ᐃᖃᓗᐃᑦ, ᓄᓇᕗᑦ – ᔮᓐᓄᐊᓕ 29, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐱᒃᑯᒍᓱᑉᐳᑦ ᖁᕕᐊᓲᑎᖃᕆᐊᔅᓴᖅ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᕆᔭᐅᕙᑦᑐᒥᒃ ᑕᓪᓕᒪᒋᓕᖅᑕᖓᓐᓂ ᐊᕐᕌᒍᒥ ᑐᖏᓕᕇᓂᑦ ᐊᑐᖅᑕᐅᖃᑦᑕᖅᑐᒥᒃ ᐊᔾᔨᒌᙱᑐᒡᒍᑎᐅᕙᑦᑐᑎᒃ ᐊᑐᖅᑕᐅᕙᑦᑐᑦ ᐱᓇᓱᐊᕈᑕᐅᕙᑦᑐᓪᓗ.

“ᐃᓄᒃᑎᑑᖃᑦᑕᕐᓂᖅ ᐃᓄᓐᓄᑦ ᑲᓲᑎᑦᑎᐊᑲᓐᓂᕈᑕᐅᕙᒻᒥᒻᒪᑦ ᐃᓕᖅᑯᓯᑎᑦᑎᓐᓄᑦ ᐊᑐᖅᑕᐅᖃᑦᑕᕐᓯᒪᔪᑐᖃᕐᓄᓪᓗ − ᐃᑦᑐᐊᖅᑑᑕᐅᒻᒪᑦ ᓯᕗᓕᑦᑕ ᐊᑐᖃᑦᑕᕐᓯᒪᔭᖏᓐᓄᑦ, ᐱᖅᑯᓯᑦᑎᓐᓄᑦ, ᐃᓱᒪᒍᓯᑦᑎᓄᓪᓗ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ. “ᕿᑭᖅᑕᓂᒃᑯᑦ ᐅᐱᒍᓱᑉᐳᑦ ᖁᕕᐊᓲᑎᖃᕆᐊᔅᓴᖅ ᐅᖃᐅᓯᑦᑎᓐᓂᒃ ᐊᒻᒪᓗ ᑎᓕᐅᕆᓪᓗᑎᒃ ᐃᓅᓱᑦᑐᓂᑦ ᐅᖃᕆᐅᕐᓴᖃᑦᑕᖁᓪᓗᒋᑦ ᐃᓕᓐᓂᐊᖃᑦᑕᖁᓪᓗᒋᓪᓗ ᓇᒻᒥᓂᖅ ᐅᖃᐅᓯᕆᖃᑦᑕᕐᓗᑎᒃ ᐅᖃᐅᓯᓪᓚᑦᑖᑎᓐᓂᒃ ᐊᑐᕐᓗᑎᒃ.”

ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᕐᒥ  ᐊᑐᖅᑕᐅᖃᑦᑕᓛᖅᑐᑦ ᒪᑯᐊ:

ᕿᑭᖅᑕᓂᒃᑯᑦ ᐅᖃᓕᒫᒐᖁᑎᖏᓐᓂᒃ ᓴᖅᑭᑎᑦᑎᖃᑦᑕᕐᓂᖅ − ᕖᕝᕗᐊᓕ 1 – 28, 2021

ᖃᐅᑕᒫᑦ ᕖᕝᕗᐊᓕᒥ ᕿᑭᖅᑕᓂᒃᑯᑦ ᓴᖅᑭᑎᑦᑎᖃᑦᑕᓛᕐᖓᑕ ᐊᔾᔨᒌᙱᑐᒡᒍᑎᓂᑦ ᐃᓄᒃᑎᑑᖓᔪᓂᑦ ᐅᖃᓕᒫᒐᕐᓂᑦ ᐅᖃᓕᒫᒐᓕᐊᖑᖃᑦᑕᕐᓯᒪᔪᑦ ᑖᒃᑯᓇᙵᑦ ᐅᖃᓕᒫᒐᓕᐅᖅᑎᓂᑦ Inhabit Media ᐃᑲᔪᖅᑎᖃᖅᑐᑎᒃ ᕿᑭᖅᑕᓂᒃᑯᓐᓂᑦ ᑮᓇᐅᔭᖅᑖᕐᓯᒪᓪᓗᑎᒃ ᐃᓄᓕᒫᓄᑦ ᑐᓴᕋᔅᓴᖃᕐᕕᒋᕙᑦᑕᖏᑎᒍᑦ  (Facebook, Twitter, Instagram). ᐊᒻᒪᓗᑦᑕᐅᖅ, ᑕᑯᖅᑯᔾᔨᖃᑦᑕᓂᐊᕐᒥᔪᒍᑦ ᐊᑭᖃᙱᑦᑐᓂᑦ ᖃᕋᓴᐅᔭᒃᑯᑦ ᐱᑖᖑᖃᑦᑕᕈᓐᓇᖅᑐᓂᑦ ᑐᕌᕈᑎᖏᓐᓂᒃ ᐊᑐᓂᑦ ᐅᖃᓕᒫᒐᕐᓄᑦ.

 ᐃᓄᒃᑎᑐᑦ ᐃᙱᐅᓯᐅᓕᐅᑎᑎᑦᑎᓂᖅ/ᐅᖃᓗᕋᐅᔭᐅᑎᓕᐅᑎᑎᑦᑎᓂᖅ − ᑖᓐᓇ ᐊᐅᓚᓂᖃᓛᖅᑐᖅ ᕖᕝᕗᐊᓕ 1ᒥ 19ᒧᑦ, 2021 − ᓵᓚᔅᓴᖅᑐᖅ ᓇᓗᓇᐃᖅᑕᐅᓛᖅᑐᖅ ᕖᕝᕗᐊᓕ 26.
ᐃᓚᒋᔭᐅᔪᑦ ᑐᓂᓯᖃᑦᑕᖁᔭᐅᕗᑦ ᑎᑎᕋᕋᑖᕐᓯᒪᔭᖏᓐᓂᒃ ᓇᐃᑦᑐᒡᒍᑎᓂᑦ ᐃᙱᐅᓯᕐᓂᑦ ᐅᖃᓗᕋᐅᔭᐅᑎᓂᓪᓘᓐᓃᑦ (50 ᐅᖃᐅᓰᑦ ᑐᖔᓂᓘᓐᓃᑦ) ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᐃᓄᓕᒫᓄᑦ ᑐᓴᕋᔅᓴᖃᕐᕕᖏᑎᒍᑦ (Facebook, Twitter, Instagram) ᐊᑐᕐᓗᑎᒃ ᐆᒥᖓ ᓇᓗᓇᐃᒃᑯᑕᕐᒥᒃ #QIAinuk21. ᓵᓚᔅᓴᖅᑐᖅ ᓵᓚᖃᐅᓯᐊᕋᔭᖅᑐᖅ $2,500, ᑐᖏᓕᐊ ᓵᓚᖃᐅᓯᐊᕋᔭᖅᑐᖅ $1,750, ᐊᒻᒪᓗ ᐱᖓᔪᐊᑦ ᓵᓚᖃᐅᓯᐊᕋᔭᖅᑐᖅ $750.

ᖃᕋᓴᐅᔭᒃᑯᑦ ᐅᓂᒃᑳᖅᑐᐊᕐᓂᖅ − ᕖᕝᕗᐊᓕ 12, 19 ᐊᒻᒪ 26, 2021
ᓴᖅᑭᔮᖅᑕᐅᑎᒋᓗᑎᒃ ᐅᓂᒃᑳᖃᑦᑕᓛᖅᑐᑦ ᑖᒃᑯᐊ ᐅᖃᓕᒫᒐᓕᐅᖅᑏᑦ Inhabit media ᐊᒻᒪᓗ ᐅᖃᓕᒫᒐᓕᐅᖅᑏᑦ ᐃᓕᓐᓂᐊᕈᑎᔅᓴᓂᑦ. ᑎᑎᕋᕐᓯᒪᔪᑦ ᐅᑯᐊ ᓈᓐᓯ ᒪᐃᒃ, ᒪᐃᑲ Hᐊᐸ, ᓯᐅᕋᕕᐊᔅ Hᐅᓪᑕᓐ, ᑭᐊᕙᓐ ᐊᒻᒪ ᒥᐊᓕ ᖃᒪᓂᖅ−ᒪᐃᓴᓐ, ᑎᐳᕋ ᑭᒡᔪᒐᓕᒃ ᕙᐃᑉᓯᑕ, ᔭᓂᕗ ᐅᐃᓪᒪᓐ, ᔪᐊᑕᓐ ᖃᔮᖅ, ᔩᓚ ᐸᓪᓗᖅ−ᑯᓘᑎᔭᐃ, ᐊᓯᒃᑲᓐᓂᐊᓗᖏᓪᓗ!

ᐅᓂᒃᑳᑦ ᑕᑯᔅᓴᐅᓛᖅᑐᑦ ᑕᑯᑏᕖᒃᑯᑎᒍᑦ 4:00ᒥ − 4:30ᒧᑦ ᐅᑯᓇᓂ ᕖᕝᕗᐊᓕ 12, 19 ᐊᒻᒪ 26. ᓈᓚᓛᖅᑯᓯ ᓵᓚᖃᕋᓱᐊᓛᕋᔅᓯ ᐅᖃᓕᒫᒐᕐᓂᑦ.

ᓄᓇᕗᑦ ᓱᕈᓯᕐᓄᑦ ᑕᑯᓐᓇᕋᔅᓴᓕᕆᓂᖅ – ᕖᕝᕗᐊᓕ 22 – 28, 2021
ᐃᑲᕐᕋᕐᒥᒃ ᐊᑕᐅᓯᕐᒥᒃ ᐃᓄᑦᑎᑐᑦ ᐅᖃᐅᓯᖓᓐᓂᒃ ᑕᑯᓐᓈᕋᔅᓴᖃᖅᑎᑦᑎᖃᑦᑕᕐᓂᖅ ᓱᕈᓯᕐᓄᑦ ᑐᕌᖓᔪᓂᑦ ᐋᖅᑭᓱᖅᑕᐅᓯᒪᔪᓂᑦ ᓄᓇᕗᒥ ᒪᕐᕉᓐᓂᒃ ᐅᖃᐅᓯᓕᓐᓄᑦ ᐃᓕᓐᓂᐊᕐᓂᓕᕆᓂᕐᒧᑦ ᑲᑐᔾᔨᖃᑎᒌᓂᑦ, ᑲᑐᔾᔨᖃᑎᖃᖅᑐᑎᒃ ᐃᓕᖅᑯᓯᓕᕆᔨᒃᑯᓐᓂ ᓄᓇᕗᒥ ᐊᒻᒪᓗ ᕿᑭᖅᑕᓂᒃᑯᓐᓂᑦ. ᑕᑯᔅᓴᐅᑎᑦᑎᖃᑦᑕᓂᐊᖅᑐᑦ ᓇᐃᑦᑐᒡᒍᑎᓂᑦ ᐊᐅᓚᔫᓕᐊᖑᓯᒪᔪᓂᑦ ᓄᓇᕗᒥ ᑕᑯᓐᓇᕋᔅᓴᓂᑦ ᐋᖅᑭᔅᓱᐃᔨᓂᑦ. ᑕᑯᔅᓴᐅᖃᑦᑕᓂᐊᖅᑐᑦ ᑕᑯᑏᕖᒃᑯᑎᒍᑦ ᕖᕝᕗᐊᓕ 22 – 28, 2021

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:

ᐅᐃᓪ Hᐊᑉᑭᓐᔅ,
ᑭᖑᕝᕕᐅᑎᓯᒪᔪᖅ ᑐᑭᒧᐊᑦᑎᑦᑎᔨᖓᓐᓄᑦ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742