ᓇᓗᓇᐃᔭᐅᑎᑦ
ᓴᖅᑭᑕᐅᑲᐅᑎᒋᔪᒃᓴᖅ

ᐱᒻᒪᕆᖕᒥ ᓯᕗᒧᐊᕈᑎᖃᖅᓯᒪᓕᕐᒪᑕ ᑕᓪᓗᕈᑎᐅᑉ ᐃᒪᖓᓂ ᐃᒪᕐᒥᐅᑕᐃᑦ ᓴᐳᔾᔨᕕᖓᓄᑦ

ᐊᖏᕈᑎᐅᒋᐊᕐᖓᖅᑐᑦ ᓇᓗᓇᐃᔭᐃᓯᒪᔪᑦ ᐱᒻᒪᕆᐅᔪᓂᒃ ᓯᕗᓂᒃᓴᒧᑦ ᑐᕌᖓᔪᓄᑦ  ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᒃᓴᖏᓐᓂᒃ ᐊᖏᕈᑎᒥ

ᐃᖃᓗᐃᑦ, ᓄᓇᕗᒥ
ᒥᕐᖑᐃᖅᓯᕝᕕᓕᕆᔨᒃᑯᑦ/ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

ᑲᓇᑕᒥᐅᑦ ᖃᐅᔨᒪᔪᑦ ᐊᕙᑎᕗᑦ ᓴᐳᒻᒥᔭᐅᓯᒪᒋᐊᖃᕐᓂᖏᓐᓂᒃ, ᐱᕙᓪᓕᐊᔾᔪᑎᒋᔭᐅᔪᓂᒃ ᐊᒻᒪᓗ ᓄᓇᓕᖁᑎᑦᑎᓐᓂ.  ᑕᐃᒪᐃᒻᒪᑦ ᑖᒃᑯᐊ ᒐᕙᒪᑐᖃᒃᑯᑦ ᓇᓗᓇᐃᖅᓯᓯᒪᔪᑦ ᒪᕐᕈᐃᓪᓗᐊᕐᓗᒍ ᐊᕙᑎᒥᒃ ᓴᐳᒻᒥᒍᒪᖕᒪᑕ ᑲᓇᑕᒥ ᓄᓇᓂᒃ ᑕᕆᐅᓂᓗ ᓯᒡᔭᕆᔭᐅᔪᓂᑦ ᓯᒡᔭᕆᔭᐅᔪᓄᑦ.

ᐊᒡᒌᓯ 2017ᒥ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓃᒃᑯᑦ, ᐃᓚᒋᓪᓗᒋᑦ ᓄᓇᕗᑦ ᒐᕙᒪᒃᑯᑦ, ᑐᓴᖅᑎᑦᑎᓚᐅᖅᓯᒪᖕᒪᑕ ᑭᖑᓪᓕᖅᐹᕆᔭᐅᓂᐊᖅᑐᓂᒃ ᑭᓪᓕᒋᔭᐅᓂᐊᖅᑐᒥᒃ ᑕᓪᓗᕈᑎᐅᑉ ᐃᒪᖓᓄ ᐃᒪᕐᒥᐅᑕᐃᑦ ᓴᐳᔾᔨᕕᖓᓄᑦ ᖁᑦᑎᒃᑐᒥ ᓄᓇᕘᒥ −, ᐱᓐᖑᖅᓯᒪᓕᖅᑎᓪᓗᒍ, ᐊᖏᓂᖅᐹᖑᓗᓂ ᓴᐳᒻᒥᔭᐅᓯᒪᓂᖃᕐᓂᐊᖅᑐᖅ ᑲᓇᑕᒥ.  ᑕᒪᓐᓇ ᑭᒡᒐᖅᑐᐃᓯᒪᓂᖃᕐᓂᐊᖅᑐᖅ 1.9 ᐳᓴᓐᑎᒥᒃ ᑲᓇᑕᒥ ᑕᕆᐅᖑᔪᓂᒃ ᐊᒻᒪᓗ ᐱᒻᒪᕆᐅᔪᒥᒃ ᐃᑲᔪᕐᓂᖃᕐᓂᐊᖅᖢᓂ ᑲᓇᑕᒥ ᓄᓇᕐᔪᐊᕐᒥ ᐱᓂᐊᕐᓂᕆᓯᒪᔭᖏᓐᓂᒃ ᓴᐳᔾᔨᓂᕐᒥᒃ 10ᐳᓴᓐᑎᓂᒃ ᑕᕆᐅᓂ ᓯᒡᔭᕆᔭᐅᔪᓂᓗ 2020ᖑᖅᓴᓂᖓᓄᑦ.

ᐅᑐᐱᕆ  30, 2018, ᐊᖏᕈᑎᐅᒋᐊᕐᖓᖅᑐᒥᒃ ᐱᔭᕇᕈᑎᖃᓚᐅᖅᑐᑦ, ᐊᒻᒪᓗ ᐱᒻᒪᕆᐅᔪᓂᒃ ᐃᓗᓕᖃᖅᖢᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥ ᑕᓪᓗᕈᑎᐅᑉ ᐃᒪᖓᓄᑦ ᐃᒪᕐᒥᐅᑕᐃᑦ ᓴᐳᔾᔨᕕᖓᓄᑦ, ᐱᖃᓯᐅᑎᓯᒪᔪᑦ ᓄᑖᖑᓂᐊᖅᑐᒥᒃ ᒐᕙᒪᑐᖃᒃᑯᑦ-ᐃᓄᐃᓪᓗ ᐊᐅᓚᑦᑎᓗᑎᒃ ᐊᒻᒪᓗ ᐃᓄᖕᓂᑦ ᐅᖃᐅᔾᔨᖃᕐᓂᐊᖅᖢᑎᒃ ᑕᓪᓗᕈᑎᐅᑉ ᐃᒪᖓᓄ ᓴᐳᔾᔨᕕᖕᒥᑦ.  ᓱᓕ, ᑖᒃᑯᐊ ᐊᑎᓕᐅᖅᑎᐅᔪᑦ ᐊᖏᖃᑎᒌᓚᐅᕐᒪᑎᒃ ᐃᓱᒪᒋᔭᖃᕈᓐᓇᕐᓂᐊᕐᓗᑎᒃ ᓇᓖᕌᒐᒃᓴᐅᔪᓐᓇᖅᑐᓂᒃ ᐱᓐᖑᖅᑎᑦᑎᔪᓐᓇᕐᓂᐊᕐᓗᑎᒃ ᐃᒪᕐᒥᐅᑕᓂ ᓴᐳᔾᔨᕕᒃᓴᒥᒃ ᐊᐅᓱᐃᑦᑑᑉ ᓂᒋᐊᓂ ᖁᑦᑎᒃᑐᒥ ᑐᕙᐃᔪᐃᑦᑐᒥ (ᑐᑭᖓ “ᓯᑯᐃᕈᓐᓇᓐᖏᑦᑐᖅ” ᐃᓄᒃᑎᑐᑦ).

ᑖᒃᑯᐊ ᒐᕙᒪᑐᖃᒃᑯᑦ ᐊᒻᒪᓗ ᕿᑭᖅᑕᓃᒃᑯᑦ ᑎᑭᐅᑎᒍᓐᓇᓚᐅᕐᒪᑕ ᑕᒪᑐᒥᖓ ᐱᒻᒪᕆᐅᑎᓪᓗᒍ ᐋᔩᕋᕈᑎᖃᖅᑎᓪᓗᒋᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥ ᑕᓪᓗᕈᑎᐅᑉ ᐃᒪᖓᓄᑦ ᐃᒪᕐᒥᐅᑕᐃ ᓴᐳᔾᔨᕕᖓᓄᑦ, ᓇᓗᓇᐃᔭᖅᓯᒪᑎᓪᓗᒍ ᓄᓇᕘᑉ ᐊᖏᕈᑎᐊᓂ.

ᑕᐃᒪ ᑖᓐᓇ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎ ᐱᔭᕇᖅᑕᐅᓯᒪᓕᖅᐸᑦ ᐊᒻᒪᓗ ᐊᐅᓚᑦᑎᔾᔪᑎᒃᓴᕆᔭᐅᓂᐊᖅᑐᒥᒃ ᐸᕐᓇᐅᑎᖓ ᐱᔭᕇᖅᓯᒪᓕᖅᐸᓪᓗ, ᑕᓪᓗᕈᑎᐅᑉ ᐃᒪᖓᓄ ᐃᒪᕐᒥᐅᑕᐃᑦ ᓴᐳᔾᔨᕕᖓ ᐊᖏᓂᖅᐹᖑᓗᓂ ᓴᐳᒻᒥᔭᐅᓯᒪᓂᖃᕐᓂᐊᖅᑐᖅ ᑲᓇᑕᒥ ᐊᖏᓂᖃᕐᓗᓂ 109,000ᓂ ᑭᑉᐹᕆᒃᑐᓂ ᑭᓛᒥᑕᓂ. ᓴᖅᑭᑕᐅᓂᖓᑦ ᑕᓪᓗᕈᑎᐅᑉ ᐃᒪᖓᓄᑦ ᐃᒪᕐᒥᐅᑕᐃᑦ ᓴᐳᔾᔨᕕᖕᒥᑦ ᐱᒻᒪᕆᐅᓂᐊᕐᒪᑦ ᐃᑲᔪᖃᑕᐅᓂᐊᖅᖢᓂ ᓴᐳᒻᒥᔭᐅᓂᖏᑦ ᑲᓇᑕᒥ ᓄᓇᖁᑎᒋᔭᐅᔪᑦ ᐊᒻᒪᓗ ᐅᒪᔪᓂᒃ ᓄᓇᓂᒃ ᐊᑐᖅᐸᒃᑐᓂ, ᐊᒻᒪᓗ ᓇᓗᓇᐃᖅᓯᔪᓐᓇᕐᓗᑎᒃ ᐃᓄᐃᑦ ᐱᔪᓐᓇᐅᑎᖏᑦ ᐃᒃᐱᒋᔭᐅᓯᒪᑦᑎᐊᕐᓂᐊᕐᓂᖏᑦ ᐊᒻᒪᓗ ᐃᓕᖅᑯᓯᒃᑯᑦ ᖃᓄᐃᓕᐅᕈᑎᒋᔭᐅᕙᑦᑐᑦ ᑲᔪᓰᓐᓇᕐᓂᐊᖅᖢᑎᒃ ᑕᕝᕙᓂ ᓄᓇᖁᑎᒋᔭᐅᔪᒥᒃ ᑭᖑᕚᕆᔭᐅᔪᓄᑦ ᐊᑐᖅᑕᐅᖃᑕᐅᔪᓐᓇᓛᕐᒪᑕ.

ᒐᕙᒪᑐᖃᒃᑯᑦ ᐊᒻᒪ ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᐱᓐᖑᖅᑎᑦᑎᔪᒪᓪᓗᑎᒃ ᑕᓪᓗᕈᑎᐅᑉ ᐃᒪᖓᓂ ᐃᒪᕐᒥᐅᑕᐃᑦ ᓴᐳᔾᔨᕕᖓᓂᒃ ᐊᒻᒪᓗ ᐅᖃᓪᓚᖃᑎᒌᖏᓐᓇᕐᓂᐊᖅᖢᑎᒃ ᐱᓪᓗᒍ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥᒃ, ᑐᕌᒐᖃᕐᓗᑎᒃ ᐱᔭᕇᖅᑕᐅᔪᒪᓪᓗᑎᒃ ᐄᐳᓪ 2019ᒥ.

ᐊᑎᓕᐅᖅᑎᐅᔪᑦ ᓇᓗᓇᐃᖅᓯᓯᒪᔪᑦ ᑐᓴᐅᒪᑎᑦᑎᖃᑦᑕᕈᒪᓂᐊᖅᖢᑎᒃ ᓄᓇᓕᖕᒥᐅᑕᓂ, ᐃᓚᒋᔭᐅᔪᓂᒃ ᐊᒻᒪᓗ ᑲᓇᑕᒥᐅᓕᒫᓂᒃ ᐊᓯᖏᓐᓂᒃ ᑲᔪᓯᒍᑎᒋᔭᐅᓯᒪᔪᓂᒃ ᐱᔾᔪᑎᒋᓪᓗᒋᑦ ᐱᓐᖑᖅᑎᑦᑎᓂᕐᒥᒃ ᑲᓇᑕᒥ ᐃᒪᕐᒥᐅᑕᓂ ᓴᐳᔾᔨᕕᖕᓂᒃ.

ᐊᑎᓕᐅᖅᑕᐅᑎᓪᓗᒍ ᐊᖏᕈᑎᒋᔭᐅᒋᐊᕐᖓᖅᑐᖅ, ᐸᐅᓗᓯ ᐊᕿᐊᕈᖅ, ᐊᖓᔪᖅᑳᖅ ᕿᑭᖅᑕᓃᒃᑯᓐᓂᑦ, ᑲᑕᕆᓐ ᒪᑭᐊᓇ, ᒥᓂᔅᑕ ᐊᕙᑎᓕᕆᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᓪᓗ ᐊᒻᒪᓗ ᒥᓂᔅᑕᐅᓪᓗᓂ ᑲᓇᑕᒥ ᒥᕐᖑᐃᖅᓯᕝᕕᓕᕆᔨᒃᑯᓐᓂ, ᐊᒻᒪᓗ ᔮᓇᑕᓐ ᐅᐃᓪᑭᓐᓴᓐ, ᒥᓂᔅᑕ ᐃᒪᕐᒥᐅᑕᓕᕆᔨᒃᑯᓐᓂᑦ ᓯᒡᔭᒥᐅᑕᓕᕆᔨᒃᑯᓐᓂᓗ, ᓇᓗᓇᐃᖅᓯᒃᑲᓐᓂᓚᐅᕐᒪᑎᒃ ᐱᔭᕇᕈᑎᖃᕈᒪᓪᓗᑎᒃ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥᒃ ᓇᓗᓇᐃᖅᓯᔾᔪᑎᒋᔭᐅᓂᐊᖅᑐᒥᒃ ᓴᐳᒻᒥᔭᐅᓂᖓᓂ ᑕᓪᓗᕈᑎᐅᑉ ᐃᒪᖓ, ᓄᓇᕐᔪᐊᕐᒥ ᐱᒻᒪᕆᐅᔪᒥᒃ, ᐃᑲᔫᑎᒋᔭᐅᓂᐊᕐᒪᑦ ᐅᓪᓗᒥᐅᔪᖅ ᐊᒻᒪᓗ ᓯᕗᓂᕐᒥ ᑭᖑᕚᖑᓂᐊᖅᑐᓂᒃ ᐃᓄᖕᓄᑦ ᑲᓇᑕᒥᐅᑕᓄᓪᓗ.

ᑲᑕᕆᓐ ᒪᑭᐊᓇ
ᒥᓂᔅᑕ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᓗ ᐊᒻᒪᓗ ᒥᓂᔅᑕ ᒥᕐᖑᐃᖅᓯᕝᕕᓕᕆᔨᒃᑯᓐᓂ

ᔮᓇᑕᓐ ᐅᐃᓪᑭᓐᓴᓐ
ᒥᓂᔅᑕ ᐃᒪᕐᒥᐅᑕᓕᕆᔨᒃᑯᓐᓂ ᐊᒻᒪᓗ ᑲᓇᑕᒥ ᓯᒡᔭᒥᐅᑕᓕᕆᔨᒃᑯᓐᓂ

ᐸᐅᓗᓯ ᐊᕿᐊᕈᖅ
ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

Highlights from the Agreement in Principle – INUKTITUT