ᐃᖃᓗᐃᑦ, ᓄᓇᕗᑦ −  ᒫᑦᓯ 1, 2018 − ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᖁᕕᐊᓱᓪᓚᕆᑦᑐᑦ ᓇᓗᓇᐃᕐᓯᔭᕆᐊᔅᓴᖅ ᓵᓚᔅᓴᖅᑐᓂᑦ ᐃᓄᒃᑎᑐᑦ ᐃᙱᐅᓯᐅᕐᓂᕐᒥ/ᐅᖃᓗᕋᐅᔭᐅᑎᓕᐅᕐᓂᕐᒥ ᐊᑭᑦᑐᕋᐅᑎᑎᑦᑎᓂᖓᓐᓂ.

ᐊᑭᑦᑐᕋᐅᑎᓂᖅ, ᐃᓚᒋᔭᐅᓚᐅᖅᑐᖅ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᕆᓚᐅᖅᑕᑎᓐᓂᒃ ᐱᓕᕆᓂᐅᓚᖅᑐᓂᑦ, ᑐᓂᓯᕕᐅᖃᑦᑕᕈᑎᒋᓚᐅᕐᖓᒋᑦ ᓵᓚᔅᓴᕋᓱᐊᕈᑕᐅᔪᓂᑦ ᓇᑭᑐᐃᓐᓇᑦᑎᐊᖅ ᕿᑭᖅᑕᓂ ᓄᓇᓕᓐᓂᑦ.

“ᐅᐱᒍᓱᑦᑐᖓ ᑕᑯᔭᕆᐊᔅᓴᖅ ᑕᒪᑐᒥᖓ ᐃᓕᖅᑯᓯᓕᕆᓂᕐᒥᒃ ᐅᖃᐅᓯᓕᕆᓂᕐᒥᓪᓗ ᐅᐱᒍᓲᑕᐅᔪᒥᒃ ᐊᔪᙱᓐᓂᖏᓐᓂᓪᓗ ᓴᖅᑭᔮᖅᑎᑦᑎᒍᑕᐅᔪᓂᑦ ᐃᓄᓐᓂᑦ ᕿᑭᖅᑕᓂ ᓄᓇᓕᖁᑎᑦᑎᓐᓂᑦ,” ᐅᖃᖅᑐᖅ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑖᒃᑯᐊ ᐃᙱᐅᓰᑦ ᐅᖃᓗᕋᐅᔭᐅᑏᓪᓗ ᓇᓗᓇᐃᕈᑕᐅᕗᑦ ᑲᓲᒪᔾᔪᑕᐅᓂᖏᓐᓂᒃ ᐃᓅᓱᑦᑐᖁᑎᑦᑎᓐᓄᑦ ᐃᓄᒃᑎᑑᖃᑦᑕᓂᕐᒧᑦ.”

ᐊᑭᑦᑐᕋᐅᑎᑎᑦᑎᓂᕐᒥ ᓵᓚᔅᓴᖅᑐᑦ ᐅᑯᐊᖑᕗᑦ:

• ᓯᕗᓪᓕᕐᐹᖓᓐᓂ ᓵᓚᔅᓴᖅᑐᖅ, $400ᓂᑦ ᓵᓚᔅᓴᖅᑐᖅ
  • • ᕕᐊᑭ Hᐊᓐ, ᐃᒃᐱᐊᕐᔪᒻᒥᐅᑕᔅᓴᔭ
    • ᓂᔾᔭᐅᓯᔭᖅᑎᐅᓪᓗᓂ ᐊᒥᓱᐊᓗᓐᓄᑦ ᑕᑯᓐᓈᖅᑕᐅᖃᑦᑕᓕᖅᑐᑦ ᑕᑯᓐᓇᕋᔅᓴᓕᐊᕆᓯᒪᔭᖏᑦ ᐊᒻᒪᓗ ᓴᖅᑭᖅᑎᖃᑦᑕᖅᑕᖏᑦ ᐃᓄᒃᑎᑑᖓᔪᑦ ᐃᙱᐅᓯᕆᕙᑦᑕᖏᑦ
    • ᕕᐊᑭ 2016ᖑᑎᓪᓗᒍ ᓵᓚᔅᓴᓚᐅᕐᓯᒪᔪᖅ ᓄᓇᕗᑦ ᒐᕙᒪᒃᑯᖏᑦ ᕿᓚᐅᑦ ᓱᕈᓯᕐᓄᑦ ᐃᙱᐅᓯᐅᕐᓂᕐᒥ ᐊᑭᑦᑐᕋᐅᑎᑎᑦᑎᓂᕆᔪᔭᖓᓐᓂ
    • ᒫᑦᓯ 2017ᖑᑎᓪᓗᒍ ᐱᒋᐊᕈᑕᐅᓚᐅᕐᓯᒪᔪᖅ ᑖᓐᔭ ᑕᒑᖅ ᑕᑯᕋᓐᓈᖅᑕᐅᓂᐅᓴᑎᓪᓗᒍ ᐱᖓᓐᓇᖓᓂ ᐃᓕᖅᑯᓯᓕᕆᕕᒻᒥ ᐅᐃᓂᐸᐃᒻᒥ
    • ᕕᐊᑭ ᑐᓂᓯᓚᐅᕐᖓᑦ ᓇᓪᓕᓐᓂᐅᑉ ᒥᔅᓵᓄᑦ ᐃᙱᐅᓯᓕᐊᒥᓂᖓᓂᒃ ᑕᐃᒎᓯᖃᖅᑐᓂ ᐃᒫᒃ “ᓇᓪᓕᒋᒐᒃᑭᑦ” ᕙᐃᔅᐳᒃᑯᑦ

• • ᑐᖏᓕᐊᓂ ᓵᓚᔅᓴᖅᑐᖅ, $300ᓂᑦ ᓵᓚᔅᓴᖅᑐᖅ
    • 19ᓂᑦ−ᐅᑭᐅᓕᒃ ᔮᓱᐊ Hᐊᐅᓕ ᐃᒡᓗᓕᒻᒥᐅᑕᖅ
    • ᔮᓱᐊ ᓵᓚᖃᓚᐅᕐᓯᒪᔪᖅ ᐊᓕᐊᓇᐃᑦ ᓂᔾᔭᐅᓯᔭᖅᑎᓂᑦ ᐊᑭᑦᑐᕋᐅᑎᑎᑦᑎᑎᓪᓗᒋᑦ
    • ᐃᙱᐅᓯᓕᐊᖓ “ᑭᖑᒧᖔᖅ” ᐃᑉᐱᓇᖅᑐᓂᑦ ᐅᖃᐅᓯᖃᕐᖓᑦ ᓇᓪᓕᒍᓱᓐᓂᖓᓂᒃ ᐊᑖᑕᖓᓂᒃ

• • ᐱᖓᔪᐊᓂᑦ ᓵᓚᔅᓴᖅᑐᖅ, $200ᓂᑦ ᓵᓚᔅᓴᖅᑐᖅ
    • 19ᓂᑦ−ᐅᑭᐅᓕᒃ ᑯᐃᓐᑎᓐ ᓵᓚ ᓴᓂᑭᓗᐊᕐᒥᐅᑕᖅ
    • ᑯᐃᓐᑎᓐ ᖁᕝᕙᓯᓐᓂᓕᒻᒥᒃ−12ᓂᑦ ᐃᓕᓐᓂᐊᖅᑎ ᐱᔭᕇᕐᕕᔅᓴᓕᒃ ᔫᓂᐅᓕᖅᑲᑦ.
    • ᐃᓄᐃᑦ ᐱᙳᐊᕈᓯᖏᓐᓄᑦ ᑲᒪᔨ/ᑐᑭᒧᐊᑦᑎᑦᑎᔨ ᐊᒻᒪᓗ ᐸᓖᓯᒃᑯᓐᓂ ᐅᐊᑦᑎᔨᐅᕙᑦᑐᖅ.
    • ᑐᓂᓯᓚᐅᕐᖓᑦ ᐅᖃᓗᕋᐅᔭᐅᑎᓕᐊᖓᓂᒃ ᑕᐃᒎᓯᓕᒃ ᐃᒫᒃ “ᐃᓅᓯᖅ” ᐱᔾᔪᑎᓕᒃ ᐃᓄᐃᑦ ᐊᓐᓇᐅᒪᔪᓐᓇᕐᓂᖏᓐᓂᒃ

ᓇᓕᖅᑲᖏᑦ ᓵᓚᔅᓴᕈᑎᖏᑕ ᑕᑯᔭᔅᓴᐅᕗᑦ ᑲᑐᔾᔨᖃᑎᒌᒃᑯᑦ ᖃᕋᓴᐅᔭᒃᑯᑦ ᑐᑭᓯᐅᒪᔾᔪᔅᓴᖃᕐᕕᖓᓐᓂ ᐊᒻᒪᓗ ᐃᓄᓕᒫᓄᑦ ᑐᓴᕋᔅᓴᓕᕆᔾᔪᑎᒋᕙᑦᑕᖏᓐᓂ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᓯᐅᕋHᐃ

ᐊᖓᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

(867) 975.8413

1.800.667.2742