ᐃᖃᓗᐃᑦ, ᓄᓇᕗᑦ – ᕕᑉᕗᐊᓕ 28, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂᒃᑯᑦ) ᑲᔪᓯᒋᐊᕈᒪᔾᔪᑎᖃᓕᖅᑐᑦ ᑲᓇᑕ ᒐᕙᒪᖓᑕ ᐅᖃᐅᓯᖓᓂᒃ ᓴᐃᒻᒪᖃᑎᒌᓐᓂᕐᒧᑦ ᐊᒻᒪᓗ ᐅᖃᖃᑎᖃᕐᓂᕐᒥᒃ ᐃᖅᑲᓇᐃᔮᖃᕐᓂᕐᒥᒃ ᓄᑖᓐᖑᕆᐊᖅᑕᐅᔪᒥᒃ ᑯᐃᓐ−ᐃᓄᐃᑦ ᐱᓇᓱᐊᖃᑎᒌᓐᓂᖏᓐᓂᒃ. ᑭᓯᐊᓂᓕ, ᐃᓄᐃᑦ ᓄᓇᕗᒻᒥ ᕿᑭᖅᑕᓂ ᓄᓇᖓᓂ ᑕᑯᔪᒪᔪᑦ ᐋᖅᑭᑦᓯᒪᑦᓯᐊᖅᑐᓂᒃ ᐊᐅᓚᔾᔪᑎᒃᓴᓂᒃ ᑲᒪᒋᔭᐅᓕᕋᐃᑉᐸᑕ ᐃᓅᓯᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ ᓄᓇᕗᒻᒥ.

ᑖᓐᓇ ᐱᓇᓱᐊᖃᑎᒌᒍᑎᒃᓴᖅ ᓄᓇᕗᒻᒥ, ᑐᑭᒧᐊᒃᑎᑎᑕᐅᔪᖅ ᑐᓐᖓᕕᓕᐊᖑᓯᒪᔪᓄᑦ ᓴᐃᒻᒪᖃᑎᒌᓐᓂᕐᒧᑦ, ᓇᓗᓇᐃᔭᖅᑕᐅᓯᒪᔪᖅ ᕿᑭᖅᑕᓂᒃᑯᑦ ᑎᑎᖅᑲᒃᑯᑦ ᑐᓂᓯᒪᔭᖏᓐᓂᒃ ᑲᓇᑕ ᒐᕙᒪᖓᓄᑦ, ᑕᐃᒎᓯᓕᒃ, “ᓄᑖᖅ ᐊᐅᓚᔾᔪᑎᒃᓴᖅ ᐱᕙᓪᓕᐊᔪᓕᕆᓂᕐᒧᑦ ᓄᓇᕗᒻᒥ.” ᑖᓐᓇ ᑎᑎᕋᕐᓯᒪᔪᖅ ᑐᓂᔭᐅᓚᐅᖅᑐᖅ ᑲᓇᑕ ᒐᕙᒪᖓᓄᑦ ᔭᓐᓄᐊᓕᒥ ᐊᑐᐃᓐᓇᐅᓕᖅᑐᖅ ᑭᒃᑯᑐᐃᓐᓇᕐᓄᑦ ᖃᓪᓗᓈᑎᑐᑦ ᐃᓄᒃᑎᑐᓪᓗ.

ᑖᓐᓇ ᑎᑎᕋᕐᓯᒪᔪᖅ, ᓵᖏᓐᓅᖅᑕᐅᔪᖅ ᐅᓪᓗᒥ ᕿᑭᖅᑕᓂ ᑲᑎᒪᔩᑦ ᑲᑎᒪᓂᖓᓂ ᐊᖓᔪᖅᑳᖓᓄᑦ ᐲᔭᐃ ᐊᕿᐊᕈᖅ, ᑐᓂᔭᐅᓚᐅᖅᑐᑦ ᑲᓇᑕ ᒐᕙᒪᖓᓄᑦ ᔭᓐᓄᐊᓕ 31, 2018−ᒥ. ᑕᑯᔭᒃᓴᐅᓕᖅᑐᑦ ᑭᒃᑯᑐᐃᓐᓇᕐᓄᑦ ᐃᓄᒃᑎᑑᖓᔪᑦ ᖃᓪᓗᓈᑎᑐᓪᓗ.

ᒫᓐᓇ, ᕿᑭᖅᑕᓂᒃᑯᑦ ᐃᖅᑲᓇᐃᔭᖃᑎᓖᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᕐᔪᐊᑯᓐᓂᒃ ᓴᖅᑮᒍᑎᒃᓴᓂᒃ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ (NMCA). ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᓂᕐᒧᓪᓗ ᐊᖏᖃᑎᒌᒍᑏᑦ ᐊᒻᒪᓗ ᐊᐅᓚᓯᔾᔪᑕᐅᑲᐃᓐᓇᓂᐊᖅᑐᑦ ᐸᕐᓇᐅᑏᑦ ᐊᖏᖅᑕᐅᓯᒪᓕᕐᐸᑕ, ᑕᒪᓐᓇ ᑕᕆᐅᖅ, ᒪᕐᕈᐃᓱᕐᓗᐊᖅᑐᓂ ᐊᖏᓂᓕᒃ ᓅᕙ ᓯᑰᓴᒥᒃ, ᑲᓇᑕᒥ ᐊᖏᓂᕐᐹᖑᓂᐊᖅᑐᖅ ᑕᕆᐅᕐᓂ ᓴᐳᔾᔭᐅᓯᒪᔪᓂ. ᑕᑦᓱᒧᖓ, ᐊᑎᓕᐅᕈᑕᐅᓚᐅᖅᑎᓪᓗᒍ ᐊᖏᖃᑎᒌᒍᑏᑦ, ᓇᓗᓇᐃᖅᑕᐅᓯᒪᓂᐊᖅᑐᖅ 1.9 ᐳᓴᓐ ᑲᓇᑕ ᒐᕙᒪᒃᑯᖏᓐᓄᑦ ᓯᓚᕐᔪᐊᒥ ᐊᕙᑎᒥᒃ ᒥᐊᓂᕐᓯᒪᓂᕐᒧᑦ ᑐᕌᒐᓕᐊᖑᓯᒪᔪᓂᒃ ᓴᐳᔾᔨᓯᒪᓂᕐᒧᑦ ᑕᕆᐅᓕᒫᖓ 10 ᐳᓴᓐᖓ 2020-ᒥ.

ᓇᓗᓇᐃᖅᑕᐅᓯᒪᓂᖓᓄᑦ ᐃᓄᐃᑦ ᑲᑐᔾᔨᖃᑎᒌᑦ ᑭᒡᒐᖅᑐᐃᔪᑦ ᑕᓪᓕᒪᓂᒃ ᖁᑦᑎᑦᑐᒥ ᓄᓇᓕᓐᓂᒃ ᑭᒡᓕᓕᐊᖑᓯᒪᓂᖏᓐᓃᑦᑐᓂ ᑖᒃᑯᐊ ᐃᒪᐃᑦ, ᕿᑭᖅᑕᓂᒃᑯᑦ ᓂᕆᐅᒋᔭᓖᑦ ᐃᒃᓯᕙᐅᑕᖃᖅᑎᑕᐅᓂᐊᕐᓂᕐᒥᒃ ᓵᒥ ᓄᑖᑦ ᐋᖅᑭᓱᖅᑕᐅᕙᓪᓕᐊᓕᕐᐸᑕ ᑐᓂᐅᖅᑲᖅᑕᐅᓂᖏᓐᓄᑦ ᓴᐳᔾᔭᐅᓯᒪᔪᓅᖓᔪᑦ ᑮᓇᐅᔭᑦ. ᕿᑭᖅᑕᓂᒃᑯᑦ ᐃᓚᐅᑎᑦᓯᓕᖅᑐᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᕐᔪᐊᑯᓐᓂᒃ ᐊᖅᑯᑎᖃᖅᑐᑎᒃ ᐊᑕᖏᖅᑐᒥᒃ ᒐᕙᒪᒃᑯᑦ ᐊᐅᓚᑦᓯᒍᑎᖏᓐᓂᒃ ᐋᔩᕋᕈᑎᖃᕐᓂᕐᒧᑦ. ᐊᐅᒡᒍᓯ 2017−ᒥ, ᑎᑎᖅᑲᓂ ᕿᑭᖅᑕᓂᒃᑯᓐᓄᑦ, ᑲᓇᑕ ᐊᖓᔪᖅᑳᕐᔪᐊᖓ ᑐᕉᑐ ᓇᓗᓇᐃᕆᓚᐅᖅᑐᖅ “ᐃᓘᓐᓈᑦ ᒐᕙᒪᒃᑯᑦ ᐊᐅᓚᔾᔭᑦᑕᖓ” ᑎᒍᓯᔾᔪᑕᐅᓂᐊᖅᑐᖅ ᓴᖅᑮᓂᕐᒥᒃ ᑕᓪᓗᕈᑎᐅᑉ ᐃᒪᖓᓂᒃ NMCA, ᑐᑭᓕᒃ ᐊᖏᖃᑎᒌᒍᑏᑦ ᐃᓄᓐᓄᑦ ᐃᖕᒥᒃᑰᖓᓂᐊᓐᖏᑦᑐᑦ ᐊᑕᐅᓯᑐᐊᒨᖓᓗᑎᒃ ᒐᕙᒪᒃᑯᑦ ᐱᓕᕆᒡᕕᖓᓄᑦ, ᑭᓯᐊᓂᓕ ᐃᓚᐅᑎᑦᓯᓂᐊᖅᑐᑦ ᐱᓇᓱᐊᖃᑕᐅᒍᑎᒃᓴᓂᒃ ᐱᓇᓱᐊᕆᐊᓕᓕᒫᓂᒃ ᒐᕙᒪᒃᑯᑦ ᐱᓕᕆᒡᕕᖏᓐᓂᒃ.

“ᐅᐱᒋᔭᕗᑦ ᐱᓕᕆᐊᕆᓯᒪᔭᖏᑦ ᓄᓇᓕᖁᑎᑦᑕ ᐊᐃᕙᖃᑦᑕᓂᒃᑯᑦ ᓴᐳᔾᔭᐅᓯᒪᒍᑎᒃᓴᖓᓄᑦ ᑕᓪᓗᕈᑎᐅᑉ ᐃᒪᖓᓄᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ, ᐲᔭᐃ ᐊᕿᐊᕈᖅ, “ᐅᕙᑦᑎᓐᓄᑦ ᑖᒃᑯᐊ ᐃᒪᐃ ᓯᕗᓂᑦᓴᖃᑦᓯᐊᕈᑎᒃᓴᓪᓗᐊᑕᐅᒻᒪᑕ ᐃᓄᓐᓄᑦ ᖁᑦᑎᑦᑐᒥᐅᓄᑦ; ᓯᕗᓂᒃᓴᖃᕈᑕᐅᔪᖅ ᐱᓕᕆᐊᑦᓯᐊᕙᓐᓄᑦ, ᐱᑕᖃᕆᐊᓕᓐᓄᑦ ᐱᖁᑎᕐᔪᐊᓄᑦ/ᐃᓱᕐᕆᐅᑎᓄᑦ ᐊᒻᒪᓗ ᐃᓅᓯᕐᒧᑦ, ᐃᓕᖅᑯᓯᕐᒧᑦ, ᐊᒻᒪᓗ ᒪᑭᒪᔾᔪᑎᒃᓴᓄᑦ ᒪᑭᒪᒍᑕᐅᒍᓐᓇᓂᐊᖅᑐᓂᒃ ᕿᑭᖅᑕᓂ ᐃᓄᖏᓐᓄᑦ.”

ᕿᑭᖅᑕᓂᒃᑯᑦ ᓂᕆᐅᒋᔭᓖᑦ ᐅᖃᖃᑎᖃᐃᓐᓇᓂᐊᕐᓂᕐᒥᒃ ᐱᓇᓱᐊᖃᑎᒋᔭᑦᑎᓐᓂᒃ ᒐᕙᒪᑐᖃᒃᑯᓐᓂ ᖃᓄᖅ ᓴᐳᔾᔨᓯᒪᑦᓯᐊᕈᓐᓇᓂᐊᕐᒪᖔᑦᑕ ᓄᓇᑦᑎᓐᓂᒃ ᐃᒪᑦᑎᓂᓪᓗ ᐊᖅᑯᑎᓕᐅᕐᐸᓪᓕᐊᑎᓪᓗᑕ ᓄᑖᓂᒃ ᐱᕈᕐᐸᓪᓕᐊᔾᔪᑎᒃᓴᓂᒃ ᒪᑭᒪᔾᔪᑎᒃᓴᓂᓪᓗ ᐅᑭᐅᖅᑕᖅᑐᒥ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᒥᑦᓵᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᓴᓴᐃᔭᑎ ᑭᒡᒐᖅᑐᐃᔪᑦ 14,000-ᓃᑦᑐᓂᒃ ᐃᓄᓐᓂᒃ ᕿᑭᖅᑕᓂ (ᕿᑭᖅᑖᓗᒃ) ᓄᓇᖓᓂ ᓄᓇᕗᒻᒥ, ᐃᓚᒋᔭᐅᓪᓗᑎᒃ 13 ᓄᓇᓖᑦ ᐊᐅᓱᐃᑦᑐᒥᒃ ᖁᑦᑎᑦᑐᒦᑦᑐᖅ ᓴᓂᑭᓗᐊᒧᑦ (ᕿᑭᖅᑕᑦ) ᓂᒋᐊᑕ ᑲᓇᓐᓈᓂ ᑕᓯᐅᔭᕐᔪᐊᒥ. ᕿᑭᖅᑕᓂᒃᑯᑦ ᐱᓂᐊᕐᓂᕋᐅᑎᖓ ᐊᑦᑕᓇᐃᕐᓯᒪᑦᓯᓂᖅ, ᐊᐅᓚᑦᓯᓂᖅ ᓯᕗᒧᐊᒃᑎᑦᑎᕙᓪᓕᐊᓂᕐᓗ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᑲᔪᖅᑕᐅᔾᔪᑎᓂᒃ ᕿᑭᖅᑕᓂ ᐃᓄᓐᓄᑦ; ᐊᒻᒪᓗ ᐱᕚᓪᓕᕈᑎᒃᓴᓂᒃ ᐃᓄᒃᑎᑐᑦ ᐅᖃᐅᓯᕐᒥᒃ ᐊᒻᒪᓗ ᐃᓄᐃᑦ ᐱᖅᑯᓯᖏᓐᓂᒃ, ᐊᕙᑎᑦᑎᓐᓂᒃ ᐱᖕᒪᕆᐅᔪᖁᑕᐅᔪᓂᒃ, ᓇᖕᒥᓂᖅ−ᒪᑭᒪᓂᕐᒥᒃ, ᐊᒻᒪᓗ ᒪᑭᒪᔾᔪᑎᒃᓴᓄᑦ, ᐃᓅᓯᕐᒧᑦ ᐃᓕᖅᑯᓯᕐᒧᓪᓗ ᖃᓄᐃᓐᖏᑦᓯᐊᕈᑎᒃᓴᓂᒃ ᒪᑐᐃᖓᑦᓯᐊᕐᓗᓂ ᐊᒻᒪᓗ ᓇᖕᒥᓂᖅ− ᒪᑭᒪᓂᒃᑯᑦ. ᐃᓛᒃᑯᑦ 39 ᓄᓇᕗᒻᒥ ᐊᖏᕈᑎᓃᑦᑐᖅ, ᕿᑭᖅᑕᓂᒃᑯᑦ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᑦ (DIO) ᐱᓕᕆᐊᒃᓴᓖᑦ ᐊᐅᓚᑦᓯᓂᕐᒥᒃ ᐃᓄᐃᑦ ᓄᓇᖁᑎᖏᓐᓂᒃ ᕿᑭᖅᑕᓂ ᓄᓇᖓᓂ.

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:

ᓴᐃᒪ ᓴᐊᕼᐊ ᔨᐅᕆHᐃ,

ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

(867) 975.8413

1.800.667.2742

ᓄᑖᖅ ᐋᖅᑭᑦᓯᒪᒍᑎᒃᓴᖅ ᐱᕙᓪᓕᐊᔪᓕᕆᓂᕐᒧᑦ ᓄᓇᕗᒻᒥ