ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒃᖢᑎᒃ ᐃᓚᒋᔭᐅᓂᐊᖅᑐᑦ ᑕᕝᕙᓂ ᐊᕐᕌᒍᒥ ᓄᓇᕗᒥ ᐸᖓᒍᔾᔨᓂᐅᓂᐊᖅᑐᒥᑦ ᐃᒡᓗᓕᖕᒥᑦ ᐃᒃᐱᐊᕐᔪᖕᒧᑦ.  ᑖᓐᓇ ᐊᕐᕌᒍᑕᒫᑦ ᐱᓕᕆᐊᖑᕙᒃᑐᖅ ᓴᖅᑭᔮᖅᑎᑦᑎᓪᓗᓂ ᐃᓄᐃᑦ ᐱᔪᓐᓇᕐᓂᕆᔭᖏᓐᓂᒃ ᐱᐅᓯᕆᔭᖓᓂᓗ ᐊᒃᓱᕈᓐᓇᕐᓂᐊᖅᑐᒥᒃ ᐱᒋᐊᕐᓂᖓᓂᑦ ᐱᔭᕇᕐᓂᖓᓄᑦ.

7−ᓄᑦ ᐅᓪᓗᓄᑦ ᐃᖏᕐᕋᓂᐊᕋᓱᒋᔭᐅᔪᑦ ᐄᐳᓪ 11ᒥᑦ ᐱᒋᐊᕐᓗᑎᒃ ᐃᒡᓗᓕᖕᒥᑦ ᐊᐅᓪᓚᕐᓗᑎᑦ.  ᑕᕝᕙᓂ ᐊᕐᕌᒍᒥ, ᕿᑭᖅᑕᓃᒃᑯᑦ ᖁᕕᐊᓱᒃᑐᑦ ᒪᓕᒍᒪᔪᑦ ᒪᓕᒍᓐᓇᕐᓂᐊᕐᒪᑕ ᐊᔾᔨᒌᙱᑦᑐᒃᑯᑦ ᐊᒻᒪᓗ ᑐᑭᓯᒃᑲᓐᓂᕈᓐᓇᕐᓗᑎᒃ ᐸᖓᒍᔾᔨᓂᐅᔪᒥᒃ.  ᑕᕝᕙᓂ ᐱᓇᓱᐊᕈᓯᕐᒥ ᐱᒋᐊᕐᓗᒍ, ᐅᖃᐅᓯᖃᖃᑦᑕᕐᓂᐊᖅᑐᒍᑦ ᕿᒧᒃᓯᐅᕐᓂᐅᑉ ᒥᒃᓵᓄᑦ ᐃᓄᖕᓄᑦ ᕿᑭᖅᑕᓂᒥᐅᓂᒃ, ᐊᒻᒪᓗ ᑐᑭᓯᒃᑲᓐᓂᕐᓗᒋᑦ ᑭᒃᑰᓂᖏᓐᓂᒃ ᕿᒧᒃᓯᖃᐅᑕᓂᐊᖅᑐᑦ.  ᑕᑯᖃᑦᑕᕈᓐᓇᕐᓂᐊᖅᑐᑎᑦ ᕿᒧᒃᓯᖅᑐᑦ ᐱᕙᓪᓕᐊᓂᖏᓐᓂᒃ ᖃᕆᓴᐅᔭᒃᑯᑦ ᐊᒻᒪᓗ ᑐᑭᓯᓗᒋᑦ ᐋᖅᑭᒃᓱᐃᔨᑦ ᑭᓇᒃᑰᓂᖏᓐᓄᑦ.

2019ᒥ, ᒐᕙᒪᑐᖃᒃᑯᑦ ᒪᒥᐊᓚᐅᖅᓯᒪᖕᒪᑕ ᐃᓄᖕᓄᑦ ᕿᑭᖅᑕᓂᒥᐅᓄᑦ ᐊᒻᒪᓗ ᑕᐃᒪᐃᒻᒪᑦ ᐱᓕᕆᑦᑎᐊᖅᓯᒪᓂᖏᓐᓄᑦ ᐃᓚᒋᔭᐅᓚᐅᖅᑐᓄᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂ.  ᒪᒥᐊᕝᕕᐅᑎᓪᓗᒋᑦ, ᕿᑭᖅᑕᓃᒃᑯᑦ ᓇᓗᓇᐃᖅᓯᓚᐅᖅᑐᑦ ᑐᓂᓯᖃᑦᑕᕐᓂᐊᖅᖢᑎᒃ $100,000-ᑖᓚᓂᒃ ᐊᕐᕌᒍᑕᒫᑦ ᐋᖅᑭᒃᓱᐃᔨᓄᑦ ᓄᓇᕗᒥ ᐸᖓᒍᔾᔨᓂᕐᒧᑦ ᓴᙱᓕᖅᑎᒃᑲᓐᓂᕋᓱᓪᓗᒍ ᕿᒻᒥᓕᕆᓂᖅ ᕿᑭᖅᑖᓗᖕᒥ.

ᐊᑏ, ᖁᕕᐊᓱᓪᓗᑕ ᐃᑲᔪᖅᑐᕐᓂᐊᖅᐸᕗᑦ ᐃᓅᖃᑎᕗᑦ ᕿᒧᒃᓯᕐᓂᐊᖅᑎᓪᓗᒋᑦ ᓄᓇᒃᑯᑦ ᑲᔾᔮᕐᓇᖅᑐᒥᒃ!

ᐋᖅᑭᒃᓱᐃᔨᑦ ᑭᓇᒃᑰᓂᖏᑦ

ᕉᑕ ᓈᑕᓇᐃᓐ

ᕉᑕ ᐃᒃᐱᐊᕐᔪᒥᐅᑕᕐᒃ  ᐃᓚᒋᔭᐅᖏᓐᓇᕐᒪᑦ ᐋᖅᑭᒃᓱᐃᔨᐅᖃᑕᐅᓪᓗᓂ ᓄᓇᕗᒥ ᐸᖓᒍᔾᔨᓂᕐᒧᑦ ᖃᓄᑐᐃᓐᓇᖅ ᐃᑲᔪᖅᐸᒃᖢᓂ 5ᖑᓕᖅᑐᓂᒃ ᐊᕐᕌᒍᓂ, ᑭᓯᐊᓂ ᕿᒻᒥᓕᕆᔪᓐᓇᖅᓯᓯᒪᔪᖅ ᑕᐃᒪᙵᓂᑦ ᐃᓅᓚᐅᕋᒥᓂᑦ.  ᓱᓕ, ᖃᒧᑎᒥᒃ ᐃᓅᓚᐅᖅᓯᒪᔪᖅ, ᕿᒧᒃᓯᖅᑎᓪᓗᒋᑦ ᒪᓂᕋᐅᙱᑦᑐᒃᑯᑦ! ᕉᑕ ᖁᕕᐊᒋᔭᖃᖅᑐᖅ ᐸᕐᓇᐃᔨᐅᖃᑕᐅᓂᕐᒥᒃ ᓄᓇᕗᒥ ᐸᖓᒍᔾᔨᓂᕐᒧᑦ ᖃᓄᐃᓕᐅᕈᑎᐅᓂᐊᖅᑐᓂᒃ.  ᖁᕕᐊᓱᖃᑦᑕᖅᖢᓂ ᐃᓅᓱᒃᑐᑦ ᐃᓚᐅᕙᓪᓕᐊᓕᕐᓂᖏᓐᓄᑦ, ᐅᖃᖅᖢᓂ ᐃᓐᓇᐅᓂᖅᓴᐃᑦ ᓵᓚᖃᕋᔪᖕᓂᖅᓴᐅᖃᑦᑕᓚᐅᖅᓯᒪᓂᖏᓐᓄᑦ.  ᕉᑕ ᓂᕆᐅᒋᔭᖃᖅᑐᖅ ᑐᙵᓱᒃᑎᑦᑎᔨᐅᓂᐊᖅᑐᓂᒃ ᓄᓇᓕᐅᔪᒥᒃ ᖁᕕᐊᓇᖕᒪᑦ ᕿᒧᒃᓯᖅᑐᑦ ᑎᑭᑉᐸᓪᓕᐊᑎᓪᓗᒋᑦ, ᐅᓂᒃᑳᖅᑎᓪᓗᒋᓪᓗ ᐅᓐᓄᒃᑯᑦ ᑕᒻᒫᖅᓯᒪᓕᕌᖓᑕ.

ᒨᓯᓯ ᐆᔪᑯᓗᒃ

ᒨᓯᓯ ᐃᒃᐱᐊᕐᔪᕐᒥᐅᑕᕐᒃ ᐃᓚᒋᔭᐅᓯᒪᔪᖅ ᓄᓇᕗᒥ ᐸᖓᒍᔾᔨᓂᕐᒥᒃ 1999ᒥᓂᑦ.  ᐱᒋᐊᓚᐅᖅᓯᒪᔪᖅ ᑕᐃᔅᓱᒪᓂ ᒪᐃᔭᐅᑎᓪᓗᒍ ᐃᒃᐱᐊᕐᔪᖕᒥ, ᐊᒻᒪᓗ ᑕᐃᔅᓱᒪᓂ ᐃᓱᒪᒃᓴᖅᓯᐅᕈᑎᒋᔭᒥᓂᒃ ᓴᖅᑭᑎᑦᑎᓚᐅᖅᓯᒪᔪᖅ ᕿᒧᒃᓯᕕᔾᔪᐊᕐᓂᖅᑕᖃᖁᔨᓪᓗᓂ ᐅᒃᐱᕆᔭᖃᖅᖢᓂ ᕿᒧᒃᓯᖃᑦᑕᕐᓂᖅ ᐃᓕᖅᑯᓯᕐᓗ ᒪᑭᒃᑲᓐᓂᕈᓐᓇᕋᓱᒋᓪᓗᓂᐅᒃ.  ᒨᓯᓯ ᓇᖕᒥᓂᖅ ᕿᒻᒥᑖᓚᐅᖅᓯᒪᔪᖅ ᐃᓅᓱᒃᑐᓪᓗᓂ ᐊᒻᒪᓗ ᐱᒃᑯᒍᓱᒃᖢᓂ ᐃᓅᓱᒃᑐᑦ ᐃᓚᐅᕙᓪᓕᐊᓂᖏᓐᓄᑦ.  ᒨᓯᓯ ᐅᖃᖅᑐᖅ ᕿᒧᒃᓯᖅᑐᑦ ᑕᒻᒫᓕᕌᖓᑕ, ᐅᓂᒃᑳᖅᑐᖃᓕᓲᖑᖕᒪᑦ ᐊᑐᖅᑕᐅᓯᒪᔪᓂᒃ ᐊᒻᒪᓗ ᐱᕕᓴᑦᑎᐊᕙᐅᓪᓗᓂ ᐃᓅᓱᒃᑐᓂᒃ ᐃᓕᒍᓐᓇᕐᓗᑎᒃ ᓈᓚᒍᓐᓇᕐᓗᑎᓪᓗ ᑕᒪᒃᑯᓂᖓ ᐊᑐᖅᑕᐅᕙᓚᐅᖅᑐᓂᑦ ᑕᐃᔅᓱᒪᓂ.

ᑖᓐᔭ ᕼᐊᐅᓕ

ᑖᓐᔭ ᕼᐊᐅᓕ  ᐋᖅᑭᒃᓱᐃᔨᐅᖃᑕᓪᓗᐊᑕᖅᑐᑦ ᑕᒪᑐᒪᓂᑦ ᐊᕐᕌᒍᒥ ᓄᓇᕗᙵ ᐸᖓᒍᔾᔨᓂᕐᒥ ᐊᐅᓪᓚᕐᕕᒋᓂᐊᖅᑕᖓᓂᑦ.

ᑖᓐᔭ 30ᓂ ᐊᕐᕌᒍᓕ ᐃᒡᓗᓕᖕᒥᐅᑕᖅ ᐸᕐᓇᐃᓐᓇᖅᑐᖅ ᐸᖓᒍᔾᔨᓂᕐᒧᑦ.

ᐃᓚᐅᖃᑦᑕᙱᒃᑲᓗᐊᖅᑎᓪᓗᒍ ᕿᒧᒃᓯᕐᔪᐊᖅᑐᓂᒃ, ᐃᓚᒋᔭᐅᓕᓚᐅᖅᓯᒪᔪᖅ ᐅᐃᖓ/ᐊᐃᑉᐸᖓ ᐊᒻᒪ ᐊᓂᖓ ᐃᓚᐅᑎᓪᓗᒋᑦ ᓱᒃᑲᓴᐅᑎᓂᐅᔪᒥᒃ.  ᓄᓇᕗᒥ ᐸᖓᒍᔾᔨᓂᕐᒧᑦ ᑲᑎᒪᔨᕋᓛᖏᓐᓂ ᑲᑎᒪᔨᙳᖃᑕᐅᓚᐅᖅᑐᖅ.

ᑐᒃᓯᕋᐅᑎᓕᐅᖏᓐᓇᖅᑐᖅ ᑮᓇᐅᔭᓂᒃ ᑐᐱᖅᓱᖅᖢᑎᒃ, ᑮᓇᐅᔭᖅᑑᑎᒃᓴᓂᓪᓗ ᐋᖅᑭᒃᓱᐃᓪᓗᓂ, ᐋᖅᑭᒃᓱᐃᓪᓗᓂᓗ ᖃᓄᐃᓕᐅᕈᑎᐅᓂᐊᖅᑐᓂᒃ ᐊᒻᒪᓗ ᑲᑎᒪᖃᑎᖃᖃᑦᑕᖅᑐᖢᓂ ᐊᓯᖏᓐᓂᑦ ᓄᓇᓕᖕᓂ ᑲᑎᒪᔨᕋᓛᖃᖃᑕᐅᔪᓂᒃ ᐊᒻᒪᓗ ᑮᓇᐅᔭᓂᒃ ᑲᑎᑎᑦᑎᓪᓗᓂ.

ᐋᖅᑭᒃᓱᐃᔨᐅᓯᒪᓕᖅᑐᖅ ᐸᖓᒍᔾᔨᓂᕐᒥᒃ ᒪᕐᕈᐃᓕᖅᖢᓂ.  ᐅᖃᖅᑐᖅ ᐃᓕᑉᐸᓪᓕᐊᖏᓐᓇᕐᒪᑦ ᐊᒥᓱᓂᓗ ᐃᓕᓯᒪᓕᖅᖢᓂ.

ᑖᓐᔭ ᓂᕆᐅᒋᔭᖃᖅᑐᖅ ᑕᒪᒃᑯᐊ ᐸᖓᒍᔾᔨᓂᐊᖅᑐᑦ ᐃᖏᕐᕋᑦᑎᐊᖁᓇᕐᓂᐊᖅᑐᑦ ᑕᕝᕙᓂ ᐊᕐᕌᒍᒥ.