ᓴᖅᑭᑕᖅ: ᒫᑦᓯ  17, 2020

ᐱᔾᔪᑦ: ᕿᑭᖅᑕᓃᒃᑯᑦ ᓄᖅᑲᖓᑎᑦᓯᔪᑦ ᐱᒻᒪᕆᐅᙱᑦᑐᓂᒃ ᐱᓕᕆᐊᒃᓴᖏᓐᓂᒃ ᐊᒻᒪᓗ ᑎᓕᐅᕆᖔᖅᓯᒪᓪᓗᑎᒃ ᐊᖏᕐᕋᕐᒥ ᐃᖅᑲᓇᐃᔭᖅᑎᑦᓯᖔᖅᖢᑎᒃ ᐱᔾᔪᑎᒋᓪᓗᒍ ᑖᓐᓇ ᐳᕝᕕᕆᓐᓇᖅᑐᖅ ᐋᓐᓂᐊᖅ 19

ᐱᓕᕆᓇᓱᐃᓐᓇᖅᑎᓪᓗᑕ ᐃᖅᑲᓇᐃᔭᖅᑎᕗᑦ ᓄᓇᓖᓪᓗ ᖃᓄᐃᑦᑕᐃᓕᖁᓪᓗᒋᑦ ᐋᓐᓂᐊᖅᑕᐃᓕᖁᓪᓗᒋᓪᓗ ᐊᒻᒪᓗ ᐃᑲᔪᖃᑕᐅᔪᒪᓪᓗᑕ ᓄᖅᑲᖓᑎᑦᓯᖃᑕᐅᓂᕐᒥᒃ ᓯᐊᒻᒪᓴᐃᕋᐃᑦᑐᒥᒃ ᐳᕝᕕᕆᓐᓇᖅᑐᖅ ᐋᓐᓂᐊᒥᒃ 19ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐱᒋᐊᓪᓚᒃᑎᑦᓯᔪᑦ ᓄᖅᑲᖓᑎᑦᓯᓂᕐᒥᒃ  ᐊᒻᒪᓗ ᐋᓐᓂᐊᖅᑖᖅᑕᐃᓕᑎᑦᓯᓂᕐᒥᓪᓗ ᐃᖅᑲᓇᐃᔭᖅᑎᓂ ᐊᖏᕐᕋᖏᓐᓂᒃ ᐃᖅᑲᓇᐃᔭᕐᓂᐊᖅᖢᑎᒃ ᐊᒻᒪᓗ ᓄᖅᑲᖅᑎᑦᓯᒪᑲᐃᓐᓇᕐᓂᐊᖅᖢᑕ ᐱᒻᒪᕆᐅᙱᑦᑐᓂᒃ ᐱᓕᕆᐊᓂᒃ ᑐᓴᖅᑎᑕᐅᙱᓐᓂᓕᒫᖏᓐᓂ.

ᐱᖓᑦᓯᕐᒥ ᐱᒋᐊᕐᓗᒍ ᒫᑦᓯ 18, 2020ᒥ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ (ᑭᓯᒥ ᑕᐃᒃᑯᐊ ᐃᖅᑲᓇᐃᔭᕐᕕᖕᒨᕆᐊᖃᖅᑐᑦ ᖃᕆᓴᐅᔭᓂ ᐊᑐᕆᐊᖃᖅᑐᑦ ᐅᕝᕙᓘᓐᓃᑦ ᐱᒻᒪᕆᐅᔪᓂᒃ ᐱᓕᕆᐊᖃᖅᑐᖃᕆᐊᖃᖅᐸᓪᓘᓐᓃ) ᐃᖅᑲᓇᐃᔭᖁᔭᐅᕗᑦ ᐊᖏᕐᕋᖏᓐᓂ ᒫᑦᓯ 31, 2020ᒧᑦ.

ᒫᓐᓇᐅᓂᖓᓂ ᐱᒻᒪᕆᐅᙱᑦᑐᑦ ᐱᓕᕆᐊᑦ ᓱᕐᓗ ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐃᑲᔫᓯᐊᒃᓴᓂ ᐱᓕᕆᐊᑦ (ᐃᓕᖅᑯᓯᓕᕆᓂᕐᒧᑦ ᐱᓕᕆᐊᑦ), ᕿᑭᖅᑕᓂ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᓯᓂᕐᒧᓪᓗ ᐃᖅᑲᓇᐃᔮᒃᓴᓄᑦ ᑲᑐᔾᔨᒍᑕᐅᔪᖅ (ᑲᑐᔾᔨᒍᑕᐅᔪᑦ), ᑐᓐᓂᖅᑯᓯᐊᓕᕆᓂᖅ ᐊᐃᑦᑑᓯᐊᓕᕆᓂᕐᒥᓪᓗ ᐱᓕᕆᐊᖓ ᐊᒻᒪᓗ ᐃᓚᒌᒃᑐᓄᑦ ᓄᓇᓕᖕᓄᓪᓗ ᐱᕙᓪᓕᐊᔾᔪᑎᒃᓴᐃᑦ ᑮᓇᐅᔭᐃᑦ ᐱᓕᕆᐊᖓ ᓄᖅᑲᖓᑎᑕᐅᓯᒪᑲᐃᓐᓇᕐᓂᐊᖅᑐᑦ.

ᐱᒻᒪᕆᐅᔪᓂᒃ ᐱᔨᑦᓯᕋᕈᑎᓂ ᐊᑐᕆᐊᖃᕈᕕᑦ, ᕿᑭᖅᑕᓂ ᐃᓄᐃᑦ ᐅᖄᓚᒍᓐᓇᖅᑐᑦ, ᑎᑎᕋᕐᓗᑎᓪᓘᓐᓃᑦ ᐃᕐᖐᓐᓈᕈᑎᒃᑯᑦ ᐅᕝᕙᓘᓐᓃᑦ ᓇᒃᓯᐅᔾᔨᓗᑎᒃ ᓱᑲᑦᑐᒃᑯᑦ ᐊᐱᖅᑯᑎᔅᓯᓐᓂ ᕿᑭᖅᑕᓃᒃᑯᓐᓄᑦ.  ᐊᓪᓚᕝᕖᑦ ᒪᑐᓯᒪᓂᐊᖅᑐᑦ ᑭᓇᑐᐃᓐᓇᕐᓄᑦ  ᑐᓴᖅᑎᑦᓯᓚᐅᙱᓐᓂᖏᓐᓂᑦ.

ᖃᓄᐃᓐᓂᐅᔪᑦ ᕿᓚᒻᒥᐅᔪᒥᒃ ᐊᓯᔾᔨᖅᐸᓪᓕᐊᖏᓐᓇᖅᑎᓪᓗᒋᑦ, ᑐᑭᑖᕈᑎᒋᔭᐅᓯᒪᔪᖅ ᕿᒥᕐᕈᔭᐅᖃᑦᑕᕐᓂᐊᖅᑐᖅ ᖃᐅᔨᓴᖅᑕᐅᖃᑦᑕᕐᓂᐊᖅᖢᓂ ᐃᑲᔪᕐᓗᒋᑦ ᐃᖅᑲᓇᐃᔭᖅᑎᑦ ᓄᓇᓖᓪᓗ ᐋᓐᓂᐊᖅᑖᖅᑕᐃᓕᖁᓪᓗᒋᑦ.

ᑐᑭᓯᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐊᕐ ᓯᐊᕋᕼᐃ,

ᑐᑭᒧᐊᒃᑎᑦᓯᔨ, ᑐᓴᐅᒪᖃᑦᑕᐅᑎᓄᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742