ᐃᖃᓗᐃᑦ, ᓄᓇᕗᑦ – ᐊᒃᑑᕝᕙ  4, 2017 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᓂᐊᖅᑐᑦ ᒪᕐᕉᓂᒃ ᓄᑖᓂᒃ ᐱᓕᕆᐊᒃᓴᓂ 2017-18ᒧᓗ ᑐᕌᖓᔪᓂᒃ ᐸᐃᕆᕕᓕᕆᓂᕐᒧᑦ ᐊᒻᒪᓗ ᓱᕈᓯᓛᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᓂ.

“ᐊᐱᖅᓱᓚᐅᖅᑐᑦ ᐃᓄᖕᓂᑦ 13ᖑᔪᓂᑦ ᕿᑭᖅᑖᓗᖕᒥᑦ ᓄᓇᓕᖕᓂ ᖃᓄᐃᑦᑐᓂᒃ ᐱᓕᕆᐊᒃᓴᓂ ᓴᖅᑮᖁᔨᔪᒪᓇᔭᕐᒪᖔᑖᒃ” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓕᖅ ᐊᕿᐊᕈᖅ, “ᐊᒥᓲᓂᑦ ᓇᓗᓇᐃᖅᓯᓚᐅᖅᑐᑦ ᐃᑲᔫᑎᒃᓴᖃᕆᐊᖃᕐᓂᖓᓄᑦ ᓱᕈᓯᓛᑦ ᐃᓕᓐᓂᐊᕐᓂᖏᓐᓂᒃ ᐊᒻᒪᓗ ᐸᐃᕆᕕᓕᕆᓂᕐᒥᒃ, ᐊᒻᒪᓗ ᐱᓕᕆᐊᒃᓴᓂ ᓴᓐᖏᓕᖅᑎᑦᑎᓂᐊᖅᑐᓂᒃ ᐃᓕᖅᑯᓯᑦᑎᓐᓂ.”

ᑐᑭᓯᒋᐊᕆᐊᖃᑦᑕᓚᐅᖅᑎᓪᓗᒋᑦ 13ᓄᑦ ᕿᑭᖅᑖᓗᖕᒥ ᓄᓇᓕᖕᓄᑦ ᐅᐱᕐᖔᖅ, ᕿᑭᖅᑕᓃᒃᑯᑦ ᓂᕈᐊᖅᖠᓚᐅᖅᑐᑦ ᑖᒃᑯᓂᖓ ᐱᓕᕆᐊᒃᓴᐅᓂᐊᖅᑐᓂᒃ ᐊᒻᒪᓗ ᐱᓕᕆᐊᒃᓴᓐᖑᖅᑎᑕᐅᓪᓗᑎᒃ ᑖᒃᑯᐊ ᒪᕐᕉᒃ.

ᕿᑭᖅᑕᓃᒃᑯᑦ ᒫᓐᓇ ᐸᐃᕆᕕᓕᕐᓂᒃᒥ ᐊᒻᒪᓗ ᓱᕈᓯᓛᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᐱᓕᕆᐊᒃᓴᓂᒃ ᐊᕕᑕᐅᓯᒪᓪᓗᑎᒃ ᐃᒫᒃ: ᐊᖓᔪᖅᑳᓄᑦ ᐃᑲᔫᑎᒃᓴᑦ ᐸᐃᕆᕕᖕᓄᑦ ᐊᒻᒪᓗ ᓄᑖᓂᒃ ᐃᑲᔫᑎᒃᓴᓂ ᐸᐃᕆᕕᖕᓄᑦ.  

ᕿᑐᕐᖓᓕᓐᓄᑦ ᐃᑲᔫᑏᑦ ᐸᐃᕆᕕᒻᒧᑦ:

• ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖅᑲᓇᐃᔭᖃᑎᓖᑦ ᑲᑭᕙᒃᑯᓐᓂᑦ ᐃᑲᔫᑎᖃᖃᑦᑕᓂᐊᕐᖓᑕ $5ᒥᒃ ᐸᐃᕆᕕᓐᓄᑦ ᐃᑲᔫᑎᓂᑦ ᐊᑭᓕᕐᓱᐃᒍᑕᐅᕙᑦᑐᓄᑦ ᕿᑭᖅᑕᓂ ᕿᑐᕐᖓᓕᓐᓄᑦ ᐊᑎᓕᐅᖅᑕᐅᓯᒪᔪᓄᑦ ᓄᓇᕗᒥ ᐊᖏᖃᑎᒌᒍᑎᓄᑦ ᕿᑐᕐᖓᖏᑦ ᓚᐃᓴᓕᓐᓄᑦ ᐸᐃᕆᕕᓕᐊᖃᑦᑕᖅᑐᓄᑦ
• ᕿᑭᖅᑕᓂ ᐃᓄᐃᑦ ᕿᑐᕐᖓᓖᑦ ᑲᑭᕙᒃᑯᓐᓂ ᐃᑲᔫᓯᐊᖅᑖᐸᑦᑐᑦ $19ᓂᑦ/ᖃᐅᑕᒫᑦ ᐃᑲᔫᑎᓂᑦ ᐃᑲᔫᓯᐊᖅᑖᖃᑦᑕᕐᓂᐊᓕᖅᑐᑦ $24ᓂᑦ/ᖃᐅᑕᒫᑦ ᐃᑲᔫᑎᓂᑦ ᐸᐃᕆᕕᓐᓄᑦ
• ᐃᑲᔫᑏᑦ ᐃᑲᔫᑕᐅᖃᑦᑕᓂᐊᖅᑐᑦ ᐊᒃᑑᕝᕙ 2017ᒥ ᒫᑦᓯ 2019ᒧᑦ ᐱᒋᐊᖅᑎᑕᐅᒃᑲᓐᓂᕈᓐᓇᕋᔭᖅᑐᔅᓴᐅᒋᓪᓗᑎᒃ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᐊᖏᓚᐅᖅᑎᓪᓗᒋᑦ

ᑖᒃᑯᐊ ᓄᑖᑦ ᐸᐃᕆᕕᓐᓄᑦ ᐃᑲᔫᑏᑦ ᑲᑐᔾᔨᖃᑎᒌᒃᑯᓐᓂ ᐃᑲᔫᑎᖃᖃᑦᑕᓂᐊᖅᑐᑦ ᑕᒫᓂ 250ᖏᓐᓃᑦᑐᓄᑦ ᐸᐃᕆᕕᒻᒥ ᐃᓂᖏᔭᐅᕙᑦᑐᓄᑦ. ᑲᑐᔾᔨᖃᑎᒌᒃᑯᑦ ᐃᑲᔫᑎᖏᑦ ᐊᑭᖃᖃᑦᑕᖅᑐᑦ ᑎᑭᐅᒪᔪᓂᑦ $1,250/ᐊᑐᓂᑦ ᕿᑐᕐᖓᕆᔭᐅᔪᓄᑦ ᐊᕐᕌᒍᑕᒫᑦ ᐊᑭᓕᕐᓱᐃᖏᓐᓂᕐᓴᐅᒍᑕᐅᖃᑦᑕᓂᐊᖅᑐᑎᒃ ᕿᑭᖅᑕᓂ ᕿᑐᕐᖓᓕᓐᓄᑦ. ᐃᑲᔫᑏᑦ ᐊᑑᑎᖃᕐᓂᐊᖅᑐᑦ ᑮᓇᐅᔭᖃᖅᑎᑦᑎᒍᑕᐅᖃᑦᑕᕐᓗᑎᒃ $312,500ᓂᑦ ᐊᕐᕌᒍᑕᒫᑦ ᑲᑐᔾᔨᖃᑎᒌᒃᑯᓐᓂ ᐸᐃᕆᕕᓐᓄᑦ.

ᓄᑖᓂᒃ ᐃᑲᔪᕈᑎᒃᓴᓄᑦ ᐸᐃᕆᕕᖕᓄᑦ:  

• ᕿᑭᖅᑕᓃᒃᑯᑦ ᐱᕙᓪᓕᐊᑎᑦᑎᓂᐊᖅᑐᑦ ᓄᑖᒥᒃ ᐃᓕᖅᑯᓯᓕᕆᓂᕐᒧᑦ ᑐᕌᖓᔪᓂᒃ ᐃᑲᔪᕈᑎᒃᓴᓂ ᐸᐃᕆᕕᖕᓄᑦ ᕿᑭᖅᑖᓗᖕᒥ
• ᐃᓄᐃᑦ ᐊᖓᔪᖅᑳᖑᔪᑦ ᓇᓗᓇᐃᖅᓯᓚᐅᕐᒪᑕ ᐱᑕᖃᕆᐊᖃᕐᓂᖓᓄᑦ ᐃᑲᔪᕈᑎᒃᓴᓂ − ᓱᕐᓗ ᐅᖃᓕᒫᒐᓂᒃ, ᐱᓐᖑᐊᕈᑎᓂᒃ, ᐅᕝᕙᓘᓐᓃᑦ ᐱᓐᖑᐊᓂ − ᐃᓄᒃᑎᑑᖅᑐᓂᒃ ᐊᒻᒪᓗ ᑐᕌᖓᓗᑎᒃ ᐃᓄᐃᑦ ᐃᓕᖅᑯᓯᐊᓄᑦ
• ᑖᒃᑯᐊ ᐃᑲᔪᕈᑎᑦ ᐱᔭᕇᖅᑕᐅᓯᒪᓂᐊᖅᑐᑦ ᐊᒻᒪ ᓴᖅᑭᑎᑕᐅᓗᑎᓪᓗ ᕿᑭᖅᑖᓗᖕᒥ ᐸᐃᕆᕕᖕᓄᑦ 2018ᒥ  

ᕿᑭᖅᑕᓃᒃᑯᑦ ᐱᕙᓪᓕᐊᑎᑦᑎᓯᒪᖕᒥᔪᑦ  ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖓᓂ (Q-CAP).

ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᑦ (Q-CAP):

• ᑖᓐᓇ ᐱᓕᕆᐊᒃᓴᖅ ᑮᓇᐅᔭᓂᒃ ᐊᑐᖃᑦᑕᕐᓂᐊᖅᑐᖅ ᑎᑭᓪᓗᒍ $33,000ᓂ/ᐊᕐᕌᒍᑕᒫᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᓄᑦ ᕿᑭᖅᑖᓗᖕᒥ ᓄᓇᓕᖕᓄᑦ

ᕿᑭᖅᑖᓗᖕᒥ ᐃᓄᐃᑦ ᓇᓗᓇᐃᖅᓯᓚᐅᕐᒪᑕ ᐱᑕᖃᕆᐊᖃᕐᓂᖓᓄᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᓂ ᐃᑲᔪᕈᓐᓇᖅᑐᓂᒃ ᑐᕌᖓᔪᓄᑦ ᐃᓕᖅᑯᓯᑎᒍᑦ ᐃᓕᓐᓂᐊᕈᓐᓇᕐᓂᕐᒥᒃ ᐊᒻᒪᓗ ᓴᓐᖏᓕᖅᑎᑦᑎᓂᐊᖅᑐᒥᒃ ᐃᓅᓂᕆᔭᐅᔪ.  ᕿᑭᖅᑕᓃᒃᑯᑦ ᓇᓗᓇᐃᖅᓯᓚᐅᕐᒥᔪᑦ ᐱᑕᖃᕆᐊᖃᕐᓂᖓᓂᒃ ᐃᓕᖅᑯᓯᕐᒨᖓᔪᓂᒃ ᐱᓕᕆᐊᒃᓴᓂ.

ᕿᑭᖅᑕᓃᒃᑯᑦ ᓴᖅᑭᑎᑦᑎᓂᐊᖅᑐᑦ  ᕿᑭᖅᑕᓃᒃᑯᑦ–ᐃᓕᖅᑯᓯᓕᕆᓂᕐᒧᑦ ᐱᓕᕆᐊᕐᒥᒃ ᐊᑐᐃᓐᓇᐅᓂᐊᖅᑐᓂᒃ ᒪᕐᕈᐃᓕᖓᔪᒃᑯᑦ:  

• ᑐᒃᓯᕋᐅᑎᓕᐅᕐᓂᒃᑯᑦ ᐱᓕᕆᐊᒃᓴᑦ
  • ᐊᔾᔨᒋᐸᓗᒡᓗᓂᐅᒃ ᕿᑭᖅᑕᓃᒃᑯᑦ ᒫᓐᓇᒃᑯᑦ ᓄᓇᓕᖕᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᒃᓴᖓᓂ
  • ᓄᓇᓕᖕᓂᑦ ᑎᒥᐅᔪᑦ, ᑲᑐᔾᔨᖃᑎᒌᖑᔪᑦ ᐅᕝᕙᓘᓐᓃᑦ ᐃᓄᑐᐃᓐᓇᐃᑦ ᑐᒃᓯᕋᕈᓐᓇᖅᑐᑦ ᑮᓇᐅᔭᓂᒃ ᐱᓕᕆᐊᒃᓴᖃᕈᒪᔪᓂᒃ ᐃᓕᖅᑯᓯᓕᕆᓂᐅᑉ ᒥᒃᓵᓄᑦ ᑐᕌᒐᖃᕐᓗᑎᒃ ᓄᓇᓕᐊᕈᔾᔨᓂᕐᒥᒃ ᓅᑎᑦᑎᓂᕐᒥᒃ ᐊᒻᒪᓗ ᒥᖅᓱᖅᑎᑦᑎᓂᕐᒥᒃ ᐱᔭᒃᓴᓂ
  • ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᒫᓐᓇᒃᑯᑦ ᐋᖅᑭᒃᓱᐃᕙᓪᓕᐊᔪᑦ ᑐᒃᓯᕋᐅᑎᒥᒃ ᐊᒻᒪᓗ ᒪᓕᒐᒃᓴᕆᔭᐅᓂᐊᖅᑐᓂ
  • ᑖᓐᓇ ᐱᓕᕆᐊᒃᓴᖅ ᓴᖅᑭᑎᑕᐅᓛᖅᑐᖅ 2018ᒥ
• ᕿᑭᖅᑕᓃᒃᑯᑦ ᓴᖅᑭᑎᑕᖏᑦ ᐱᓕᕆᐊᒃᓴᑦ
  • ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᓄᓇᓕᒻᒥᐅᓂ ᐃᖅᑲᓇᐃᔭᖃᑎᖃᖅᑐᑦ ᐱᕙᓪᓕᐊᑎᑦᑎᓂᖏᓐᓄᑦ ᐆᑦᑐᕋᖅᑕᐅᓂᐊᖅᑐᒥᒃ ᐃᓕᖅᓯᑯᓕᕆᓂᕐᒧᑦ ᐱᓕᕆᐊᒃᓴᒥᒃ
  • ᑖᓐᓇ ᐱᓕᕆᐊᒃᓴᖅ ᓴᖅᑭᑎᑕᐅᓛᖅᑐᖅ ᕿᑭᖅᑕᓃᒃᑯᓐᓄᑦ ᕿᑭᖅᑖᓗᖕᒥ ᓄᓇᓕᖕᓄᑦ ᐱᑕᖃᓐᖏᑦᑐᓂᒃ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᓄᑦ ᑐᒃᓯᕋᕐᕕᐅᔪᓐᓇᖅᑐᓂᒃ
  • ᑖᓐᓇ ᐱᓕᕆᐊᒃᓴᖅ ᓴᖅᑭᑕᐅᓂᐊᖅᑐᖅ 2018-19 ᐊᕐᕌᒍᖓᓂ

ᑖᒃᑯᐊ ᓄᑖᖑᔪᑦ ᐱᓕᕆᐊᒃᓴᑦ ᓴᖅᑭᓯᒪᔪᑦ ᕿᑭᖅᑕᓃᒃᑯᑦ ᓄᑖᕆᔭᖓᓂᒃ ᑮᓇᐅᔭᐃᑦ ᓂᖏᖅᑕᐅᔪᓂᒃ ᐊᑐᐊᒐᒍᑦ ᓴᖅᑭᕝᕕᐅᓪᓗᑎᒃ ᐅᑯᐊ ᑐᖅᑯᖅᑕᐅᓯᒪᔪᑦ ᑮᓇᐅᔭᐃᑦ ᐊᒻᒪᓗ ᐃᑲᔫᓯᐊᒃᓴᓄᑦ ᑮᓇᐅᔭᖏᑦ. ᑖᒃᑯᐊ ᑐᖅᑯᖅᑕᐅᓯᒪᔪᑦ ᑮᓇᐅᔭᐃᑦ ᐱᕈᖅᐸᓪᓕᐊᑎᓪᓗᒋᑦ ᑖᒃᑯᐊ ᐱᕈᖅᓴᖅᑕᐅᔪᑦ ᑮᓇᐅᔭᐃᑦ ᐃᓕᔭᐅᖃᑦᑕᕐᓂᐊᖅᖢᑎᒃ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓄᑦ ᐅᓄᖅᓯᒋᐊᕈᓐᓇᕐᓂᐊᕐᒪᑕ ᐱᓕᕆᐊᒃᓴᐅᔪᑦ ᐃᓄᖕᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋᕐ ᓯᐊᕋᕼᐃ,

ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

›szerehi@qia.ca

É(867) 975.8413

É1.800.667.2742