ᑐᓵᔨᓂᑦ ᑐᑭᓕᐅᕆᔨᓂᓗ ᑲᑎᒪᑎᑦᑎᓂᖅ ᐃᖃᓗᓐᓂ
ᐃᖃᓗᐃᑦ, ᓄᓇᕗᑦ, ᓄᕖᕝᕙ 25, 2024 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᖁᕕᐊᓱᒃᖢᑎᒃ ᑐᓴᖅᑎᑦᑎᔪᒪᕗᑦ ᑐᓵᔨᓂᑦ ᑐᑭᓕᐅᕆᔨᓂᓪᓗ ᑲᑎᒪᑎᑦᑎᓛᕐᒪᑕ ᐃᖃᓗᓐᓂ ᕖᕝᕗᐊᓕ 3 ᐊᒻᒪᓗ ᕖᕝᕗᐊᓕ 6, 2025 ᐊᑯᓐᓂᖓᓂᑦ.
ᑖᓐᓇ ᑲᑎᒪᑎᑦᑎᓂᖅ ᐆᒃᑐᕋᖅᑕᐅᓗᓂ ᐱᓕᕆᐊᖑᓂᐊᕐᒪᑦ ᑐᑭᓯᒃᑲᓐᓂᕈᒪᓪᓗᑕ ᓇᑭᑦ ᓄᐊᑕᐅᓯᒪᔪᓂᑦ ᐅᖃᐅᓯᕐᓂᑦ ᐱᔪᓐᓇᕐᒪᖔᑖᒃ ᐊᒻᒪᓗ ᐅᖃᐅᓯᓕᐅᕐᓗᑎᒃ ᐅᖃᐅᓯᓕᐅᖅᑕᐅᔭᕆᐊᓕᖕᓂᑦ. ᓯᕗᓂᕐᒥᒃ ᐸᕐᓇᒃᓯᒪᓛᕐᒥᔪᑦ ᑐᓵᔨᓂᑦ ᑐᑭᓕᐅᕆᔨᓂᓪᓗ ᕿᑭᖅᑕᓗᓕᒫᒥᒃ ᑲᑎᒪᑎᑦᑎᔪᓐᓇᕐᓛᕐᓗᑎᒃ ᑐᑭᓯᓯᒪᓕᕈᑦᑕ ᓇᑭᑦ ᐃᑲᔪᕈᑎᒃᓴᖅᑖᕈᓐᓇᕐᒪᖔᑖᒃ ᓱᕐᓗ ᑐᑭᓕᐅᖅᓯᒪᔪᓂᒃ ᐅᖃᐅᓯᓕᐊᓂᒃ ᐃᓄᐃᑦ ᐱᒋᐊᖃᖅᑕᖏᓐᓂᑦ.
ᕿᑭᖅᑕᓃᒃᑯᑦ ᖃᐅᔨᒪᔪᑦ ᑐᑭᓯᐅᒪᓪᓗᑎᓪᓗ ᐅᖃᓕᒫᒐᓂᒃ ᑐᑭᓕᐅᖅᓯᒪᔪᓂᑦ ᐱᑕᖃᑦᑎᐊᙱᓐᓂᖓᓂᒃ ᐊᒻᒪᓗ ᐃᓕᓐᓂᐊᒐᒃᓴᖅᑕᖃᑦᑎᐊᙱᓐᓂᖓᓂᒃ ᐃᓄᖕᓄᑦ ᕿᑭᖅᑕᓂᒥᐅᓄᑦ ᐅᖃᐅᓯᓕᕆᔨᐅᔪᑦ ᓴᐳᔾᔨᔨᒻᒪᕆᐅᑎᓪᓗᒋᑦ ᐊᒻᒪᓗ ᑐᓵᔨᐅᓂᕐᒧᑦ ᑐᑭᓕᐅᕆᓂᕐᒧᓪᓗ ᐱᔨᑦᓯᕋᓲᓂᒃ. ᑖᓐᓇ ᑲᑎᒪᓂᖅ ᐱᒋᐊᕈᑎᑦᑎᐊᕙᐅᓂᐊᖅᑐᖅ ᑕᐅᖅᓰᖃᑦᑕᐅᔪᓐᓇᕐᓂᐊᕐᓗᑎᒃ ᖃᐅᔨᒪᓂᕆᔭᑦᑎᓐᓂᒃ ᐊᒻᒪᓗ ᐅᖃᐅᓯᖅᑕᓕᐊᖑᓯᒪᔪᓂᑦ.
ᐃᖃᓗᓐᓃᓐᓂᐊᕈᕕᑦ ᕖᕝᕗᐊᓕ 3ᒥᑦ − 6ᒧᑦ, 2025ᒥ, ᐊᒻᒪᓗ ᐃᓚᐅᔪᒪᒍᕕᑦ ᑲᑎᒪᓂᕐᒥᒃ, ᖃᐅᔨᒋᐊᕐᕕᒋᔪᓐᓇᖅᑕᐃᑦ ᑭᐊᕋᓐ ᕙᓚᕋᑎ ᐅᕗᖓ kflaherty@qia.ca. ᐃᑭᐊᕐᕆᕕᒃᑯᑦ ᑕᑕᑎᒐᒃᓴᐅᒋᓪᓗᓂ ᐅᕘᓇ: https://www.qia.ca/applications/interpreter-translator-conference/
ᐃᑲᔪᖅᑕᐅᑐᐃᓐᓇᕆᐊᓖᑦ ᑕᐃᒃᑯᐊ ᐅᖃᐅᓯᓕᕆᓂᕐᒧᑦ ᖃᐅᔨᒪᔨᑕᐅᔪᑦ ᐃᖃᓗᐃᑦ ᓯᓚᑖᓃᑦᑐᓂᒃ..
ᑲᑎᒪᑎᑦᑎᓂᐊᖅᑐᑦ 70ᑎᓪᓗᐊᓂᒃ ᐃᓄᖕᓂᒃ. ᐊᒥᓲᑉᐸᑕᓗ ᐃᓚᐅᔪᒪᔪᑦ, ᓯᕗᓪᓕᐅᔾᔨᓂᐊᖅᑐᑦ ᐃᓄᖕᓂᑦ ᕿᑭᖅᑕᓂᒥᐅᓂᒃ ᓇᖕᒥᓂᖅᓱᖅᑐᓄᑦ ᓇᖕᒥᓂᖃᖅᑐᓄᑦ ᐊᒻᒪᓗ ᐅᕝᕙᓘᓐᓃᑦ ᐃᓕᓐᓂᐊᖅᑐᓂᒃ ᑐᓵᔨᐅᓂᕐᒧᑦ ᑐᑭᓕᐅᕆᔨᐅᓂᕐᒧᓪᓗ.
ᑐᑭᓯᒍᑎᒃᓴᓂᒃ ᓴᖅᑎᑦᑎᒃᑲᓐᓂᓛᖅᐳᒍᑦ ᔭᓐᓄᐊᓕ 2025ᒥ.
ᑐᑭᓯᒃᑲᓐᓂᕈᒍᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᓂᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐊᑭᖃᙱᑦᑐᒧᓪᓘᓐᓃᑦ 1.800.667.2742
kflaherty@qia.ca
