ᓄᓇᓕᓐᓄᑦ ᑐᑭᓯᒋᐊᕐᕕᖃᖃᑦᑕᕐᓂᕆᓚᐅᖅᑕᕗᑦ ᐊᑑᑎᖃᑦᑎᐊᓚᐅᖅᑐᑦ!

Posted ᐄᑉᐳ 18, 2017

ᕖᕝᕗᐊᓕᐅᑎᓪᓗᒍ, ᒫᑦᓯᒥᓗ ᐄᐳᒥᓗ ᑲᑐᔾᔨᖃᑎᒌᒃᑯᑦ ᑐᓴᐅᒪᖃᑦᑕᐅᑎᔪᓕᕆᔨᖏᑦ ᐊᒻᒪᓗ ᐃᓅᓯᓕᕆᓂᕐᒧᑦ ᐸᕐᓇᐃᔨᖏᑦ ᑲᑐᔾᔨᓪᓗᑎᒃ ᐃᓚᖃᖃᑦᑕᓚᐅᕐᖓᑕ ᓄᓇᓕᓐᓂᑦ ᑲᑎᒪᔨᑦᑎᓐᓂᒃ ᐊᒻᒪᓗ ᑐᓴᐅᒪᑎᑦᑎᔨᑦᑎᓐᓂᒃ ᑐᑭᓯᒋᐊᕐᕕᖃᖅᑐᑎᒃ ᐊᑐᓂᑦ 13ᓂᑦ ᕿᑭᖅᑕᓂ ᓄᓇᓕᖁᑎᑦᑎᓐᓂᑦ.

ᐊᐅᓪᓚᖃᑦᑕᓚᐅᖅᑐᒍᑦ ᓄᓇᓖᑦ ᓇᓪᓕᑭᑕᖅᑐᒋᑦ ᑲᑎᒪᖃᑎᒋᔭᖅᑐᖃᑦᑕᖅᑐᒋᑦ ᐃᓄᓕᒫᑦ. ᐅᖃᖃᑎᖃᕈᓐᓇᖃᑦᑕᓚᐅᖅᑐᒍᑦ ᓱᕈᓯᕐᓂᑦ, ᐃᓅᓱᑦᑐᓂᑦ, ᐃᓕᓴᐃᔨᓂᑦ, ᓄᓇᓕᓐᓂᑦ ᓯᕗᓕᖅᑎᓂᑦ, ᐃᓄᑐᖃᕐᓂᑦ ᐊᒻᒪᓗ ᐊᒥᓱᐊᓗᓐᓂᑦ ᐃᓚᒌᒡᒍᑎᓂᑦ.

ᑐᑭᓯᒋᐊᕐᕕᖃᖅᑎᓪᓗᑕ ᐊᐱᕐᓱᖃᑦᑕᕈᓐᓇᓚᐅᖅᑐᒍᑦ ᐃᓄᓐᓂᑦ ᐃᓱᒪᒋᔭᖏᓐᓂᒃ ᑐᓴᕐᕕᒋᔪᒪᓪᓗᒋᑦ ᖃᓄᐃᑦᑐᓂᑦ ᐃᑲᔫᑎᓂᑦ ᑕᑯᔪᒪᒐᔭᕐᒪᖔᑕ ᑲᑐᔾᔨᖃᑎᒌᒃᑯᓐᓄᑦ ᑲᒪᒋᔭᐅᒐᔭᖅᑐᓂᑦ.

ᖁᕕᐊᓱᓪᓚᕆᖃᑦᑕᓚᐅᖅᑐᒍᑦ ᐊᐅᓪᓚᖃᑦᑕᖅᑐᑕ ᓄᓇᑦᑎᓐᓂ ᓄᓇᓕᓕᒫᓄᑦ ᐊᒻᒪᓗ ᑲᑎᖃᑎᖃᖃᑦᑕᕆᐊᔅᓴᖅ ᐃᓄᓐᓂᑦ ᕿᑭᖅᑕᓂ. ᐊᔪᓕᐅᖅᑲᑲᐃᓐᓇᖃᑦᑕᓚᐅᕆᓪᓗᑕᓗ ᐱᕐᓯᑎᓪᓗᒍ ᐊᒻᒪᓗ ᐋᖅᑭᓱᑦᑎᐊᖃᑦᑕᕆᐊᖃᓚᐅᖅᑐᒋᑦ ᐃᓚᖏᑦ ᐊᐅᓪᓚᕐᓂᕆᓂᐊᖅᑕᕗᑦ ᐊᒻᒪᓗ ᑲᑎᒪᓂᕆᓂᐊᖅᑕᕗᑦ ᑭᓯᐊᓂ ᐃᓘᓐᓇᖏᓐᓂ ᒥᑭᓪᓕᑎᕐᓯᒪᓇᖃᑦᑕᓚᐅᕐᒥᔪᖅ ᑐᙵᓱᑦᑎᑕᐅᓗᐊᕐᓂᑯᒧᑦ ᐊᒻᒪᓗ ᐃᑲᔪᖅᑕᐅᓗᐊᕐᓂᑯᒧᑦ ᐃᓄᓐᓄᑦ ᑲᑎᖃᑦᑕᑕᑦᑎᓐᓄᑦ ᐊᒻᒪᓗ ᐅᑭᐅᖅᑕᖅᑑᑉ ᓄᓇᖓᑕ ᑲᔾᔮᓇᕐᓂᐊᓗᐊᓄᑦ ᑲᒪᓇᖅᑐᕐᓯᐅᖃᑦᑕᓚᐅᖅᑯᒍᑦ ᓄᓇᓕᖁᑎᑦᑕ ᐊᕙᑎᖏᓐᓂᒃ.

ᑐᑭᓯᒋᐊᕐᓂᕆᖃᑦᑕᓚᐅᖅᑕᕗᑦ ᑐᑭᓯᒃᑲᓐᓂᕈᑎᒋᓚᐅᖅᑕᕗᑦ ᐃᑲᔫᑎᒋᕙᑦᑕᑦᑕ, ᐱᓇᓱᐊᕈᑎᔅᓴᑦᑕ ᐱᔨᑦᑎᕋᐅᑎᑦᑕᓗ ᒥᔅᓵᓄᑦ ᐊᑐᖅᑕᐅᔭᕆᐊᖃᕐᐸᑦᑐᓂᑦ ᐊᑐᓂᑦ ᓄᓇᓕᓐᓂᑦ. ᑕᖅᑭᐅᓂᐊᖅᑐᓂᑦ ᐊᒥᓲᙱᑦᑐᓂᑦ ᕿᒥᕐᕈᓂᐊᕋᑦᑕ ᑐᑭᓯᐅᒪᔾᔪᑎᔅᓴᓂᑦ ᐋᖅᑭᔅᓱᐃᔪᒪᓪᓗᑕ ᓄᑖᓂᑦ ᐃᑲᔫᑎᔅᓴᓂᑦ ᓄᓇᑦᑎᓐᓂ.

ᑐᑭᓯᒋᐊᕐᕕᖃᕐᓂᕆᔪᔭᕗᑦ ᐃᓚᒋᔭᐅᓚᐅᖅᑐᖅ ᐃᖅᑲᓇᐃᔮᑦᑎᓐᓄᑦ ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᐃᑦ ᐱᔾᔪᑎᒋᓪᓗᒋᑦ.

ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᑦ ᓴᖅᑮᔾᔪᑕᐅᔪᒻᒪᑕ ᒪᕐᕉᓐᓂᒃ ᓄᑖᓐᓂᒃ ᑮᓇᐅᔭᖁᑎᒋᔭᐅᓂᐊᖅᑑᓐᓂᒃ ᑲᑐᔾᔨᖃᑎᒌᒃᑯᓐᓄᑦ, ᑭᖑᕚᔅᓴᑎᓐᓄᑦ ᑮᓇᐅᔭᑦ ᐊᒻᒪᓗ ᐃᑲᔫᓯᐊᔅᓴᑦ ᑮᓇᐅᔭᑦ. ᑭᖑᕚᔅᓴᑎᓐᓄᑦ ᑮᓇᐅᔭᑦ ᐊᒥᓱᕈᕐᐸᓪᓕᐊᑎᓪᓗᒋᑦ ᑮᓇᐅᔭᑦ ᑕᕝᕗᖓ ᐃᓯᕐᐸᑦᑐᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᑐᕌᖃᑦᑕᓂᐊᕐᖓᑕ ᐊᒥᓱᕈᒃᑲᓐᓂᖃᑦᑕᓂᐊᕐᖓᑕ ᐃᑲᔫᑎᐅᕙᑦᑐᑦ ᐃᓄᓐᓄᑦ. ᐊᕐᕌᒎᓛᖅᑐᒥ ᐊᐅᓚᕕᒋᓛᖅᑕᑎᓐᓂ, ᓂᕆᐅᑦᑐᒍᑦ $1 ᒥᓕᐊᓐᑲᓂᕐᓂᑦ ᐃᑲᔫᑎᓄᑦ ᑐᕌᖓᔪᓂᑦ ᕿᑭᖅᑕᓂ ᓄᓇᓕᓕᒫᓄᑦ, ᖁᔭᓐᓇᒦᕈᑎᒋᔭᕗᑦ ᑖᒃᑯᐊ ᑮᓇᐅᔭᐃᑦ.