ᐃᖅᑲᓇᐃᔮᖅ: ᑐᑭᒧᐊᑦᑎᑦᑎᔨ ᐊᓪᓚᕝᕕᓕᕆᓂᕐᒧᑦ
ᐋᖅᑭᓯᒪᓂᖓ: ᐃᖅᑲᓇᐃᔮᖑᐃᓐᓇᕈᒫᕐᓂᐊᖅᑐᖅ
ᓇᒥ: ᐃᖃᓗᐃᑦ, ᓄᓇᕗᑦ
ᒪᑐᐃᖓᔪᖅ: ᓄᓇᕗᒻᒥᐅᓄᑦ ᐃᓄᓐᓄᑦ ᐃᖅᑲᓇᐃᔮᖅᑖᕋᓱᑦᑐᓄᑦ ᑭᓯᐊᓂ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᖅᑲᓇᐃᔭᖅᑎᓴᕐᓯᐅᖅᑐᑦ ᐃᑲᔪᖅᑎᒌᑦᑐᓂᑦ ᐱᓕᕆᖃᑎᖃᕈᓐᓇᑎᐊᖅᑐᒥᒃ, ᐱᔪᒪᓂᖃᑦᑎᐊᖅᑐᒥᓪᓗ ᐃᓄᒻᒥᒃ ᐋᖅᑭᔅᓱᐃᔪᓐᓇᑎᐊᖅᑐᒥᒃ ᐊᒻᒪᓗ ᓯᕗᓕᕐᓯᔪᓐᓇᑎᐊᖅᑐᒥᒃ ᐃᖅᑲᓇᐃᔮᖅᑖᓂᐊᖅᑐᒥᒃ ᑐᑭᒧᐊᑦᑎᑦᑎᔨᐅᓂᕐᒥᒃ ᐊᓪᓚᕝᕕᓕᕆᓂᕐᒧᑦ.
ᑐᑭᒧᐊᑦᑎᑦᑎᔨ ᐊᓪᓚᕝᕕᓕᕆᓂᕐᒧᑦ ᐊᑑᑎᖃᓪᓚᕆᑦᑐᓂᑦ ᐊᐅᓚᓂᖏᓐᓄᑦ, ᐋᖅᑭᓯᒪᓂᕆᔭᕆᐊᓕᖏᓐᓄᓪᓗ ᐊᐅᓚᑦᑎᔾᔪᑎᓄᓪᓗ ᐃᖅᑲᓇᐃᔮᖃᓲᖅ ᐊᒻᒪᓗ ᐊᐅᓚᑦᑎᔾᔪᑎᓄᑦ ᐃᑲᔪᕐᓱᐃᖃᑦᑕᓲᖅ ᑕᐃᒫᒃ ᐊᑑᑎᖃᑦᑎᐊᖅᑐᓂᑦ ᐊᑐᕐᓂᖃᑦᑎᐊᖅᑐᓂᓪᓗ ᐱᔨᑦᑎᕋᐅᑎᖃᖃᑦᑕᓲᖅ ᐃᓘᓐᓇᖏᓐᓄᑦ ᕿᑭᖅᑕᓂᒃᑯᓐᓃᑦᑐᓂᑦ ᑐᑭᒧᐊᑦᑎᑦᑎᕙᑦᑐᓂ ᐊᒥᓱᓂᑦ ᐊᐅᓚᓂᕆᓪᓗᐊᑕᖃᑦᑕᖅᑕᖏᓐᓂᒃ.
ᑐᑭᒧᐊᑦᑎᑦᑎᔨᖃᕐᓗᓂ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᑉ ᐃᑲᔪᖅᑎᖓᓂᒃ, ᐊᖏᔪᖅᑲᐅᑏᑦ ᐊᓪᓚᕝᕕᐊᓂ, ᑐᑭᒧᐊᑦᑎᑦᑎᔨ ᓯᕗᓕᕐᓯᓪᓗᐊᑕᖃᑦᑕᓂᐊᖅᑐᖅ ᒐᕙᒪᒃᑯᑦ ᐊᐅᓚᑦᑎᔾᔪᑎᖏᓐᓂᒃ, ᐊᑦᑕᓇᐃᕐᓯᒪᔭᕆᐊᖃᕐᓂᖏᓐᓂᒃ, ᐊᑐᖅᑐᐊᕈᑎᓂᑦ ᐊᒻᒪᓗ ᑎᑎᖅᑭᕆᔾᔪᑎᓂᑦ, ᐋᖅᑭᓯᒪᓂᐅᔭᕆᐊᓕᓐᓂᑦ, ᐊᓪᓚᕝᕕᓯᐅᑎᓂᑦ ᓱᓇᒃᑯᑖᖏᓐᓂᓪᓗ, ᖃᕋᓴᐅᔭᓕᕆᔾᔪᑎᖏᓐᓂᒃ, ᑭᐅᔨᖏᓐᓂᒃ, ᓄᓇᓕᓐᓂᑦ ᑐᓴᐅᒪᑎᑦᑎᔨᓂᑦ ᐊᐅᓚᑦᑎᔾᔪᑎᓂᑦ ᐊᒻᒪᓗ ᐊᓪᓚᕝᕕᒻᒥᑦ ᐊᐅᓚᑦᑎᔾᔪᑎᐅᕙᑦᑐᓂᑦ. ᑕᕝᕙᓂ ᐃᖅᑲᓇᐃᔮᕐᒥ ᑐᑭᒧᐊᑦᑎᑦᑎᖃᑦᑕᓂᐊᖅᑐᖅ, ᓯᕗᓕᕐᓯᖃᑦᑕᕐᓗᓂᓗ ᐊᔪᕆᕐᓯᐅᔾᔨᖃᑦᑕᕐᓗᓂᓗ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐊᑑᑎᖃᕐᓂᕐᐹᑦ ᐱᔨᑦᑎᕋᐅᑎᐅᓪᓗᐊᑕᕐᐸᑦᑐᑦ ᐊᑐᐃᓐᓇᐅᒐᓗᐊᕐᒪᖔᑕ, ᐊᑑᑎᖃᑦᑎᐊᕋᓗᐊᕐᒪᖓᑕ ᐊᑐᕐᓂᖃᑦᑎᐊᕋᓗᐊᕐᒪᖔᑕ..
ᑕᕝᕙᓂ ᐃᖅᑲᓇᐃᔮᕐᒥ ᐃᖅᑲᓇᐃᔮᓕᒃ ᐋᖅᑭᔅᓱᐃᔪᓐᓇᑦᑎᐊᕆᐊᓕᒃ, ᐃᑉᐱᒍᓱᑦᑎᐊᕈᓐᓇᕆᐊᓕᒃ ᑭᓱᑯᑦᑎᓕᒫᖏᓐᓂᒃ, ᐊᑲᐅᙱᓕᐅᕈᑎᓂᑦ−ᐋᖅᑭᒋᐊᕐᓯᖃᑦᑕᓂᕐᒥᒃ ᑐᑭᓯᐅᒪᖃᑦᑕᐅᑎᖃᑎᖃᕈᓐᓇᕐᓗᓂ ᑕᒪᒃᑮᓐᓂᒃ ᖃᓪᓗᓈᑎᑐᑦ ᐃᓄᒃᑎᑐᓪᓗ. ᑐᑭᓯᐅᒪᑦᑎᐊᕆᐊᓕᒃ ᑲᑎᒪᔩᑦ ᐊᐅᓚᑦᑎᔾᔪᓯᖏᓐᓂᒃ ᐊᒻᒪᓗ ᐊᓪᓚᕝᕕᓕᕆᓂᕐᒥ ᐱᐅᓂᕐᐹᓂᑦ ᐊᑐᖅᑕᐅᓲᓂᑦ ᑖᔅᓱᒥᖓ ᐃᖅᑲᓇᐃᔮᖃᑦᑎᐊᕈᓐᓇᓂᐊᕐᖓᑦ. ᐃᖅᑲᓇᐃᔮᖃᕐᓯᒪᔭᕆᐊᓕᒃ ᐊᓪᓚᕝᕕᓕᕆᓂᕐᒥᒃ ᐅᕝᕙᓘᓐᓃᑦ ᐊᓪᓚᕝᕕᒻᒥᑦ ᐊᐅᓚᑦᑎᔨᐅᓂᕐᒥᒃ. ᑲᑎᒪᑎᑦᑎᖃᑦᑕᕐᓯᒪᔭᕆᐊᓕᒃ ᐅᕝᕙᓘᓐᓃᑦ ᐅᓂᒃᑳᖃᑦᑕᕐᓯᒪᓗᓂ ᐊᖏᔪᖅᑲᐅᑎᓄᑦ. ᑕᕝᕙᓂ ᐃᖅᑲᓇᐃᔮᔅᓴᒥ ᐃᖅᑲᓇᐃᔭᖅᑎᖃᕆᐊᖃᕐᖓᑦ ᐅᐃᒪᔮᕈᓐᓇᖏᑦᑐᒥᒃ ᐱᔭᕆᐊᑐᔪᒃᑰᓕᕋᓗᐊᖅᑎᓪᓗᒋᑦ. ᐃᖅᑲᓇᐃᔮᖅᑖᕋᓱᑦᑐᑦ ᑕᑯᑎᑦᑎᓯᒪᔭᕆᐊᓖᑦ ᑕᓪᓕᒪᓂᑦ (5) ᐊᕐᕌᒍᓂᑦ ᐊᐅᓚᑦᑎᔨᐅᓂᕐᒥᒃ ᐃᖅᑲᓇᐃᔮᖃᕐᓯᒪᓂᖓᓂᒃ ᐱᕙᓪᓕᐊᓪᓗᓂ, ᐃᓚᒋᔭᐅᓪᓗᓂ ᐱᓕᕆᓂᕆᕙᑦᑕᖏᓐᓂᒃ ᐊᐅᓚᑦᑎᔨᐅᓂᕐᒥᒃ ᐃᖅᑲᓇᐃᔭᖅᑎᖏᓐᓄᑦ.
ᑕᕝᕙᓂ ᐃᖅᑲᓇᐃᔮᕐᒥ ᓇᓗᓇᐃᒃᑯᑕᖃᕆᐊᓕᒃ ᐱᔭᕇᕐᓯᓯᒪᓂᖓᓂᒃ ᓯᓚᑦᑐᓴᕐᕕᒻᒥ ᐱᓕᕆᕕᒻᒥᑦ ᐊᐅᓚᑦᑎᓂᕐᒥᒃ, ᐊᐅᓚᑦᑎᓂᕐᒥᒃ ᐅᕝᕙᓘᓐᓃᑦ ᑕᒪᑐᒪ ᒥᔅᓵᓅᖓᔪᓂᑦ ᐃᓕᓐᓂᐊᕐᓯᒪᓂᖓᓂᒃ. ᐱᓕᕆᐊᕐᒥ ᐊᐅᓚᑦᑎᔨᐅᓂᕐᒥᑦ ᓇᓗᓇᐃᒃᑯᑕᖃᖅᑲᑦ ᐊᑑᑎᖃᕋᔭᖅᑐᖅ. ᑕᒪᒃᑮᓐᓂᒃ ᑕᒪᑐᒪ ᒥᔅᓵᓄᑦ ᐃᓕᓐᓂᐊᕐᓯᒪᑉᐸᑦ ᐃᖅᑲᓇᐃᔮᖃᕐᓯᒪᑉᐸᓪᓗ ᐃᓱᒪᒋᔭᐅᔪᓐᓇᕐᒥᔪᖅ ᓇᓕᒧᑦᑎᓂᖓᓂᒃ ᑕᒪᑐᒥᖓ. ᓈᒻᒪᑦᑐᒥᒃ ᐱᕋᔭᓚᐅᕐᓯᒪᙱᒃᑲᓗᐊᕐᒪᖔᖅ ᖃᐅᔨᓴᖅᑕᐅᔾᔪᑎᖃᕐᓯᒪᔭᕆᐊᓕᒃ.
ᑮᓇᐅᔾᔭᔅᓵᕆᓂᐊᖅᑕᖏᑦ ᑖᔅᓱᒥᖓ ᐃᖅᑲᓇᐃᔮᔅᓴᒥᒃ ᑕᒫᓃᑦᑐᑦ $139,349ᓂᑦ $204,379ᓄᑦ ᐊᕐᕌᒍᑕᒫᑦ, ᐊᒻᒪᓗᑦᑕᐅᖅ ᓄᓇᕗᒻᒥ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐃᑲᔫᓯᐊᖅᑖᖃᑦᑕᕋᔭᖅᑐᓂ $27,600ᓂᑦ ᐊᕐᕌᒍᑕᒫᑦ.
ᐃᓪᓗᖃᖅᑎᑦᑎᒍᑕᐅᔾᔮᖏᑦᑐᖅ.
ᐊᐱᕐᓱᖅᑕᐅᒍᒪᒐᔭᖅᑐᑦ ᑭᓯᐊᓂ ᐅᖃᕐᕕᐅᖃᑦᑕᓛᕐᒥᔪᑦ.
ᐃᖅᑲᓇᐃᔭᖅᑖᕋᓲᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᓇᔅᓯᐅᑎᓗᒋᑦ ᐅᕗᖓ:
Human Resources ᐃᕐᖐᓈᖅᑕᐅᑖ: Resumes@qia.ca
Qikiqtani Inuit Association ᐅᖄᓚᐅᑖ: (867) 975-8400
200-922 Sivumigiaq Street ᓱᒃᑲᔪᒃᑰᕈᑖ: (867) 979-3238
Igluvut building, 2nd floor ᑕᑯᓂᐊᕐᓗᒍ: Tuttarvik.qia.ca
Iqaluit, NU X0A 3H0
ᒪᑐᕕᔅᓴᖓᑕ ᐅᓪᓗᖓ: ᒫᑦᓯ 28, 2025 5:00ᒥ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ
