ᐊᑐᐊᒐᑦ ᐊᒪᓗ ᖃᐅᔨᓴᕐᓂᖅ
ᒪᓕᑦᑐᒍ ᐃᓚᖓ 32 ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂᑦ, ᐃᓄᐃᑦ ᐱᔪᓐᓇᐅᑎᖃᕐᖓᑕ ᐱᖃᑕᐅᖃᑦᑕᕆᐊᖃᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒥᓪᓗ ᐊᑐᐊᒐᕐᓂᑦ ᐊᒻᒪᓗ ᐋᖅᑭᔅᓱᐃᖃᑦᑕᓂᕐᒥᒃ ᐃᓅᓯᓕᕆᓂᔾᔪᑕᐅᓂᐊᖅᑐᓂᑦ ᐃᓕᖅᑯᓯᓕᕆᔾᔪᑕᐅᓂᐊᖅᑐᓂᓪᓗ ᐱᔨᑦᑎᕋᐅᑕᐅᓂᐊᖅᑐᓂᓪᓗ ᑕᒪᑐᒧᖓ. ᑖᓐᓇ ᐱᔾᔪᑎᒋᓪᓗᒍ, ᒐᔭᒪᒃᑯᑦ ᑲᒪᒋᔭᔅᓴᖃᕐᖓᑕ ᑕᕝᕙᓃᑦᑐᖅ ᐃᓚᖓᓂ ᒪᓕᑦᑐᒍ ᖃᐅᔨᒪᒋᐊᕆᐊᖃᖃᑦᑕᓂᕐᒥᒃ ᐃᓄᐃᑦ ᐱᓇᓱᐊᕋᔅᓴᖃᖅᑎᑕᐅᖃᑦᑕᕋᓗᐊᕐᒪᖔᑕ ᐱᖃᑕᐅᖃᑦᑕᓂᕐᒧᑦ ᐊᑐᐊᒐᓕᕆᓂᕐᒥᒃ ᐱᓕᕆᐊᔅᓴᓕᕆᓂᕐᒥᓪᓗ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᒋᔭᐅᕙᑦᑐᑦ ᐊᒥᓱᓂᑦ ᑎᒍᒥᐊᖅᑎᐅᖃᑕᐅᓪᓗᑎᒃ ᐱᓇᓱᐊᕈᑎᖃᕐᐸᑦᑐᑎᒃ ᑲᒪᒋᔭᖃᕐᓂᕐᒥᒃ ᐃᓅᓯᓕᕆᓂᕐᒨᖓᔪᓂᑦ ᓄᓇᕗᒥ. ᐃᓅᓯᓕᕆᓂᕐᒧᑦ ᐸᕐᓇᐃᔩᑦ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᖃᑎᖃᕐᐸᑦᑐᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐊᒻᒪᓗ ᐊᓯᖏᓐᓂᒃ ᐊᕕᑦᑐᕐᓯᒪᓂᐅᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᓐᓂ ᑖᒃᑯᐊ ᐱᔾᔪᑎᒋᓪᓗᒋᑦ ᐱᔾᔪᑎᒋᓪᓗᒍ ᓱᕐᕋᐃᕙᒻᒪᑕ ᐃᓄᓐᓂᑦ ᓄᓇᓕᓐᓂᑦ ᓄᓇᑦᑎᓐᓂ, ᕿᑭᖅᑕᓂ ᓄᓇᓕᓐᓂᑐᐃᓐᓇᐅᖏᑦᑐᖅ.
ᑲᑐᔾᔨᖃᑎᒌᒃᑯᑦ ᐃᑲᔪᕐᐸᑦᑐᑦ ᓄᓇᓕᓐᓂᑦ ᐱᖃᐅᑎᑦᑎᓂᕐᒧᑦ ᐊᑐᖅᑕᐅᕙᑦᑐᒥ ᐊᑑᑎᓕᒻᒥᒃ ᑐᑭᓯᒋᐊᕐᕕᖃᖃᑦᑕᓂᐊᕐᖓᑕ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ:
- ᑭᒃᑯᑐᐃᓐᓇᐃᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᖃᑎᒌᑦ ᑲᔪᓰᓐᓇᖅᑐᒥᒃ ᐱᓕᕆᖃᑎᖃᐃᓐᓇᖃᑦᑕᕋᓗᐊᕐᒪᖔᑕ ᑐᑭᑖᕈᑎᖃᕐᐸᑦᑐᓂᑦ;
- ᐋᖅᑭᐅᒪᒍᑕᐅᓂᐊᖅᑐᑦ ᐱᔭᕆᐊᑐᔪᓄᑦ ᐊᑲᐅᙱᓕᐅᕈᑕᐅᔪᓄᑦ ᐃᓚᐅᕕᐅᖃᑦᑕᕋᓗᐊᕐᒪᖔᑕ ᐊᒥᓲᓂᕐᐹᕆᔪᓐᓇᖅᑕᖏᓐᓄᑦ ᑭᒃᑯᑐᐃᓐᓇᕐᓄᑦ;
- ᓄᓇᓖᑦ ᑲᒪᖃᑕᐅᖃᑦᑕᓂᐊᕐᖓᑕ ᑐᑭᑖᕈᑕᐅᓂᐊᖅᑐᓂᑦ ᐊᑦᑐᐃᓂᖃᕐᓂᐊᖅᑐᓂᑦ ᐃᒻᒥᓐᓄᑦ, ᐊᒻᒪᓗ
- ᐃᓕᕝᕕᒋᖃᑦᑕᐅᑎᔪᓐᓇᕋᑦᑕ ᐊᒻᒪᓗ ᐃᑲᔪᖅᑎᒌᒍᓐᓇᖅᑐᑕ.
ᓄᓇᕗᒥ ᑳᖃᑦᑕᓂᕐᒥᒃ ᐊᔪᕐᓴᓂᕐᒥᓪᓗ ᐋᔩᖃᑎᒌᑦᑏᑦ
ᓄᓇᕗᒥ ᑳᖃᑦᑕᓂᕐᒥᒃ ᐊᔪᕐᓴᓂᕐᒥᓪᓗ ᐋᔩᖃᑎᒌᑉᐸᑦᑐᑦ ᑲᑎᑎᑦᑎᕙᑦᑐᑦ ᑕᒪᔅᓱᒥᖓᔅᓴᐃᓐᓇᖅ ᐃᓱᒪᒋᔭᐊᖅᑐᓂᑦ: ᓄᓇᕗᑦ, ᐊᒻᒪᓗ ᐊᑐᓂᑦ ᓄᓇᓕᖁᑎᕗᑦ, ᐊᔪᕐᓴᖏᓪᓗᑎᒃ. ᑕᒪᑦᑕ ᐃᓕᓴᕐᓯᓯᒪᒐᑦᑕ ᓯᕕᑐᓂᕐᓴᒥᒃ ᑲᑐᔾᔨᖃᑎᒌᖃᑦᑕᕆᐊᖃᕐᓂᑎᓐᓂᒃ ᑲᔪᓯᑎᑦᑎᔪᒪᓂᐊᕈᑦᑕ ᐃᓱᒪᒋᔭᐅᓯᒪᔪᒥᒃ.
ᑲᑐᔾᔨᖃᑎᒌᒃᑯᑦ ᐱᒋᐊᖅᑎᑦᑎᖃᑕᐅᓯᒪᒻᒪᑕ ᓄᓇᕗᒥ ᑳᖃᑦᑕᓂᕐᒥᒃ ᐊᔪᕐᓴᓂᕐᒥᓪᓗ ᐋᔩᕋᕈᑎᖃᖃᑦᑕᓂᕐᒥᒃ ᐊᒻᒪᓗ ᓱᓕ ᐃᑲᔪᖅᑎᓪᓚᕆᐅᕙᑦᑐᑎᒃ ᑲᑎᒪᓂᕆᕙᑦᑕᖏᓐᓂᒃ.
ᓄᓇᕗᒥ ᓂᕿᖃᐃᓐᓇᑎᑦᓯᓂᕐᒧᑦ ᑲᑐᔾᔨᖃᑎᒌᑦ
ᓄᓇᕗᒥ ᓂᕿᖃᐃᓐᓇᑎᑦᑎᓂᕐᒧᑦ ᑲᑐᔾᔨᖃᑎᒌᑦ ᑲᑐᔾᔨᖃᑎᒌᑉᐸᑦᑐᑦ ᒐᕙᒪᒃᑯᑦ ᐊᓪᓚᕝᕕᖏᓐᓃᙶᕐᓯᒪᔪᑦ, ᐃᓄᐃᑦ ᑲᑐᔾᔨᖃᑎᒌᖏᓐᓃᙶᕐᓯᒪᔪᑦ, ᒐᕙᒪᐅᙱᑦᑐᓂᓪᓗ ᑲᑐᔾᔨᖃᑎᒌᓃᙶᕐᓯᒪᔪᑦ, ᐊᒻᒪᓗ ᓇᒻᒥᓂᖃᖅᑎᐅᔪᑦ ᑲᑐᔾᔨᖃᑎᒌᑦᑐᑦ ᐋᖅᑭᒋᐊᕐᓯᓇᓱᑦᑐᑎᒃ ᓂᕿᖃᐃᓐᓇᑎᑦᓯᓂᕐᒧᑦ ᓄᓇᕗᒥ.
ᑲᑐᔾᔨᖃᑎᒌᑦ ᐊᐅᓚᓂᖃᓲᑦ ᑲᑎᒪᕕᔾᔪᐊᓂᕐᒧᑦ ᑲᒪᒋᔭᔅᓴᖃᕐᐸᑦᑐᑎᒃ, ᐊᒻᒪᓗ ᐃᑲᔪᖅᑕᐅᕙᑦᑐᑎᒃ ᑲᑐᔾᔨᖃᑎᒌᑦ ᑎᑎᕋᕐᕕᖓᓐᓄᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᖅᑎᑦᑎᖃᑕᐅᓯᒪᔪᑦ ᑖᒃᑯᓂᖓ ᑲᑐᔾᔨᖃᑎᒌᓂᑦ.
ᐃᓅᓯᐅᑉ ᐊᓯᔾᔨᐸᓪᓕᐊᓂᖓᓂᒃ ᐅᔾᔨᕐᓱᕐᓂᖅ ᐱᓕᕆᐊᖅ
ᑲᑐᔾᔨᖃᑎᒌᒃᑯᑦ ᐃᑲᔪᖃᑦᑕᕐᖓᑕ ᓄᓇᓕᓐᓂᑦ ᖃᐅᔨᓴᖅᑎᐅᔪᓂᑦ ᐋᖅᑭᔅᓱᐃᑎᓪᓗᒋᑦ ᖃᐅᔨᓴᐅᑎᒋᓂᐊᖅᑕᖏᓐᓂᒃ ᓄᐊᑦᑎᓂᐊᕐᖓᑕ ᓄᓇᓕᓐᓂᑦ-ᒪᑭᒪᓇᓱᐊᕈᑏᑦ ᒥᔅᓵᓄᑦ ᑐᑭᓯᐅᒪᔾᔪᑎᔅᓴᓂᑦ ᑎᓴᒪᓂᑦ ᓄᓇᓕᓐᓂᑦ ᓱᕐᕋᑦᑕᐅᓯᒪᔪᓂᑦ ᓄᓇᒥᐅᑕᓕᕆᓂᕐᒧᑦ. ᐃᓅᓯᐅᑉ ᐊᓯᔾᔨᕐᐸᓪᓕᐊᓂᖓᓂᒃ ᐅᔾᔨᕐᓱᕐᓂᖅ ᐱᓕᕆᐊᕐᒥ ᑲᒪᒋᔭᖃᕐᐸᑦᑐᑦ ᒥᑦᑎᒪᑕᓕᒻᒥ, ᐃᒡᓗᓕᒻᒥ ᑭᙵᕐᓂᓪᓗ.
ᖃᐅᔨᓴᐅᒻᒥ ᐊᐱᖅᑯᑏᑦ ᐊᕕᑦᑐᕐᓯᒪᔪᑦ ᐱᖓᓱᐃᓕᖅᑲᖓᓪᓗᑎᒃ ᖃᐅᔨᓴᕈᑕᐅᓪᓗᐊᑕᕐᐸᑦᑐᓂᑦ ᐱᔾᔪᑎᖃᖅᑐᑎᒃ ᓄᓇᓕᓐᓂᑦ ᐃᓅᓯᕐᒥᑦ ᐊᒥᓱᓄᑦ ᑭᒃᑯᑐᐃᓐᓇᕐᓄᑦ ᐃᓱᒫᓘᑕᐅᓚᐅᕐᓯᒪᒻᒪᑦ
ᐊᓯᔾᔨᕐᓂᐊᕆᐊᔅᓴᖓᓂᒃ ᐅᔭᕋᓐᓂᐊᖅᑐᖃᓪᓚᕆᓕᖅᑲᑦ ᓄᓇᓕᑦᑎᓐᓂ. ᖃᐅᔨᓴᕈᑕᐅᓪᓗᐊᑕᕐᐸᑦᑐᑦ ᐅᑯᐊ:
- ᐊᓯᔾᔨᕐᓂᐅᔪᑦ ᐊᖑᓇᓱᖃᑦᑕᓂᕐᒥ ᐊᒻᒪᓗ ᓂᕿᖃᖅᑎᑦᑎᖃᑦᑕᓂᕐᒥ;
- ᐊᓯᔾᔨᕐᓂᐅᔪᑦ ᐃᓚᒌᒍᓯᕐᓂᑦ ᓄᓇᖅᑲᑎᒌᒍᓯᕐᓂᓪᓗ, ᐊᒻᒪᓗ
- ᐊᓯᔾᔨᕐᓂᐅᔪᑦ ᐱᖃᑕᐅᓂᕆᕙᑦᑕᑎᓐᓂᒃ ᓄᓇᖅᑲᑎᑦᑕ ᐃᓅᓯᖏᓐᓂ.
ᖃᐅᔨᒍᑕᐅᔪᑦ ᖃᐅᔨᓴᕐᓂᕐᒥ ᑕᑯᔭᐅᔪᓐᓇᖅᑐᑦ ᐅᕙᓂ ᐅᓂᒃᑳᓕᐊᖑᓯᒪᔪᓂᑦ: