓯᒪᔪᑦ ᑮᓇᐅᔭᖅᑖᖅᑎᑕᐅᖃᑦᑕᓂᐊᖅᑐᑦ ᔮᓐᓄᐊᓕ 31, 2024 ᑐᖔᓂ.

ᑐᒃᓯᕋᐅᑎ ᒫᙵ ᑕᑕᑎᒍᓐᓇᕐᒃᑕᐃ:  https://www.qia.ca/applications/qikiqtani-qimuksiqtiit-program/

ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᖃᑦᑕᕐᓕ:

ᑭᐊᕋᓐ ᕙᓚᐅᕋᑎ

ᐊᐅᓚᑦᑎᔨ, ᑐᓴᐅᒪᑎᑦᑎᔨᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

(ᐅᖄᓚᐅᑎᖓ) 867.975.8398 ᐅᕝᕙᓘᓐᓃᑦ ᐊᑭᖃᓐᖏᑐᒃᑯᑦ 1.800.667.2742

ᖃᕋᓴᐅᔭᒃᑯᑦ: kflaherty@qia.ca­

­