ᐊᖓᔪᖅᑳᖅ ᐊᕿᐊᕈᖅ ᐅᐱᒍᓱᒃᐳᖅ ᒥᐊᓕ ᓴᐃᒪᓐᒥ ᑎᒃᑯᐊᖅᑕᐅᓂᖓᓄᑦ ᑯᐃᓐ ᑭᒡᒐᖅᑐᐃᔨᐅᓂᐊᕐᓗᓂ
ᐃᖃᓗᐃᑦ, ᓄᓇᕗᑦ –ᔪᓚᐃ 6, 2021 – ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ ᐅᐱᒍᓱᑦᑎᐊᖅᑐᖅ ᒥᐊᓕ ᓴᐃᒪᓐᒥ ᑎᓕᔭᐅᕋᑖᓚᐅᕐᓂᖓᓄᑦ ᑲᓇᑕᒥ ᑯᐃᓐ ᑭᒡᒐᖅᑐᕆᓂᐊᓕᖅᖢᓂᐅᒃ.
“ᐅᓪᓗᒥ, ᐅᐱᒋᕙᕋ ᒥᐊᓕ ᓴᐃᒪᓐ ᐊᑐᕋᑦᑕ ᐊᑐᖅᑕᐅᓚᐅᖅᓯᒪᙱᑦᑐᒥᒃ ᑎᓕᔭᐅᓂᕆᔭᖓᓂᒃ. ᐱᓕᕆᐊᕆᓯᒪᔭᖏᑦ ᐃᖅᑲᓇᐃᔮᖃᖃᑦᑕᖅᑎᓪᓗᒍ ᑭᒡᒐᖅᑐᐃᖏᓐᓇᖅᖢᒋᑦ ᐃᓄᐃᑦ ᐱᔪᓐᓇᐅᑎᒋᔭᖏᓐᓂᒃ ᑲᔪᓯᑎᑦᑎᒐᓱᐊᖃᑦᑕᖅᖢᓂ ᑕᐃᒪᐃᒻᒪᓪᓗ ᑎᒃᑯᐊᖅᓯᑦᑎᐊᖅᐳᑦ ᑲᓇᑕᒥ ᑯᐃᓐ ᑭᒡᒐᖅᑐᐃᔨᐅᓂᐊᖅᑐᒥᒃ”, ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ “ᓇᓗᓇᐃᕈᒪᓪᓗᒍᑦᑕᐅᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑖᓐ ᐆᐱᑦ ᐃᑲᔪᖃᑕᐅᓯᒪᓂᖓᓂᒃ ᓂᕈᐊᖅᖠᖅᐸᓪᓕᐊᑎᓪᓗᒋᑦ, ᓯᕗᓪᓕᖅᑎᐅᓂᖓ ᐃᑲᔪᒻᒪᕆᓚᐅᖅᑐᖅ ᐅᓪᓗᒥ ᐊᑐᖅᑕᐅᓯᒪᙱᑦᑐᒥᒃ ᑐᓴᖅᑎᑦᑎᑎᓪᓗᒋᑦ.”
ᒥᐊᓕ ᓴᐃᒪᓐ ᐃᓅᓚᐅᖅᑐᖅ ᑲᖏᖅᓱᐊᓗᔾᔪᐊᕐᒥ, ᓄᓇᕕᖕᒥ ᐊᒻᒪᓗ ᐱᒻᒪᕆᐅᔪᓂᒃ ᐃᖅᑲᓇᐃᔮᖃᖃᑦᑕᖅᓯᒪᓪᓗᓂ ᐱᖃᓯᐅᑎᓪᓗᒋᑦ ᑲᒥᓴᓇᐅᖃᑕᐅᓂᕐᒥᒃ ᓄᓇᕗᒥ ᐊᑐᓕᕆᐊᖃᖅᑐᓂᒃ ᑲᒥᓴᖓᓂᒃ, ᑲᓇᑕᒥᓗ ᓯᕗᓪᓕᖅᐹᖑᓪᓗᓂ ᑭᒡᒐᖅᑐᐃᔨᒋᔭᐅᓯᒪᓪᓗᓂ ᓄᓇᕐᔪᐊᕐᒥᐅᓄᑦ ᑐᕌᖓᔪᓂᒃ ᐱᓕᕆᐊᓂᒃ, ᐋᔩᕋᖅᑎᒻᒪᕆᐅᓯᒪᓪᓗᓂ ᓴᖅᑭᑕᐅᕙᓪᓕᐊᓂᐊᓕᖅᑎᓪᓗᒍ ᐅᑭᐅᖅᑕᖅᑐᒥ ᑲᑎᒪᔨᕐᔪᐊᖏᑦ, ᑭᒡᒐᖅᑐᐃᔨᐅᓪᓗᓂ ᑎᐊᓐ ᒫᒃᑯᓐᓂ, ᐊᒻᒪᓗ ᐊᖓᔪᖅᑳᖑᓯᒪᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ.
ᒥᐊᓕ ᓴᐃᒪᓐ ᐊᔾᔨᒌᙱᑦᑐᓂᒃ ᐊᒥᓱᓂᒃ ᐃᓕᑕᕆᔭᐅᔾᔪᑎᑖᖅᓯᒪᔪᖅ ᐃᖅᑲᓇᐃᔭᖃᑦᑕᖅᑎᓪᓗᒍ ᐱᖃᓯᐅᑎᓪᓗᒋᑦ ᑲᓇᑕᒥ ᐃᓕᑕᕆᔭᐅᔾᔪᑎᒥᒃ, ᑯᐸᐃᖕᒥ ᐃᓕᑕᕆᔭᐅᔾᔪᑎᒥᒃ ᒎᓕᒥᒃ ᐃᓕᑕᕆᔭᐅᔾᔪᑎᒥᒃ ᑲᓛᖦᖡᑦ ᓄᓇᖓᓂᑦ, ᐊᒻᒪᓗ ᑲᓇᑕᒥ ᓄᓇᖃᖅᑐᑐᖃᓄᑦ ᐃᓕᑕᕆᔭᐅᔾᔪᑎᒥᒃ.
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᕕᐅᓪ ᕼᐋᑉᑭᓐᔅ, ᑐᑭᒧᐊᒃᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742