ᕿᑭᖅᑕᓃᒃᑯᑦ ᑐᓴᖅᑎᑦᑎᕗᑦ ᓅᑕᓂ ᐱᓕᕆᐊᒃᓴᐅᓂᐊᖅᑐᓄᑦ ᕿᑭᖅᑕᓂ
ᐃᒃᐱᐊᕐᔪᒃ, ᓄᓇᕗᑦ – ᒪᐃ 31, 2017 – ᓄᓇᓕᖕᓄᑦ ᑐᑭᓯᒋᐊᕆᐊᖃᑦᑕᓚᐅᖅᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᓗᓇᐃᔭᐃᓯᒪᓕᖅᑐᑦ ᖃᓄᐃᑦᑐᓂ ᓄᑖᓂ ᐱᓕᕆᐊᒃᓴᓂ ᓴᖅᑭᑎᑦᑎᓂᐊᕐᓂᖏᓐᓄᑦ.
ᑖᒃᑯᐊ ᐱᓕᕆᐊᒃᓴᐃᑦ ᖃᓄᐃᓕᖓᓂᐊᕐᓂᖏᑦ ᑐᕌᖓᓂᐊᖅᑐ ᐅᑯᓄᖓ: ᐃᓕᖅᑯᓯᕐᒨᖓᔪᓂ, ᐊᒻᒪᓗ, ᐸᐃᕆᕕᑦ ᐊᒻᒪ ᓱᕈᓯᓛᑦ ᐃᓕᓐᓂᐊᕐᓂᖏᑕ ᒥᒃᓵᓄᓗ. ᑕᖅᑭᐅᓂᐊᖅᑐᑦ ᐊᒡᒋᖅᑐᓂ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᑖᒃᑯᓂᖓ ᓄᑖᓂ ᐱᓕᕆᐊᒃᓴᓂ ᐋᖅᑭᓱᐃᕙᓪᓕᐊᓂᐊᖅᑐᑦ ᑖᒃᑯᐊ ᐱᓕᕆᐊᒃᓴᑦ ᐱᔾᔪᑎᖏᑦ ᐊᑐᕐᓗᒋᑦ ᑖᒃᑯᓄᖓ 13ᓄᑦ ᕿᑭᖅᑕᓂ ᓄᓇᓕᖕᓄᑦ.
ᑕᖅᑭᓂᑦ ᖄᖏᖅᑐᓂ ᕿᑭᖅᑕᓃᒃᑯᑦ ᓄᓇᓕᖕᓄᑦ ᑐᑭᓯᒋᐊᕆᐊᖃᑦᑕᓚᐅᕐᒪᑦ ᐊᒻᒪᓗ ᐱᓕᕆᐊᒃᓴᓂ ᕿᒥᕐᕈᐃᓪᓗᑎᒃ ᑐᑭᓯᒃᑲᓐᓂᕈᒪᓪᓗᑎᒃ ᖃᓄᐃᑦᑐᒃᑲᓐᓂᕐᓂᒃ ᐱᓕᕆᐊᒃᓴᒃᑲᓐᓂᕐᓂᒃ ᓴᖅᑭᑦᑐᖃᕆᐊᖃᕐᒪᖔᑦ ᐊᒻᒪᓗ ᖃᓄᐃᑦᑐᓂᓗ ᐃᓄᐃᑦ ᓴᖅᑭᑎᑦᑎᖁᔨᓯᒪᖕᒪᑕᓗ ᓄᓇᓕᖏᓐᓂ. ᑖᒃᑯᐊ ᖃᐅᔨᔭᐅᓚᐅᖅᑐᑦ ᕿᒥᕐᕈᔭᐅᓚᐅᖅᑎᓪᓗᒋᑦ ᐅᓪᓗᒥ ᐃᒃᐱᐊᕐᔪᖕᒥ ᑲᑎᒪᑎᓪᓗᒋᑦ, ᑖᒃᑯᐊ ᕿᑭᖅᑕᓃᒃᑯᑦ ᑲᑎᒪᔨᖏᑦ ᓂᕈᐊᖅᖠᓚᐅᕐᒪᑕ ᒪᕐᕉᓂ ᐱᓕᕆᐊᒃᓴᐅᒃᑲᓐᓂᕐᓂᐊᖅᑐᓂ ᐱᒻᒪᕆᐅᔪᒃᑯᑦ ᐊᑑᑎᖃᕐᓂᐊᖅᑐᓄᑦ
“ᑭᐅᔾᔪᑎᒋᔭᐅᓚᐅᖅᑐᑦ ᓄᓇᓕᖕᓂᑦ ᑐᑭᓯᒋᐊᕆᐊᖃᑦᑕᖅᑎᓪᓗᒋᑦ ᑐᓴᖅᑕᐅᓚᐅᖅᑐᑦ ᐊᒻᒪᓗ ᓇᓗᓇᓐᖏᑦᑎᐊᖅᖢᑎᒃ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ.
“ᕿᑭᖅᑕᓂ ᐃᓄᐃᑦ ᐱᓕᕆᐊᒃᓴᖃᒃᑲᓐᓂᖁᔨᓚᐅᕐᒪᑕ ᓱᕈᓯᕐᓄᑦ ᐃᓅᓱᒃᑐᓄᓪᓗ ᑐᕌᖓᔪᓂ ᓱᕐᓗ ᐸᐃᕆᕖᑦ ᐊᒻᒪᓗ ᐱᔭᒃᓴᒃᑲᓐᓂᕐᓂ ᐃᓕᖅᑯᓯᕐᒨᖓᔪᓄᑦ ᓴᓐᖏᓕᕆᐊᒃᑲᓐᓂᖁᓪᓗᒍ ᖃᐅᔨᒪᓂᕆᔭᕗᑦ ᐃᓕᖅᑯᓯᑦᑎᓐᓂᑦ ᐅᖃᐅᓯᑦᑎᓐᓂᓗ.”
ᕿᑭᖅᑕᓃᒃᑯᑦ ᐱᓕᕆᐊᒃᓴᖅᑖᒃᑲᓐᓂᕈᓐᓇᕐᓂᖏᑦ ᓴᖅᑭᓯᒪᔪᑦ ᑖᔅᓱᒪᓐᖓᑦ ᕿᑭᖅᑕᓃᒃᑯᑦ ᓴᖅᑭᓵᖅᑕᖓᓂᑦ ᑮᓇᐃᔭᐃᑦ ᓂᖏᖅᑕᐅᔪᓄᑦ ᐊᑐᐊᒐᖓᓂᑦ ᑖᓐᓇᓗ ᐊᑐᐊᒐᖅ ᓴᖅᑮᓪᓗᓂ ᑭᖑᕚᖑᔪᓄᑦ ᑮᓇᐃᔭᐃᑦ ᐊᑐᖅᑕᐅᔪᒃᓴᒫᓄᑦ ᐸᐸᑦᑎᕕᐊᓂ ᐊᒻᒪᓗ ᐆᒥᖓ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓂᑦ. ᑖᓐᓇ ᑭᖑᕚᓄᑦ ᑮᓇᐅᔭᐃᑦ ᐊᑐᖅᑕᐅᔪᒃᓴᒫᑦ ᑮᓇᐅᔭᖏᑦ ᐱᕈᕌᖓᑕ ᑖᒃᑯᐊᑦᑕᐅᖅ ᑮᓇᐅᔭᐃᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᑦ ᐊᖏᓪᓕᒃᑲᓐᓂᖃᑦᑕᕐᓂᐊᖅᑐᑦ ᑐᕌᖓᔪᓂ ᐱᓕᕆᐊᒃᓴᓄᑦ ᐃᓄᓐᓄᑦ. ᐊᕐᕌᒎ, ᕿᑭᖅᑕᓃᒃᑯᑦ ᑮᓇᐅᔭᖅᑖᒃᑲᓐᓂᓛᕋᓱᒋᔪᑦ $1 ᒥᓕᔭᒃᑲᓐᓂᕐᓂ ᐱᓕᕆᐊᒃᓴᓄᑦ ᕿᑭᖅᑕᓂᒥᐅᓄᑦ.
ᑐᑭᓯᒃᑲᓐᓂᕈᐊᕈᕕᑦ ᖃᐅᔨᒋᐊᕐᕕᒃᓴᖅ:
ᓰᒪ ᓴᕼᐋ ᓯᐊᕋᕼᐃ,
ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
szerehi@qia.ca
(867) 975.8413
1.800.667.2742
