ᕿᑭᖅᑕᓂᒃᑯᑦ ᖁᕕᐊᓱᖃᑎᖃᕐᓂᖏᓐᓂᒃ ᓇᓗᓇᐃᕐᓯᔪᒪᕗᑦ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ ᐃᓚᒋᔭᐅᓚᐅᖅᑐᓂᑦ ᕿᑭᖅᑕᓂ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᑎᑦᑎᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᒥ  (Q-STEP) ᐱᓕᕆᐊᕐᒥ. ᓯᑎᐱᕆ 24ᖑᑎᓪᓗᒍ, ᑕᓪᓕᒪᑦ ᐃᓄᐃᑦ ᐱᔭᕇᔪᒻᒪᑕ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ ᓄᓇᒃᑰᕈᑎᕐᔪᐊᓂᑦ ᐊᖁᑎᐅᓂᕐᒥ (HEO) ᐃᓕᓐᓂᐊᓂᕐᒥ ᒧᐊᕆᔅᕘᒡ, ᐋᓐᑎᐅᕆᐅᒥ.

ᖁᕕᐊᒃᑯᑎᕙᕗᑦ ᑖᒃᑯᐊ ᐃᓪᕖᓇ ᓈᑕᓇᐃ, ᐃᒃᐱᐊᕐᔪᒻᒥᑦ, ᑎᐊᓂᔅ ᑕᖃᐅᒐᖅ, ᐃᒡᓗᓕᒻᒥᑦ, ᕗᕌᑦ ᓄᑕᕋᖅ, ᒥᑦᑎᒪᑕᓕᒻᒥ, ᑖᓂᐊᓕ ᑰᑑ, ᐃᖃᓗᓐᓂᑦ ᐊᒻᒪᓗ ᒪᐃᔭ ᓇᑦᑐᖅ, ᓴᓂᕋᔭᒻᒥᑦ.

ᐱᔾᔪᑎᒋᓪᓗᒍ ᖃᓂᒪᓇᖅᑐᖅᑕᖃᕐᓂᖓ ᓄᓇᕐᔪᐊᓕᒫᒥ, ᐱᔭᕆᐊᑐᓯᒪᒻᒪᑦ ᐃᓕᓐᓂᐊᓚᐅᖅᑐᓄᑦ ᐱᔭᕇᕐᓯᓇᓱᓐᓂᕐᒥᒃ ᓄᓇᒃᑰᕈᑎᕐᔪᐊᓂᑦ ᐊᖁᑎᐅᓂᕐᒥᒃ ᐃᓕᓐᓂᐊᓂᕐᒥᒃ. ᑖᒃᑯᐊ ᑕᓪᓕᒪᑦ ᐃᓕᓐᓂᐊᔪᔪᑦ ᐃᓕᓐᓂᐊᕆᐊᕆᐊᙵᓚᐅᕐᓯᒪᔪᑦ ᒧᐊᕆᔅᕘᒡᒥ ᕖᕝᕗᐊᓕᐅᑎᓪᓗᒍ 2020. ᐊᑦᑕᕈᓲᑕᐅᓪᓗᓂ ᐊᑦᑕᓇᖅᑐᒦᖁᓇᒋᓪᓗ, ᐃᓕᓐᓂᐊᕐᓂᖓᑦ ᓄᖅᑲᖅᑎᑕᐅᑲᐃᓐᓇᔪᒻᒪᑦ, ᑕᐃᒫᓪᓗ ᐅᑎᔪᒻᒪᑕ ᓄᓇᖏᓐᓄᑦ ᒫᑦᓯ 2020ᑎᓪᓗᒍ ᖃᓂᒪᓇᖅᑐᖅ ᐱᒋᐊᖅᑎᓪᓗᒍ. ᐱᒃᑯᒍᓱᑉᐳᒍᑦ ᑖᒃᑯᓂᖓ ᐃᓕᓐᓂᐊᓚᐅᖅᑐᓂᑦ ᐱᓇᓱᐊᑦᑎᐊᖏᓐᓇᓚᐅᕐᖓᑕ ᐱᔭᕆᐊᑐᔪᒃᑰᕋᓗᐊᖅᑎᓪᓗᑕ ᐊᒻᒪᓗ ᐱᔭᕇᕐᓯᓪᓗᑎᒃ ᐃᓕᓐᓂᐊᕈᑎᖏᓐᓂᒃ.

ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ ᐃᓕᒃᑲᓐᓂᕈᑕᐅᓪᓚᕆᖃᑦᑕᕐᖓᑦ ᕿᑭᖅᑕᓂ ᓄᓇᓕᐅᔪᓄᑦ ᐃᓄᓐᓄᑦ, ᐃᓕᓐᓂᐊᑎᑦᑎᓗᐊᕐᐸᑦᑐᑎᒃ ᐅᔭᕋᓐᓂᐊᕐᕕᓕᕆᓂᕐᒨᖓᔪᓂᑦ. ᑕᕝᕙᓂ ᐃᓕᓐᓂᐊᑎᑦᑎᓂᐅᕙᑦᑐᖅ ᐱᔭᕇᕐᓯᔪᓄᑦ ᐱᕙᓪᓕᐊᒍᑕᐅᔪᓐᓇᐸᒻᒪᑦ ᐊᑑᑎᓕᒻᒥᒃ ᐃᖅᑲᓇᐃᔮᖃᕐᓂᕐᒧᑦ ᐅᔭᕋᓐᓂᐊᕐᕕᒻᒥ ᐅᕝᕙᓘᓐᓃᑦ ᓇᓂᓯᓂᕐᒧᑦ ᐃᖅᑲᓇᐃᔮᔅᓴᓂᑦ ᓄᓇᖏᓐᓂ.

ᐃᓄᐃᑦ ᐊᑎᓕᐅᖃᑦᑕᕈᓐᓇᖅᑐᑦ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒧᑦ ᐊᖅᑯᑎᒋᓗᒍ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᒋᔭᐅᔪᓐᓇᖅᑐᓄᑦ ᑐᑭᓯᐅᒪᔾᔪᑎᔅᓴᖃᕐᕕᖓᑎᒍᑦ, ᑐᑦᑕᕐᕕᒃ. ᑖᓐᓇ ᖃᕋᓴᐅᔭᒃᑯᑦ ᐊᑐᖅᑕᐅᖃᑦᑕᕈᓐᓇᖅᑐᖅ ᐃᓚᖃᕐᒥᔪᖅ ᐃᖅᑲᓇᐃᔮᔅᓴᓂᑦ ᓴᖅᑭᑎᑦᑎᕕᐅᕙᑦᑐᓂ, ᐃᖅᑲᓇᐃᔮᖅᑖᕋᓲᑎᓂᑦ ᐋᖅᑭᔅᓱᐃᔾᔪᑕᐅᔪᓐᓇᖅᑐᓂ ᐊᒻᒪᓗ ᖃᐅᔨᒃᑲᐃᔾᔪᑎᖃᕐᐸᑦᑐᑦ ᐱᓇᓱᐊᕋᔅᓴᖅᑕᖃᓕᕋᐃᒻᒪᑦ ᓲᕐᓗ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᑎᒍᑦ ᐃᓕᓐᓂᐊᕋᔅᓴᓂᑦ. ᐅᖃᕐᕕᐅᖃᑦᑕᖅᑕ ᑎᑎᕋᕐᕕᐅᓗᑕ ᐅᕗᖓ Tuttarvik@QIA.ca ᑐᑭᓯᒃᑲᓂᕐᓂᐊᕋᔅᓯ.