ᑲᑐᔾᔨᖃᑎᒌᒃᑯᑦ ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᖓᑦ ᐋᖅᑭᑦᑕᐅᓚᐅᕐᓯᒪᔪᖅ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᑲᑐᔾᔨᖃᑎᒌᒃᑯᑦ ᑐᑭᓯᓇᑦᑎᐊᖅᑐᒥᒃ ᐊᒻᒪᓗ ᑐᑭᓯᔭᔅᓴᐅᑎᐊᖅᑐᒥᒃ ᑮᓇᐅᔭᓕᕆᓂᕐᒧᑦ ᐸᕐᓇᐅᑎᖃᕐᓂᖏᓐᓂᒃ ᐃᑲᔫᑎᓕᒻᒥᒃ ᐃᓄᓐᓄᑦ ᐅᓪᓗᒥ ᐊᒻᒪᓗᑦᑕᐅᖅ ᓯᕗᓂᔅᓴᑎᓐᓂ. ᐊᑐᐊᒐᑦ ᐊᖏᖅᑕᐅᓚᐅᕐᓯᒪᔪᑦ ᐅᑐᐱᕆ 2016ᖑᑎᓪᓗᒍ ᐊᕐᕌᒍᑕᒫᕐᓯᐅᒻᒥᑦ ᑲᑎᒪᕕᔾᔪᐊᕐᓂᖃᖅᑎᓪᓗᒋᑦ ᐊᕐᕌᒍᒐᓴᓐᓂᑦ ᐃᖅᑲᓇᐃᔮᖃᕐᓯᒪᓪᓗᑎᒃ, ᐱᔾᔪᑎᖃᖅᑐᓂ ᐱᖓᓱᓪᓗᐊᑕᐅᔪᓂᑦ: ᐊᐅᓚᓂᕐᓂᑦ, ᐊᑯᓃᖅᑐᒥᒃ ᐊᑐᙱᓂᕐᓴᐅᒍᑕᐅᓂᐊᖅᑐᓂᑦ, ᐊᒻᒪᓗ ᐃᑲᔫᑎᓂᑦ ᐃᑲᔫᓯᐊᔅᓴᓂᓪᓗ ᐃᓄᓐᓄᑦ ᑐᕌᖓᔪᓂᑦ.

ᐊᑐᐊᒐᑦ ᐊᕐᕌᒍᑕᒫᑦ ᑮᓇᐅᔭᓄᑦ ᐃᓯᖃᑦᑕᕆᐊᓕᓐᓄᑦ ᐊᑐᕐᓂᐊᕐᖓᑦ ᑲᔪᓯᑎᑦᑎᒍᑕᐅᖃᑦᑕᕐᓗᑎᒃ ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔮᕆᕙᑦᑕᖏᓐᓂᒃ ᐊᒻᒪᓗ ᐃᑲᔫᑎᒋᕙᑦᑕᖏᓐᓂᒃ ᐊᑕᐅᑦᑎᑯᓪᓗ ᐃᑲᔫᑎᖃᖅᑐᑎᒃ ᐊᑯᓃᖅᑐᒥᒃ ᐊᑐᙱᓂᕐᓴᐅᑎᑦᑎᖃᑦᑕᓂᕐᒥᒃ ᑮᓇᐅᔭᓂᑦ ᑲᑐᔾᔨᖃᑎᒌᒃᑯᑦ ᓯᕗᓂᕆᓂᐊᖅᑕᖓᓐᓄᑦ ᐊᒻᒪᓗ ᑲᑐᔾᔨᖃᑎᒌᒃᑯᑦ ᐃᓅᓯᓕᕆᓂᕐᒧᑦ ᐃᑲᔫᑎᒋᕙᑦᑕᖏᓐᓄᑦ. ᑲᑐᔾᔨᖃᑎᒌᒃᑯᑦ ᐊᐅᓚᓂᖃᓲᖑᒻᒪᑕ ᑕᒪᒃᑮᓐᓂᒃ ᐃᓘᓐᓇᖏᓐᓅᖓᔪᓂᑦ ᑮᓇᐅᔭᓂᑦ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ ᑮᓇᐅᔭᓂᑦ.

ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᑦ ᐋᖅᑮᒍᑕᐅᔪᒻᒪᑦ ᒪᕐᕉᓐᓂᒃ ᑮᓇᐅᔭᐅᖃᑦᑕᓂᐊᓕᖅᑑᓐᓂᒃ ᑲᑐᔾᔨᖃᑎᒌᒃᑯᓐᓂ, ᕿᒪᒃᑲᑯᔅᓴᑦ ᑮᓇᐅᔭᑦ ᐊᒻᒪᓗ ᐃᑲᔫᓯᐊᔅᓴᑦ ᑮᓇᐅᔭᑦ

ᕿᒪᒃᑲᑯᔅᓴᑦ ᑮᓇᐅᔭᑦ ᐋᖅᑭᑦᑕᐅᓯᒪᔪᑦ ᐱᕈᕐᐸᓪᓕᐊᑎᑦᑎᓂᐊᕐᖓᑕ ᑮᓇᐅᔭᓂᑦ ᓯᕗᓂᔅᓴᑎᓐᓄᑦ.

ᐃᑲᔫᓯᐊᔅᓴᑦ ᑮᓇᐅᔭᑦ ᐊᑐᖅᑕᐅᓲᑦ ᐃᑲᔫᑎᓂᑦ ᑲᔪᓯᑎᑦᑎᓂᕐᒧᑦ ᐃᓄᓐᓄᑦ.

ᕿᒪᒃᑲᑯᔅᓴᑦ ᑮᓇᐅᔭᑦ ᐱᕈᕐᐸᓪᓕᐊᑎᓪᓗᒋᑦ ᑮᓇᐅᔭᑦ ᐃᓯᕐᐸᑦᑐᑦ ᑮᓇᐅᔭᓂᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ

ᑐᕌᖃᑦᑕᕐᖓᑕ ᐊᒥᓱᕈᒃᑲᓐᓂᖃᑦᑕᖁᓪᓗᒋᑦ ᐃᑲᔫᑎᐅᕙᑦᑐᑦ ᐃᓄᓐᓄᑦ.

ᓄᐊᓴᐃᓪᓗᑎᒃ ᕿᒪᒃᑲᑯᔅᓴᓂᑦ ᑮᓇᐅᔭᓂᑦ, ᑲᑐᔾᔨᖃᑎᒌᒃᑯᑦ ᓂᕆᐅᑉᐳᑦ ᐃᑲᔫᓯᐊᔅᓴᖃᖅᑎᑦᑏᓐᓇᕐᓂᐊᕆᐊᔅᓴᖅ ᐃᓄᓐᓄᑦ, ᑮᓇᐅᔭᑦ ᐃᓯᕐᐸᑦᑐᑦ ᖃᑦᑏᓐᓇᐅᓂᕐᓴᐅᒐᓗᐊᕋᐃᑉᐸᑕ. ᐊᑐᐊᒐᑦ ᐃᑲᔫᑎᖃᕐᒥᔪᑦ ᐸᓚᕐᓯᐅᒥᑎᑦᑎᓯᒪᓂᕐᒥᒃ ᐃᓄᐃᑦ ᑐᕚᖃᖃᑦᑕᕐᓂᖏᓐᓂᒃ ᓯᓚᑖᓃᑦᑐᓂᑦ ᑮᓇᐅᔭᓂᑦ ᐋᖅᑭᔅᓯᓯᒪᓪᓗᑎᒃ ᐃᖅᑲᓇᐃᔭᕐᕕᐅᑉ ᐃᓗᐊᓂ ᑮᓇᐅᔭᓂᑦ ᐃᓯᕐᐸᑦᑐᓂᑦ ᐃᑲᔫᓯᐊᔅᓴᓄᑦ ᐃᑲᔫᑎᓄᓪᓗ ᑐᕌᖓᔪᓂᑦ.

ᑮᓇᐅᔭᑦ ᕿᒪᒃᑲᑯᔅᓴᐃᑦ ᓇᑭᙶᖃᑦᑕᕐᖓᑕ?

ᑮᓇᐅᔭᑦ ᑲᑐᔾᔨᖃᑎᒌᒃᑯᓐᓂᑦ ᐱᕈᕐᐸᓪᓕᐊᑎᑕᐅᓂᐊᖅᑐᑦ ᕿᒪᒃᑲᑯᔅᓴᐃᑦ ᑮᓇᐅᔭᑦ ᓇᑭᑐᐃᓐᓈᖃᑦᑕᖅᑐᑦ ᐅᑯᐊ ᐃᓚᒋᔭᐅᓪᓗᑎᒃ:

• ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᔅᓴᖏᓐᓄᓪᓗ ᐊᖏᕈᑎᓂᑦ ᐊᑭᓕᐅᑏᑦ ᐊᖏᔫᑎᓂᑦ ᐱᓕᕆᐊᖑᔪᓂᑦ.
• ᑮᓇᐅᔭᑦ ᐱᔭᐅᕙᑦᑐᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐅᔭᕋᓐᓂᐊᓂᕐᒥᑦ ᐃᓄᐃᑦ ᓄᓇᖁᑎᖏᓐᓃᑦᑐᓂᑦ ᐅᔭᕋᑦᑕᕋᔅᓴᓂᑦ.
• ᑮᓇᐅᔭᑦ ᐱᔭᐅᓯᒪᔪᑦ ᓯᐅᕋᖅᑕᓂᕐᒧᑦ ᑐᐊᐸᑦᑕᓂᕐᒧᓪᓗ ᐱᓕᕆᐊᖑᕙᑦᑐᓂᑦ ᐃᓄᐃᑦ ᓄᓇᖁᑎᖏᓐᓂ.
• ᓂᖏᖅᑕᕈᑏᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓂ ᐊᒻᒪᓗ ᓄᓇᓯ ᑯᐊᐳᕇᓴᒃᑯᓐᓂ.
• ᑮᓇᐅᔭᑦ ᐱᔭᐅᓯᒪᔪᑦ ᓇᑭᑐᐃᓐᓇᖅ ᐱᕈᕐᐸᓪᓕᐊᑎᑕᐅᔪᓂᑦ ᕿᒪᒃᑲᑯᔅᓴᓂᑦ ᑮᓇᐅᔭᓂᑦ.

ᕿᒪᒃᑲᑯᔅᓴᑦ ᑮᓇᐅᔭᑦ ᐱᔪᓐᓇᕐᒥᔪᑦ ᑮᓇᐅᔭᓂᑦ ᐊᒥᐊᒃᑯᓂᑦ ᐱᕙᓪᓕᐊᔪᓕᕆᓂᕐᒧᑦ ᑮᓇᐅᔭᓃᙶᖅᑐᓂᑦ.

ᕿᒪᒃᑲᑯᔅᓴᑦ ᑮᓇᐅᔭᑦ ᓴᓇᔭᐅᓯᒪᔪᑦ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᑮᓇᐅᔭᑦ ᐃᓯᖅᑐᑦ ᐃᓕᔭᐅᕙᑦᑐᑦ ᕿᒪᒃᑲᑯᔅᓴᓄᑦ ᑮᓇᐅᔭᓄᑦ ᐊᑐᖅᑕᐅᖃᑦᑕᖁᓇᒋᑦ ᑲᑐᔾᔨᖃᑎᒌᒃᑯᑦ ᐊᐅᓚᓂᖏᓐᓄᑦ, ᑕᐃᒫᒃ ᓴᐳᑎᔭᐅᓯᒪᓂᐊᕐᖓᑕ ᐊᑯᓃᖅᑐᒥᒃ ᐃᑲᔫᓯᐊᔅᓴᑦ ᐃᓄᓐᓄᑦ.

ᖃᓄᖅ ᑮᓇᐅᔭᑦ ᐃᖏᕐᕋᕙᑉᐸᑦ ᕿᒪᒃᑲᑯᔅᓴᓂᑦ ᑮᓇᐅᔭᓂᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ?

ᐃᑲᔫᓯᐊᔅᓴᑦ ᑮᓇᐅᔭᑦ ᓴᓇᔭᐅᓯᒪᔪᑦ ᐊᕐᕌᒍᑕᒫᑦ ᐊᑭᓕᖅᑕᐅᖃᑦᑕᓂᐊᖅᑐᑎᒃ ᕿᒪᒃᑲᑯᔅᓴᓂᑦ ᑮᓇᐅᔭᓂᑦ. ᑕᐃᒫᒃ ᑲᑐᔾᔨᖃᑎᒌᒃᑯᑦ ᖃᐅᔨᒪᑦᑎᐊᓂᐊᕐᖓᑕ ᑐᙵᕕᖃᑦᑎᐊᕐᓂᖏᓐᓂᒃ ᑮᓇᐅᔭᐃᑦ ᐃᖏᕐᕋᑎᑦᑎᓂᕐᒧᑦ ᐃᑲᔫᑎᓂᑦ ᑮᓇᐅᔭᑦ ᐃᓯᕐᐸᑦᑐᑦ ᐊᓯᔾᔨᖃᑦᑕᕐᓂᐊᕋᓗᐊᖅᑎᓪᓗᒋᑦ. ᑮᓇᐅᔭᑦ ᐃᑲᔫᑎᓂᑦ ᓯᕕᑦᑐᕆᐊᖅᑎᑦᑎᖃᑦᑕᓂᐊᕐᒥᔪᑦ ᓯᕗᓂᔅᓴᑎᓐᓂ ᐱᕈᕐᐸᓪᓕᐊᑎᑕᐅᔪᑦ ᑮᓇᐅᔭᑦ ᐱᕈᕐᐸᓪᓕᐊᓂᖏᓐᓂ.

ᐊᓯᖏᑦ ᑲᑐᔾᔨᖃᑎᒌᒃᑯᓐᓂ ᑮᓇᐅᔭᐃᑦ:

ᑲᑐᔾᔨᖃᑎᒌᒃᑯᓐᓂ ᐱᕙᓪᓕᐊᔪᓕᕆᓂᕐᒧᑦ ᑮᓇᐅᔭᑦ ᓴᓇᔭᐅᓯᒪᔪᑦ ᑮᓇᐅᔭᖅᑖᖃᑦᑕᖁᓪᓗᒋᑦ ᓚᐃᓴᓂᑦ ᐊᑐᖅᑐᐊᕈᑎᓂᓪᓗ ᐃᓄᐃᑦ ᓄᓇᖁᑎᖏᓐᓂᒃ. ᑖᒃᑯᐊ ᑮᓇᐅᔭᐃᑦ ᓯᕗᓪᓕᕐᒥ ᐃᓕᔭᐅᓲᑦ ᑲᑐᔾᔨᖃᑎᒌᒃᑯᑦ ᐊᐅᓚᓂᖏᓐᓄᑦ ᐊᒻᒪᓗ ᑭᖑᓂᐊᒍᑦ ᕿᒪᒃᑲᑯᔅᓴᓄᑦ ᑮᓇᐅᔭᓄᑦ ᐃᓕᔭᐅᓕᕐᐸᑦᑐᑎᒃ.

ᑲᑐᔾᔨᖃᑎᒌᒃᑯᑦ ᐃᓘᓐᓇᖏᓐᓅᖓᔪᑦ ᑮᓇᐅᔭᑦ ᑮᓇᐅᔭᒃᑯᕕᒋᔭᐅᔪᖅ ᑲᑐᔾᔨᖃᑎᒌᒃᑯᑦ ᐱᕙᑦᑕᖏᓐᓂᒃ ᐊᒻᒪᓗ ᐃᓕᓯᕙᑦᑐᑎᒃ ᐊᕐᕌᒍᑕᒫᑦ ᑮᓇᐅᔭᓂᑦ ᐃᑲᔫᑕᐅᕙᑦᑐᓂᑦ ᓄᓇᕗᒥ ᑮᓇᐅᔭᓂᑦ ᐸᐸᑦᑎᔨᓂᑦ.