ᐅᓪᓗᒥ ᑲᓇᑕᒥ ᓄᓇᖃᖅᑳᖅᑐᓄᑦ ᐅᓇᑕᖃᑕᐅᓚᐅᕐᓯᒪᔪᓄᑦ ᐅᓪᓗᕆᔭᐅᒻᒪᑦ ᓯᕗᓂᐊᒍᑦ ᐃᖅᑲᐅᒪᑦᑎᓂᕐᒧᑦ ᐅᓪᓗᕆᔭᐅᓲᑉ ᐅᓇᑕᓚᐅᕐᓯᒪᔪᓂᑦ ᓄᕕᐱᕆ 11ᒥ.
ᐊᒥᓲᙱᒻᒪᑕ ᐃᓄᐃᑦ ᒫᓐᓇ ᐅᓇᑕᖅᑎᓄᑦ ᐃᓚᒋᔭᐅᔪᑦ ᐅᕝᕙᓘᓐᓃᑦ ᐃᓚᒋᔭᐅᓚᐅᕐᓯᒪᔪᓂᑦ ᐱᑕᖃᕐᖓᑦ ᑲᓇᑕᒥ ᐅᓇᑕᖅᑐᔅᓴᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᑯᔭᐅᖁᔨᒻᒪᑕ ᑖᔅᓱᒥᖓ ᐃᓄᒻᒥᒃ ᑕᕝᕙᓂ ᐱᒻᒪᕆᐅᒋᔭᐅᔪᒥ ᐅᓪᓗᕐᒥ.
Corporal Hᐊᐅᓕ ᐃᔨᑦᓯᐊᖅ (ᐃᔨ) ᐃᓚᒋᔭᐅᒻᒪᑦ ᐊᒥᓲᙱᑦᑐᓄᑦ ᐃᓄᓐᓄᑦ ᐅᓇᑕᖅᑐᔅᓴᓂᑦ ᑲᓇᑕᒥ ᐅᓇᑕᖅᑐᔅᓴᖁᑎᒋᔭᐅᔪᓂᑦ, ᑖᓐᓇ 22ᓂᑦ ᐊᕐᕌᒍᓂᑦ ᐱᔨᑦᑎᕐᓯᒪᔪᔪᖅ ᐊᒻᒪᓗ ᓄᖅᑲᐅᔾᔨᔪᔪᖅ ᑕᒪᑐᒥᖓ 2008ᖑᑎᓪᓗᒍ.
ᑖᓐᓇ ᐃᖃᓗᒻᒥᐅᑕᔅᓴᔭᐅᓪᓗᓂ, ᐱᒋᐊᓚᐅᕐᓯᒪᔪᖅ ᐅᓇᑕᖅᑐᔅᓴᐅᓂᕐᒥᒃ ᐃᖅᑲᓇᐃᔮᖃᕐᓂᕐᒥᒃ 1985ᖑᑎᓪᓗᒍ.
1986ᒥ, ᐱᔭᕆᐊᑐᔪᕐᔪᐊᕌᓗᒻᒥ 22ᓂᑦ ᐱᓇᓱᐊᕈᓯᕐᓂᑦ ᐃᓕᓐᓂᐊᕆᐊᓚᐅᕐᓯᒪᔪᖅ ᐅᓇᑕᖅᑐᔅᓇᓂᑦ ᐋᖅᑭᐅᒪᑎᑦᑎᔨᐅᓂᕐᒧᑦ ᑕᐃᑲᓂ ᐃᖅᑲᓇᐃᔭᓚᐅᕐᓯᒪᔪᖅ ᐅᓇᑕᖅᑐᔅᓴᓄᑦ ᐊᖁᑎᐅᓪᓗᓂ ᓯᓕᐅᐊᒃᒥ B.C.−ᒥ
Gulf War ᐅᓇᑕᕐᓂᖅ ᓄᖅᑲᕐᖓᑕ 1991ᒥ, ᐊᐅᓪᓛᖅᑎᑕᐅᓚᐅᕐᓯᒪᔪᖅ ᑯᕙᐃᑦᒧᑦ ᑖᒃᑯᓄᖓ ᐊᑕᐅᓯᐅᖃᑎᒌᑦ ᐃᕌᒃ ᑯᕙᐃᑦ ᐱᓇᓱᐊᖅᑎᖏᓐᓄᑦ ᐊᒻᒪᓗ ᑲᒪᒋᔭᔅᓴᖅᑖᖅᑎᑕᐅᓚᐅᕐᓯᒪᔪᖅ ᐲᔭᐃᖃᑦᑕᓂᕐᒥᒃ ᖄᖅᑕᔫᖅᑕᓕᒻᒥ ᐊᒻᒪᓗ ᑲᒪᒋᔭᖃᖃᑦᑕᓂᕐᒥᒃ ᓱᕋᐃᔭᐃᖃᑦᑕᓂᕐᒥᒃ ᑲᒪᒋᔭᕆᐊᓕᓐᓂᑦ ᑕᒫᓂ ᑯᕙᐃᑦ/ᐃᕌᒃ ᑭᓪᓕᖓᓂ.
ᑭᖑᓂᐊᒍᑦ, ᐅᑎᕐᓯᒪᓕᖅᑐᓂ ᑲᓇᑕᒧᑦ ᐃᓂᖓᓄᑦ ᓯᓕᐅᐊᒃᒧᑦ, B.C.−ᒧᑦ ᓄᓇᒃᑰᕈᑎᕐᔪᐊᓂᑦ ᐊᖁᑎᐅᓂᕐᒥᒃ ᐃᓕᓐᓂᐊᓯᓚᐅᕐᓯᒪᒻᒥᔪᖅ. ᐱᔭᕇᕋᒥ ᐃᓕᓐᓂᐊᖅᑕᖓᓂ, ᑎᓕᔭᐅᓚᐅᕐᓯᒪᔪᖅ ᓱᒋᐅᑎᓕᓐᓄᑦ ᐋᖅᑭᐅᒪᑎᑦᑎᔨᐅᓂᕐᒥᒃ ᐅᓇᑕᖅᑐᔅᓴᓄᑦ ᐊᒻᒪᓗ ᐊᐅᓪᓚᖅᑎᑕᐅᓪᓗᓂ 1999ᒥ ᓯᕗᓪᓕᕐᐹᒥ NATO ᐅᐊᓐᓇᖓᓂ ᐊᑦᓛᓐᑎᒃ ᑲᑐᔾᔨᖃᑎᒌᑦ ᐅᓇᑕᕆᐊᕐᖓᑕ ᑲᓴᕘᒧᑦ ᓄᓇᒃᑰᕈᒻᒧᑦ ᐊᖁᑎᐅᔭᖅᑐᖅᑐᓂ.
ᑕᐃᒫᒃ ᓱᓕ, 2002ᒥ ᐊᐅᓪᓚᖅᑎᑕᐅᓚᐅᕐᓯᒪᒻᒥᔪᖅ UN ᐅᓇᑕᕆᐊᕐᖓᑕ ᕚᔅᓂᐊᒧᑦ ᓄᓇᒃᑰᕈᑎᕐᔪᐊᕐᒧᑦ ᐊᖁᑎᐅᔭᖅᑐᖅᑐᓂ ᐊᒻᒪᓗ ᓇᒻᒥᓂᕐᓱᓕᕋᐃᒐᒥ ᑖᕙᓃᑦᑐᓂ ᐃᑲᔪᖃᑦᑕᕐᓯᒪᔪᖅ ᐊᑭᓕᕐᓱᖅᑕᐅᒐᓂ ᖃᑦᑎᕆᔨᐅᓪᓗᓂ ᑕᒻᒫᕐᓯᒪᕕᖓᓂ. ᐱᖃᑎᖃᖅᑐᓂ ᑎᓴᒪᓂᑦ (4) ᐊᓯᖏᓐᓂᒃ ᐃᑲᔪᖅᑎᐅᖃᑎᖏᓐᓂᒃ, ᓇᓗᓇᐃᒃᑯᑕᖅᑖᖅᑎᑕᐅᓚᐅᕐᓯᒪᔪᖅ ᖁᕝᕙᓯᓐᓂᕐᐹᖓᓂᒃ ᐃᓕᓴᕆᔭᐅᔾᔪᑎᒥᒃ ᑮᓇᐅᔭᕐᒥᒃ ᐱᐅᓕᐊᖃᕐᓂᖓᓄᑦ 7ᓂᒃ ᐃᓚᒌᓂᑦ ᓄᓇᖓᓐᓂ ᐃᑭᑦᑐᒦᑦᑐᓂᑦ.
ᐅᖃᕐᓯᒪᔪᖅ ᕿᑭᖅᑕᓂᒃᑯᓐᓄᑦ ᐊᑐᕐᓯᒪᔭᖏᑕ ᒥᔅᓵᓄᑦ ᑖᕗᙵᐅᔾᔨᔪᒥᓂᐅᓂᕋᖅᑐᓂ ᐱᖓᓱᓂᑦ ᐊᑦᑕᐅᑎᔅᓴᔭᓂᑦ ᐊᓐᓄᕌᓂᑦ ᑕᑕᑦᑐᓂᑦ ᕿᑐᖓᓄᑦ ᑲᓇᓐᓇᕐᒥᐅᑦ ᑖᕙᓂ ᑲᓇᑕᒦᙶᕈᔾᔨᓪᓗᓂ ᕿᓚᒥᕈᓗᒃ ᑕᒫᓂ ᕿᑲᕆᐊᕐᓯᒪᓚᐅᖅᑐᓂ. ᐊᓐᓄᕌᑦ ᐃᓕᓪᓗᓂᒋᑦ ᓄᓇᒧᑦ ᖃᐃᖁᔨᓕᓚᐅᕐᓯᒪᔪᖅ ᑭᒃᑯᑐᐃᓐᓇᕐᓂᑦ ᐆᑦᑕᐃᔭᖅᑐᖁᔨᓪᓗᓂ ᐊᓐᓄᕌᓂᑦ. ᐅᖃᔪᔪᖅ ᖁᕕᐊᓱᓕᓚᐅᕐᓯᒪᔪᕉᖅ ᑕᑯᔭᕆᐊᔅᓴᖅ ᓱᕈᓯᕐᓂᑦ ᐊᓐᓄᕌᓂᑦ ᐊᑐᖅᑐᓂᑦ ᓇᔅᓴᓚᐅᖅᑕᖏᓐᓂᒃ. ᖁᔭᓕᓪᓗᓂ ᐃᓐᓇᕆᔭᐅᔪᖅ ᑖᕙᓂ ᓂᕆᑎᑦᑎᔪᒥᓂᖅ ᑖᔅᓱᒥᖓ.
ᓄᖅᑲᐅᔾᔨᔪᔪᖅ ᑕᒪᑐᒥᖓ 2008ᖑᑎᓪᓗᒍ 22ᓂᑦ ᐊᕐᕌᒍᓂᑦ ᐃᖅᑲᓇᐃᔮᕆᓚᐅᖅᑐᒍ ᐊᒻᒪᓗ ᒫᓐᓇ ᐋᓪᐴᑕᒥᐅᑕᐅᓪᓗᓂ.
ᐅᓪᓗᒥ ᑲᓇᑕᒥ ᓄᓇᖃᖅᑳᖅᑐᑦ ᐅᓇᑕᖃᑕᐅᓚᐅᕐᓯᒪᔪᓄᑦ ᐅᓪᓗᕆᔭᐅᑎᓪᓗᒍ, ᖁᔭᓐᓇᒦᖅᑕᕗᑦ Hᐊᐅᓕ ᐃᔨᑦᓯᐊᖅ ᐃᑲᔪᕐᓯᒪᓂᖓᓄᑦ ᑲᓇᑕᒥᐅᓄᑦ.
ᐳᐃᒍᖁᓇᑕ
