ᐱᔭᕇᖅᑐᑦ ᕿᑭᖅᑕᓃᒃᑯᑦ/ᐸᕕᓐᓛᓐᑯᓪᓗ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᓐᓂᕆᓚᐅᖅᑕᖓᑦ ᓄᓘᔮᑦ ᐱᓕᕆᐊᖓ ᐱᔾᔪᑎᒋᓪᓗᒍ
ᖃᖓ: ᐄᐳᓪ 18ᒥᑦ 20ᒧᑦ, 2017
ᓇᒥ: ᕙᓐᑰᕙ, ᐳᕆᑎᔅ ᑯᓚᒻᐱᐊ
ᐃᖃᓗᐃᑦ, ᓄᓇᕗᑦ – ᐄᐳᓪ 20, 2017 – ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᓐᓂᖃᓚᐅᕐᖓᑦ ᑖᒃᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪ ᐸᕕᓐᓛᓐᑯᑦ ᓴᕕᕋᔭᒃᓴᓂ ᐅᔭᕋᕐᓂᐊᕐᕕᓕᕆᔨᒃᑯᓪᓗ ᐅᓪᓗᒥ ᕙᓐᑰᕙ , ᐳᕆᑎᔅ ᑯᓚᒻᐱᐊᒥ.
ᐱᔾᔪᑎᒋᔭᐅᔪᑦ ᓴᖅᑭᑎᑕᐅᓯᒪᔪᓄᑦ ᓈᓚᒃᑎᓄᑦ ᑐᑭᓕᐅᖁᔭᐅᓯᒪᓪᓗᑎᒃ ᓯᑎᐱᕆ6, 2013ᒧᑦ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓂᒃ ᐱᕚᓪᓕᕈᑎᒃᓴᖏᓐᓂᒃ ᐊᖏᕈᑎᒥᒃ ᓄᓘᔮᑦ ᐱᓕᕆᐊᖓᓄᑦ, ᐊᒻᒪᓗ ᓇᓗᓇᐃᔭᐃᓗᑎᒃ ᖃᔅᓯᓂᒃ ᑮᓇᐅᔭᓂᒃ ᓯᕗᓂᐊᒍᑦ ᐊᑭᓕᖅᑕᐅᓯᒪᒋᐊᖃᕐᒪᖔᑖᒃ ᕿᑭᖅᑕᓃᒃᑯᓐᓄᑦ ᒪᓕᒃᖢᒍ ᐊᖏᕈᑎ.
ᑖᒃᑯᐊ ᑕᒪᕐᒥ ᐊᔾᔨᒌᓐᖏᑦᑐᓂᒃ ᐃᓂᒋᔭᖏᓐᓂᒃ ᓴᖅᑭᑎᑦᑎᓚᐅᖅᑐᑦ ᐱᔾᔪᑎᒋᓪᓗᒋᑦ “ᐅᔭᕋᕐᓂᐊᖅᑕᐅᔪᑦ ᐅᖁᒪᐃᓐᓂᖏᓐᓂ” ᓄᓘᔮᑦ ᐱᓕᕆᐊᖓᓂᑦ ᐊᒻᒪᓗ ᑮᓇᐅᔭᐃᑦ ᐊᑭᓕᖅᑕᐅᒋᐊᖃᖅᑐᓄᑦ ᕿᑭᖅᑕᓃᒃᑯᓐᓄᑦ.
“ᕿᑭᖅᑕᓃᒃᑯᑦ ᓴᓐᖏᔪᒥᒃ ᓴᖅᑭᑎᑦᑎᔪᑦ ᐱᔾᔪᑎᖏᓐᓂᒃ ᓈᓚᒃᑎᓄᑦ ᓴᖅᑭᑎᑦᑎᓪᓗᑎᒃ ᓂᕆᐅᒋᔭᐅᓯᒪᔪᓄᑦ ᐃᓄᓐᓄᑦ ᑖᓐᓇ ᐊᖏᕈᑎ ᐊᑎᓕᐅᖅᑕᐅᓚᐅᖅᑎᓪᓗᒍ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ ᑕᐃᑲᓂ ᓈᓚᓐᓂᕐᒥᒃ ᐱᔭᕇᖅᑎᓪᓗᒍ.
“ᐱᒻᒪᕆᐅᔪᖅ ᑖᒃᑯᐊ ᑲᓐᑐᕌᑦ ᐊᑎᓕᐅᖅᑕᐅᓚᐅᖅᑐᑦ ᐃᓄᓐᓄᑦ ᑲᔪᓯᑎᑕᐅᒋᐊᖃᕐᓂᖓᓂᒃ ᑖᒃᑯᓄᖓ ᑲᒻᐸᓂᕐᒥᒃ ᐱᓕᕆᖃᑎᖃᕈᒪᔪᓄᑦ ᐅᕙᑦᑎᓐᓂ. ᑕᐃᒪ ᓈᓚᒃᑎᓄᑦ ᑐᑭᑖᕈᑕᐅᒋᐊᖃᕐᓂᐊᓕᖅᑐ.”
ᐃᓱᒪᒋᓪᓗᒋᑦ ᐊᑐᐃᓐᓇᐅᓂᖏᑦ ᓈᓚᒃᑎᐅᔪᑦ (ᐳᕆᑎᔅ ᑯᓚᒻᐱᐊᒥᐅᑕᐅᑎᓪᓗᒋᑦ ᐃᐊᓪᐳᑕᒥᓗ), ᐊᒻᒪᓗ ᐋᖅᑭᒃᓯᓗᑎᒃ ᐅᓪᓗᕐᒥ ᕿᓚᒻᒥᐅᓂᖅᐹᖑᔪᓐᓇᖅᑐᒥᒃ ᓈᓚᓐᓂᒃᓴᐅᒐᔭᖅᑐᒥ ᐊᒻᒪᓗ ᐊᑭᑭᓐᓂᖅᓴᐅᓂᐊᖅᖢᓂ, ᕿᑭᖅᑕᓃᒃᑯᑦ ᐊᒻᒪ ᐸᕕᓐᓚᓐᑯᓪᓗ ᐊᖏᖃᑎᒌᓚᐅᖅᑐᑦ ᓈᓚᓐᓂᖃᕐᓗᑎᒃ ᕙᓐᑰᕙᒥ. ᐊᑐᐃᓐᓇᐅᑦᑎᐊᖁᓪᓗᒍ, ᑖᒃᑯᐊ ᓈᓚᓐᓂᐅᔪᑦ ᖃᕋᓴᐅᔭᒃᑰᖅᑎᑕᐅᓚᐅᖅᑐᑦ. ᐊᑐᐃᓐᓇᐅᓕᑐᐊᖅᑲᑕ, ᕿᑭᖅᑕᓃᒃᑯᑦ ᓈᓚᓐᓂᐅᓚᐅᖅᑐᓂᒃ ᐃᓕᓯᓂᐊᖅᑐᑦ ᕿᑭᖅᑕᓃᒃᑯᑦ ᐃᑭᐊᖅᑭᕕᖓᓄᑦ.
ᒪᓕᒃᖢᒍ ᒪᓕᑦᑕᐅᒋᐊᖃᖅᑐᑦ ᓈᓚᒃᑎᓄᑦ ᑭᖑᓪᓕᖅᐹᒥᒃ ᑐᓂᓯᓂᕐᒥᒃ ᐅᕝᕙᓘᓐᓃᑦ ᑐᑭᑖᕈᑎᒋᔭᐅᓂᐊᖅᑐᑦ 60 ᐅᓪᓗᐃᑦ ᓈᓛᐅᓐᖏᑎᓪᓗᒍ ᓈᓚᓐᓂᖅ ᐱᔭᕇᖅᓯᒪᓕᖅᑎᓪᓗᒍ.
ᕿᑭᖅᑕᓃᒃᑯᑦ ᐅᖃᐅᓯᒃᓴᖃᒃᑲᓐᓂᓛᖅᑐᑦ ᑐᑭᑖᖅᓯᒪᔪᖃᓕᖅᑎᓪᓗᒍ ᓴᖅᑭᑎᑕᐅᓯᒪᓕᖅᑎᓪᓗᒋᓪᓗ ᑖᒃᑯᓄᖓ ᐊᖏᖃᑎᒌᒍᓐᓇᐃᓯᒪᔪᓄᑦ ᓈᓚᒃᑎᓂᑦ.
ᖃᐅᔨᒋᐊᕐᕕᒃᓴᖅ:
ᓰᒪ ᓴᕼᐋᕐ ᓯᐊᕋᕼᐃ, ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
867.975.8413 ᐅᕝᕙᓘᓐᓃᑦ 1.800.667.2742
szerehi@qia.ca
